2013年5月6日星期一

RISK: StarCraft Collector’s Edition 星海爭霸

曾經著迷電腦遊戲StarCraft既我 當StarCraft 2出左之後失望而回 但係StarCraft 同 BoardGame結合又可唔可以帶黎當年既歡樂呢? 雖然FFG之前已經出左StarCraft the BoardGame , 但個人感覺一般 , 特別係佢倒序既行動次序,以及佢要配對戰鬥既模式甚感唔夠暢快 , 故此都好少再開,日後有機會或者會寫返個簡介,而今次StarCraft + Risk + Boardgame 又會係點呢?

Risk 係咪一隻好Game見人見智 , 不過最近Risk 都有唔少既改進, 例如之前既2210 A.D. 同 Legacy , Lord of the Rings 等等都有唔少不同於classic Risk既玩法,,或者簡單就是美 ,新版本既Risk 都有令人滿意既流暢遊戲過程,,不論你覺得佢簡單與否,贏定輸,好快就可以一局。



簡介:
RISK - StarCraft 可以支援6個玩家 分別有3個種族  神 Protoss / 人 Terran  / 蟲 Zerg 係StarCraft既著名星系間戰鬥,以壓制各族成為贏家。



特色:
最近新版既Risk少有支援6個玩家,今次支援6人正合吾意,個人都喜歡較多人一齊亂鬥既感覺。而士兵Minis 分3個族,每個族都係唔同造型,每個族有2套唔同色既兵 ,士兵既造型雖稱不上完美,但一盒幾百粒minis黎講算唔錯,無分兵種,只有分1個單位及3個單位的士兵,每個種族都有所屬既英雄,合共6個唔同造型既英雄,以及基地,同埋StarCraft入面人見人愛的晶礦,而最重要係,StarCraft不同種族既特性,就係靠種族技能咭所顯露,最後就係任務目標,鬥快完成一定數量既任務贏得勝利。



內容玩法:
玩法有4種,有Basic Training (預設開局模式),Command Room,Total Domination(傳統玩法)同埋 Team Play,當中我認為只有Command Room 同 Team Play 玩家會玩,其他相信大家未必會選擇。現在講下Command Room 模式,呢個Mode係呢隻Game既精粹,首先將所有咭洗混之後抽15張,每張地放置1個晶礦去增益該地既價值,置有晶礦的地將會視為2副土地既價值去結算新兵數,然後再隨機放置任務目標及獎勵(面朝下),最後玩家領取若干士兵,英雄,基地,分別將有關mins放落場中直至所有星系被佔領為止,最後將任務目標返轉朝上以供所有人都可以隨時查看,並將牌分回3個族種,自此,所有玩家只能抽取佢所屬既族種牌。



過程如Risk Classic 既玩法一般,輪流攻擊,重置。當你在一回合中成功佔領過一副敵方領地,你就可以抽取一張種族咭,而係Command Room入面,族種咭有2樣既效果,1係技能,2係徵兵。



技能使用視乎時機,已詳述於咭牌中,右上角的星星代表每回合增兵階段,你可以打出咭牌,參照合共打出的星星數對應增徵兵量,以增加該階段的最終徵兵數量。故此無用既咭都可以用作徵兵用,唔錯既設計。

玩家一直輪流行動,當任何玩家係該回合達到任務要求,佢就可以拿取該任務標記,並獲得該任務的獎勵,獎勵有增加徵兵數,一些防禦建築,每回合必然可抽牌等。由於每次遊戲抽出的任務目標及相對獎勵都會不同,故此每次都會有些少新意。



值得留意既係,玩家必需同時控制住自已的Base先可以完成任務以及贏得遊戲,如果過程中俾其他玩家佔領左Base,你必需要打回才能繼續任務進程,而任何玩家被消滅,殺死佢最後一個兵既玩家更可拿取其全部已完成的任務標記視為己有,當任一玩家成功達到一定數量的標記即視為勝利!



總結:

感覺上6個人玩既話會比較迫,會較易有一個玩家一開始只能防守,難以擴張,但問題唔大,而隻Game最能表達到StarCraft既係種族咭牌,不過設計一般,每個族雖然有一些分別(例如係人族既Base可以飛走,但大致上分別唔大,比較失望。總的來說,如果你喜歡但並未有新版既Risk,又喜歡StarCraft 既話,不仿去馬,但期待戰術較量,以少勝多,消耗腦汁既戰鬥則不可能,始終都係一隻只有輕度戰略的骰運Game。我未試過Team Play,玩法同Command Room一樣不過可以借道,而且任務標記係共同結算,或者會幾好玩,以Command Room而言總體唔失望,但亦唔驚喜。
 

評分:★★★
策略度:★★
簡易度:★★
耐玩度:★★
氣氛:★★
(5星最高)

1 則留言:

  1. 有MIN果張好有FEEL!不過隻英好似被困XD

    回覆刪除