2017年9月21日星期四

Last Night on Earth: The Zombie Game


一個已經不停翻炒濫用既題材 , Last Night On Earth : The Zombie Game (LNOE)  , 關於一眾幸存者與喪屍之間搏鬥既故事,  在一個小鎮上 , 扮演幸存者搜尋物資, 四處躲藏 , 連結隊友, 一起逃出生天 , 亦可成為喪屍, 追獵人類, 張牙舞爪 , 團結流散四周, 脆弱的行屍走肉去完成大業 ,  今晚 , 會係你的最後一夜嗎?

遊戲支援 2-6人, 不論人數, 每次遊戲必會有4個幸存者及至少1位操控喪屍, 可能會一人分析兩角 , 而6人遊戲時, 會有兩位操控喪屍.

個人覺得5人最好, 6人都唔差.



遊戲已經面世十年, 故此玩法規則相對當下類同遊戲感覺簡單得多.
遊戲有6塊L形版圖, 每局只用其中塊, 可惜只係單面印刷, 如果底面不同變化更大, 而中間的方形版圖則為雙面, 其中一面只用於其中一個劇本.



遊戲有5個劇本, 包括最簡單既攻防戰, 搵到燃料開車走, 搵返D同鄉等等. 每次set 場地圖都係隨機, 所以就算同一故事再玩, 地圖都可能有所不同, 不過個人覺得地圖設計唔算有深度, 所以有否變化實際唔大,但點都好過不變.



有8個角色選擇, 圓形位置用於表示該角色目前的生命, 每個角色都有不同能力, 重有真人配圖, low budget喪屍電影feel即時出晒黎.



8個英雄模型, 雖然係10年前既Game, 質素都算係咁 , 唔失禮.



喪屍有14隻, 2個色, 當有2個玩家操控喪屍就可以區分 , 我覺得2個玩家一齊控屍, 係戰術統一性會有小小影響, 但就打破類似Game要1人vs多人既情況, 無論人類定喪屍都會有同伴一齊計劃下, 增加樂趣.

玩法非常簡單, 講少少重點 , 一開始喪屍先手, 喪屍擲骰決定本回合是否可以將新喪屍進場 , 骰數大於場上屍數, 就可以補充新的喪屍 .

喪屍每回合會補回手牌上限, 然後就可以移動場上的喪屍 , 每次只可行一格, 不論喪屍或人類,都可以打斜行 , 而且喪屍可以穿牆移動 (透過木地版爬入 , 牆隙 , 窗户穿過) . 如果移動時接鄰有人類, 必須向該格移動. 當所有喪屍移動後 , 如同格上有人類則需要戰鬥.



戰鬥, 喪屍擲1粒擲, 人類擲2粒, 如果如上圖, 屍的骰數少於人類最大的骰數代表被推開,  喪屍傷不了人類, 企在原地 , 而人類亦沒有成功擊殺喪屍.

如果人類擲出的擲數大於喪屍,並且2粒骰數都是相同, 喪屍才會被擊殺.
否則如打和或高於英雄秉擲,英雄就會承受1點傷害, 放置1個wound token到英雄咭上, 每隻喪屍即使面對同一英雄都需要遂一戰鬥.



最後將回合開始時擲出補充的喪屍平均分配到場上的屍洞位置上.

喪屍玩家完結後就輪到英雄 , 英雄可以擲骰決定移動步數, 如在建築物中可以放棄移動以抽牌, 看能否找到什麼好物, 或任務目標牌.同樣如果移到喪屍位置則要戰鬥.

遊戲不斷重複以上流程直至任務達成或時間已到, 一般而言如時間已到人類沒有達成目標則人類失敗.

就咁睇遊戲性好似一般, 因為遊戲另一重點係咭牌.




上圖為喪屍咭, 可以突然加速 , 加攻擊力等, 都有幾精美的配圖, 一般戰鬥要打到對方唔易, 而已英雄行得好快, 喪屍要好好運用手牌出其不異突擊人類. 共有60張喪屍咭, 大部份會有2-3copy , 例如停電熄燈, 豪雨 , 及一些有趣事件咭, 可提升喪屍的力量,  當抽光後, 喪屍咭重洗.


喪屍有咭, 英雄當然都有, 不過就要主動去建築物搵, 如果無咭 ,面對不斷可抽牌既喪屍會好劣勢. 英雄咭比較多係物品類型 , 但亦有事件牌. 而當英雄需抽牌但無牌可抽, 視為物資用光了 , 人類失敗.


版圖上有不同建築, 部份可直接拿取某些牌.


Last Night on Earth 亦有另一賣點, Game Soundtrack:


有埋Playlist同歌名, 可惜, 非常差, 正常你唔可能頂得順聽住玩, 雖則係10年前既Game, 但編曲同音效好似90年代日系RPG midi feel , 不過我唔介意, 有無CD都會買.


說明書亦有介紹人類角色:


部份遊戲配件, 所有Token , 咭 , figure 質量都唔錯, 咭好厚身, 紙質不同於平常既遊戲,  恕無法專業地講出係咩紙, 光身, 有D啜手 , 不過應該會襟D. 


總結:
隻Game暫玩過1次, 有少少喜出望外, 可能本身唔大期望, 始終都成10年, 同埋呢隻Game 好耐以前有留意過, 當時唔大動機入手.

遊戲節奏快, 規則簡單, 咭牌文字稍多, 多玩一陣就唔洗再點消化, 成隻Game好集中係人類要完成目標,逃避喪屍 , 雖然唔容易死, 但失敗條件其實都唔難, 所以人類唔會太搏 , 至於喪屍 , 如果諗住直衝就可以殺到人就諗得太簡單, 必需有一定部署, 雙方玩既感覺會有D唔同,  人類方可能比較係RPG feel ,因為太多隨機性, 你會時刻擔心喪屍玩家有無咩勁牌過黎殺你, 體驗故事, 歷險既感覺比較高.

而喪屍目標比較單一, 就係殺人, 但喪屍單一隻難以做出大威脅, 在喪屍重生進場, 咩時機出牌buff , 點樣集結四散的喪屍去作出有效威脅, 通通需要部署, 玩起黎反而有D策略性. 不過遊戲涉及大量的擲骰抽牌, 可能會比較OP既能力,  策略性始終有限, 將Last Night on Earth 視為一隻輕鬆既喪屍遊戲會好D.

目前玩左第一關, 過程都幾峰迴路轉, 亦有緊張時刻, 比起一D題材相近但較複雜既遊戲 , 起碼節省setting 時間, 規則無咩支節零碎 , 大家集中係遊戲本身 , 玩過Mansion of Madness , Descent 呢D Game之後 , 可能更反撲歸真.

我需要多玩幾次再評呢隻Game, 佢唔係一隻精妙既遊戲, 亦沒有太奇情與技巧, 只係一隻系統好舊, 擲下骰仔, 抽下出下咭, 輕鬆玩1-2小時既平實遊戲 , 但我有少少厭太多旁支鎖碎既規則及佔用大量面積既Game , 雖然未完全肯定隻Game , 但都已經入左佢一個細擴 , 日後會再更新我既睇法.

主觀評分:3.5/5
客觀推薦: 2.5/5
策略度:2/5
簡易度:3.5/5
耐玩度:3.5/5
氣氛:3.5/5

2017年9月13日星期三

New Angeles 新洛杉磯


"一款關於公司陰謀, 權力與騙局的遊戲" , 又睇下係咪真, 遊戲背景就係大熱LCG Netrunner 既Android 世界  ,  係New Angeles 經濟特區上上演的六大企業鬥爭.



 世界已變, 貪婪依舊 , 深表認同.




版圖上方的計分track及威脅指數, 一旦威脅上升至25 , 代表New Angeles 不穩定到頂點, 聯邦政府有足夠政治籌碼收回New Angeles , 所有企業皆輸 , 然而呢隻並不是單純的合作遊戲.



玩家選擇一個企業, 分別為六大領域, 醫療 , 保安, 基建, 傳媒 , 能源 , 生化 , 各企業各有不同的賺分能力, 如每當1個疾病被移除就可得2分, 而大部份企業只會在遊戲中抽取某些指定類別的咭牌(方案).



遊戲中有5類手牌供企業抽取, 上圖係建設類的所有咭牌(方案), 玩家根據佢既企業右下角所示抽取對應的咭牌, 每次輪到你的時候就可以抽牌, 每個種類既咭牌(方案)功能各異, 分別用於對應New Angeles 上遇上的各項問題, 單以一個企業是無法解決城中面對的各項危機的.




將沒有被玩家選擇的企業目標咭移走 , 加入"聯邦派"然後將目標咭洗混, 再每人派一張, 多出的一張亦移走, 此目標咭會係本局遊戲中你的終極目標, 一般你會抽到其他企業為目標的牌, 代表最終結算時,你的財富(分數) 要比該企業高為勝, 如抽中自己的企業 , 則要至少高分過一定數量的玩家才勝, 而如果抽中聯邦派, 則代表你已與聯邦政府合謀以簽訂獨市合同為條件, 協助政府破壞New Angeles的穩定, 從而令聯邦政府有足夠的籌碼從各大企業手上將特區接管再交由你繼續營運New Angeles. 你必須要令威脅值上升至25 , 並且你的分數亦最少要25分才勝利 . 換句說話, 一般企業有機會同時多人勝出, 但如聯邦派勝出則全部皆輸.

由於抽到的目標咭是保密的, 故此玩家並不知道對手的目標, 以及有無聯邦派在遊戲之中. 玩家除了聯邦派都需要鬥而不破, 而聯邦派玩家係未令到自己上到25分之前都不應太隨便發難.



起局牌, 每次遊戲開始時抽一張作起局Setting, 會指示那些區域出現什麼問題, 保持一定變化.




需求牌, 除起始外 , 每隔2個回合就會結算並抽一張新需求 , 指示在下一次需求結算時 , 城市各物資要至少達到需求咭所示的要求 , 任一資源不達標將會令威脅值上升, 每局遊戲會有3次需求結算.



另外 ,係投資咭, 每次每位玩家派2張, 2選1, 用處係幫玩家賺錢,只要係結算時達到咭上的要求, 就可獲得指示的財富 (VP) , 同需求咭一樣, 除起始外 , 每隔2個回合就會結算並重新抽牌.

你的企業可能係專精於保安, 但你今次抽到的投資咭卻是要關於疾病及生產力, 你的能力不可以應付你的目標, 故你需要同其他專精呢一方面既玩家合作才能達成. 同樣, 一些玩家可能抽到關於保安的投資咭, 自然會可能會較傾向支持你的行動.

核心系統:
為應付New Angeles的各式問題及需求, 當前玩家抽牌後, 他必須打出一張方案, 作為主要方案 , 同時會將一張資產咭放進埸, 當方案勝出, 提出該方案的企業將獲得該資產作為獎勵. 當前玩家提出方案後, 下家開始可輪流提出替代方案 , 如果再有另一企業提出替代方案, 他需先棄X張方案牌, X=目前堆在替代方案的方案數, 即是如果較早前已有1個玩家提出了替代方案,你想提出另1個時必須先棄1張方案牌作為代價以取代較早前的替代方案, 如此直至無人再提出替代方案為止.




當確定好主要方案及替代方案後, 從提出主要方案的下家開始, 決定支付多少張方案牌去支持主要方案或替代方案, 給予支持時除了衡量那一個方案可能幫你賺錢外, 亦要留意如果該企業嬴得方案後可以得到的資產咭效果會否對自己不利, 同時更要兼顧有關方案對New Angeles 的需求及各種威脅的幫助, 不能一味賺錢.

而提出方案的企業自己不能支持方案, 故需游說其他企業支持, 甚至可以用財富或資產咭去利誘 , 逐一提出自己所支持的方案後, 就結算誰獲得較多支持, 如下圖 :



主要方案獲得2張支持, 替代方案獲得3張, 提出替代方案的企業勝出, 可獲得資產咭並執行方案上的行動 , 然後所有方案牌棄去, 如打和則由主要方案勝出, 然後下一玩家開始.

不同的資產咭 , 可給予玩家幫助:



遊戲版圖有10個區域, 都標示其生產力 , 玩家需要用方案去將僅有的Android 機械人調到你需要的區域才能產出相關資源進而應付需求.




區域狀態大多以Token標示, 第一個圓形Token為Android 機械人, 有了它才可以進行生產. 黃色紅色係不滿標誌, 會影響生產, 橙色係故障 , 不能生產, 左邊藍色係建設, 令到主要資源數在生產時+1 , 最底的生化標誌係疾病 , 有可能令到威脅提高.



FFG喎,點都要加D figure落隻Game到先似樣啦, 有3種唔同既模型, 分別係人類至上主義, 黑社會及保安, 人類至上主義會加速地區的不滿度, 黑社會就會令該地區的主要資源產出停止, 而保安則用以消滅或驅逐人類至上主義及黑社會.



Figure 比例同Imperial Assault一樣 , 都幾精細.



除左滿足唔到需求咭, 疾病外, 重有一個情況會令威脅上升.




當一個大回合結束後, 要抽一張事件牌, 新的威脅會出現, 如果按上圖, 要在7號區日本街放置1個人類至上主義Figure , 但由於7號區本身已有1個相同的figure , 所以要按版圖所定, 按箭咀由7移到9號區盧瑟福, 但同樣都有人類至上主義  ,於是再移到10區, 雖然沒有人類至上主義在10號區, 但卻有一保安, 故將之驅逐至下一區域"根基".

當任何figure或token被移到根基, 立即移除並增加2點威脅. 故聯邦派在遊戲中的提案或支持要令其他企業忽略New Angeles 的威脅, 令他們以利為先, 最終令New Angeles 被聯邦接管.

遊戲經歷3次需求結算合共6個大回合結束, 每個大回合有3-5個細回合, 視乎抽出的事件咭 . 遊戲規則簡明, 最多時間會花在玩家之間方案提出的互動上, 既要小心留意威脅上升, 但其他企業卻不理情況一心賺錢,理性的你到底要一起瘋狂到爆煲一刻才驚覺如夢初醒, 還是可以同心協力一起溫水煮蛙, 將New Angeles的反抗及危險有序地撫平壓制, 令企業王國可以千秋萬代呢?

總結:
暫玩過一場6人局, 連教學約3小時, 在中後段New Angeles 威脅達到25而聯邦派亦未夠25分而全場皆輸.
如果完整結束估計約4小時, 如再開, 時間應可減少0.5-1小時.

遊戲規則尚算簡單 , 較費時係方案牌的內容及資產咭的效果, 要消化當中出現的利弊, 由於投票你要打出方案牌才能對某一方案進行支持  , 而補牌只能輪到你的回合才補小量牌, 故投票的激烈程度沒有想像中大, 更多的情況是你想支持卻無能為力. 另一方面則表示你要盡量小心運用你的力量.

遊戲有小小類似Battlestar Galactica太空堡壘卡拉迪加, 一樣有身份猜疑, 一樣需要提出行動去應對每回合的危機, 係呢兩方面, 太空堡壘帶出的感覺比New Angeles 強很多亦有趣很多, 由於太空堡壘為解決危機, 玩家要輪流出牌以幫助, 牌以暗牌方式打出, 如果你打算出搞破壞的牌, 你要小心在你打出後, 其他玩家覺得應已有足夠力量應付, 無需再出牌, 在結算時, 你隨時因為沒太多人出牌而令你被察覺可能係25仔, 亦有更多更繁雜的可能性, 無論人類還是25仔都一樣可以利用出牌去猜測, 掩飾身份, 當中的出牌藝術完全不是New Angeles 可比 ,臨場感, 壓力亦完全不是同一層次.

當然,New Angeles的背景目的同太空堡壘不相同, 變成一個商業社會的利益輸送, 在沒有如Battlestar般緊湊的情況下, New Angeles 帶來了各玩家秘密目標, 各玩家的關係就比Battlestar的敵我關係復雜 .

至於聯邦派的25仔, 壓力當然沒有Battlestar 咁大, 同其他玩家一樣, 只係25仔的勝利稍為難一點, 在緊要關頭能否令一些玩家利益蒙蔽雙眼 , 寧願以整個New Angeles去冒險呢? 


處理New Angeles 的危機比Battlestar 實在, 可計算, 玩家之間亦有好多互動, 建議及反建議, 透過威迫, 談判, 各自希望對方會做出對你有利的行動, 甚至利誘, 不過整體上暫睇唔到有很高的策略性.

總體來說, New Angeles 係一隻有著身份猜疑的互動談判遊戲, 身份的猜測係配菜, 玩家之間的互動談判才是主菜, 如期望有陰謀詭計就可能想太多, 感覺係一隻平實的談判遊戲, 遊戲玩法都算新鮮, 雖然方案牌既變化唔大, 但整體上因為人既互動, 針對目標每次不同 ,耐玩度都算唔錯 , 遊戲過程順暢 ,沒什麼無謂支節, 集中度高.

擴展未有消息, 遊戲絕對有空間擴展, 不過感覺不是必需, 除非有重大改變及全新原素 , 否則只豐富現有基礎的擴應該不會對遊戲樂趣有太大改變.

New Angeles 可以稱得上中上 , 會樂意繼續多玩幾次.


主觀評分:3.6/5
客觀推薦: 3/5
策略度:3/5
簡易度:3/5
耐玩度:3.2/5
氣氛:3.8/5

2017年9月12日星期二

Ethnos 幻界之爭


在遙遠的Ethnos 大陸上, 12個古舊種族只餘下6個, 如今, 一統大陸既時機到了, 你能否機智地運用各族 , 累積戰力, 爭霸大陸, 成為新一代 Ethnos 之主, 開創萬代呢 ?



由CMON 出品, 價錢踏實, 配件精美, 內格收納完美 , 可支援 2-6人, 初步來說個人覺得4-5人較佳.



規則非常簡單, Ethnos 分為6個王國, 每個唔同色唔同名.



種族咭 , 共12個族 , 每只遊戲只隨機用其中6個.



每個族都有不同能力 , 能力已在每張牌上, 無需特別去記 , 每個族都有6個顏色, 每色2張共12張, 除了半身人, 有24張, 將所有今次抽到既6個族分出, 然後混洗成一疊. 其餘6個族的牌將不會用到.

然後, 將洗好的牌大約分成兩疊, 將3張龍咭都洗入其中一疊 , 然後將2疊牌合併 , 含有龍牌的一疊置底 ,形成抽牌疊 , 龍必然會係較後時間才被抽出, 一旦抽出第3條龍就會完結1個時代, 遊戲會持續3個時代.



牌準備好後, 就要為場上的區域設定分數, 將分數token 洗混, 每個地區派3個, 然後將分數token 由小至大由時代1開始放置, 形成是次遊戲的區域分數設定.



接著, 按人數x2張抽牌, 將牌公開放在桌上, 隨機一位玩家開始 , 玩家一開始是沒有手牌的, 而每次你可以選擇打出戰隊, 或是抽1張牌 , 由於一開始你沒有牌, 故只能抽牌, 然而, 你可按策略直接從桌上拿取那些剛才公開了牌, 如果不適合就從牌疊中抽牌.



遊戲核心係組成戰隊去衝分, 你打出的戰隊組成必需為:
同一種種族的牌 或 同一顏色的牌.
數量沒有限制, 而因手牌上限為10 , 故戰隊牌數可以為 1-10.
1個戰隊牌數愈多, 分數亦會愈高 , 分數會在 1個時代結束時計算. 正常玩家會打出超過1隊戰隊, 所有打出的戰隊都會計分. 分數如下圖,
以上圖所示有3個戰隊 , 合計 (0+3+6) 9分.



戰隊除了一般計分外 , 你需要為你的戰隊選擇一張牌作為leader, 作為一個戰隊的leader, 你可以執行其特殊能力. 另外 , leader 的顏色會係呢隊戰隊去攻略那個地區的指標.



如上圖, 如果你出左1隊戰隊, 並以橙色牌作為leader , 則代表可以進攻橙色區域, 假設你係黃色棋, 較早前已成功堵加了2個control marker, 如今, 1隊有3張牌的戰隊, 由於多個自己本身的2個control marker數量, 故可成功增加多1個marker.

Control Marker比人多, 在時代結束時可獲得分數Token所示的分數, Age 1,2,3 計分有少少唔同, 不詳述.

當你打出戰隊後, 無法組成戰隊的牌會公開放出來, 其他玩家可以按正常拿取你棄出的牌.

遊戲如此進行 , 3個時代結束最高分數為勝.



一些配件需要你抽到果個族先會需要用到.

總結:
規則簡單, 手牌管理, 有一定策略成份, 要有大局觀 , 運氣亦唔少 , 唔係一隻好好必買必玩既Game, 但因為時間短, 6人都係約1小時, 人數彈性高 , 所有setting都係ramdom, 重玩性非常高, 不同的能力亦有趣 , 係一隻算係唔錯既輕策小品.



雖然話2-6人, 但我覺得 2-3人可能比較悶, 4-5人可提升小小策略性, 6人就稍稍運氣.

主觀評分:3.5/5
客觀推薦: 3.5/5
策略度:2.5/5
簡易度:4.5/5
耐玩度:4/5
氣氛:3.5/5


2017年9月10日星期日

2017年 9月10日 6人局 簡短記錄

是日6人局 下午1點至晚上9點半 , 玩左New Angeles , Ethnos 及Last Night on Earth.


New Angeles 玩到第4回合 , 有人計錯出產量 , 其他人又無清楚覆核, 至需求無法滿足, 全城陷落 , 連聯邦派都差2分才夠25 Capital , 無人勝出 , 整體都算有趣,稍後會出文介紹.



Ethnos  , 規則簡單,  6人之下策略性唔高 , 少D人玩會略有改善,  不過時間短, 約1小時 , 都算OK,  我幾滿意, 有十多個種族, 每次都有不同配搭, 耐玩沒有疑問, 有幸勝出.



配件精美, 最終以Orc爆20分以75分勝出.



最後Last Night on Earth , 做zombie, 玩第一個introduction story,  為增加氣氛, 只教英雄一D基本規則, 但如何將Zombie 擊殺及Zombie有穿牆能力就無解釋等英雄慢慢摸索, 俾佢地更有真實感.



由一開始英雄摸索喪屍弱點, 到變為喪屍挨打逃避英雄追殺 , 到差接近最後一刻我既partner喪屍神擲奇蹟反勝 , 一心對呢隻Game唔大期望, 但估唔到introduction都幾緊湊, 期待下個正式劇本.