知道有D朋友可能果陣都未開始玩BoardGame或者未諗住玩D咁重口味既野,
等我講下目前已知fourth edition 同TI3既分別, 以及有咩注意.
首先, TI3 既外盒好巨形, TI4 相對迷你得多, 而且TI4內建FFG基本上無既收納格,
或有助遊戲SETUP時間.
Twilight Imperium 覆蓋大量原素, 而且都係比較具體程現, 沒有太多簡化抽象, 實感強 , 但亦令到玩家需要處理既資訊量龐大 , 由每回合玩家需從8張不同能力及順序既策略咭開始, 到行動時的先後策略同部署, 不同星艦既能力, 科技如何投資, 預留Command Token作策略行動, 不同行星的價值, 抽到既行動咭, 政策咭, 目標咭 , 各族不同能力 , 有海量內容要處理 , 絕不是一隻輕鬆遊戲, 而且目標咭大多需要直接或間接與武力相關, 各國之間的互動威脅, 不可能在短時間內完Game, 以TI3為例, 如5人或以上, 頭幾局必然需要6小時以上, 一般穩陣要8-10小時, 而完Game 既目標係任一玩家達到10分, 1日無人上到10分, 隻Game都唔會完, 而分係必需主動去爭取, 而唔會被動結算遲早都會完, 所以如果玩家一味打黎打去, 唔係集中係取分本身, 真係可以沒完沒了.
亦因此, 部份玩家可能在中段分數被拉開後, 自覺無望取勝而不斷作純粹阻礙對手獲勝既行為, 又或無心戀戰是旦玩 , 將嚴重影響氣氛, 故適合既玩家係呢隻Game係好大好大既先決條件, 有一班岩玩既FRD一定可以克服上述海量既資訊, 亦可為遊戲加分.
我鍾意玩美式多於歐式Game既其中一個大原因係, 美式Game因為表現較具體, 印象較深刻, 有些回憶同激盪係歐式Game比唔到你.而TI, 因為佢大量既遊戲內容, 玩完一局不論勝負,都有種真係經歷過一場星際爭霸既史詩感 , 可以有足夠回味既價值.
我舊有既TI3己經肢解, 其中我最唔鍾意佢既科技同政務系統, 非常影響遊戲流暢度, 可能其中一D原因係臺面唔夠大, 所以另一個條件係你要夠位玩, 如果唔夠位, 相信對遊戲流暢度同樂趣都有較大影響.
咁講咁耐,TI4有咩好先? 首先我未收到TI4, 只按Rules 同我玩過既TI3比較.
TI4雖然說包含左TI3擴既原素, 但亦削減左D我認為不必要既內容, 如種族司令官, 行星上的探索Token等, 都沒有帶到TI4中 .
而我唔鍾意既科技系統有兩方面改良, 首先關於星艦的科技升級, 會影響到星艦能力數值的科技, 可以覆蓋係玩家版對應星艦位置上, 唔會再好似TI3咁成堆科技放到周圍,你難以記得目前某星艦能力數值 , 當然仍有部份非星艦能力科技研發後係要放係玩家版旁邊,但都已有一定改善.
另一改良係TI3科技鏈, 以前想升級A, 必須先升到C及E, 而升E, 又需先升有G, 玩家需要按科技樹去部署升級, 費時, 複雜, TI4 簡單地將科技分為4大類, 每張科技會註明升級所需要既各類科技前設類型數量要求, 基本上睇顏色就知道是否有條件升級, 無需科技樹, 亦因為無左升級特定一項科技的前設, 升級可能會稍為較TI3自由一點, 可以大大減少玩家升級時的workload, 係既保留有趣的科技內容, 又簡化獲取相關升級的麻煩.
而政務咭, 以往策略卡的政務行動, 玩家可以打出一些政策要求表決, 玩家投票, 有些會影響後續遊戲既規則, 而有關的政策, 有時未必咁有用, 但會打斷遊戲流暢度, 如今, 政務行動不再打出政策 , 而係可檢視2張政策牌堆頭兩張, 可將其置於牌頂或底並決定順序 , 待之後既議政階段再處理, 故選擇政務行動的玩家可以得知將會提交出黎投票既內容及早部署, 亦可將不利的政策移走置牌堆底 .
同時, 議政階段亦不是一定會有, 在遊戲初段, 沒有玩家佔領中間的帝都行星將不會有議政階段 , 故此, 在遊戲未到白熱化既程況下 , 減少議政投票的支節, 可令玩家更集中, 而且 , 修改後的規則, 玩家手上不用再keep 政策咭 , 少樣野消化, 令政務咭性質更傾向於事件咭 ,化繁為簡.
以上兩項既改變, 未必真係可以大為削減遊戲時間 , 但係呢隻咁Epic 既4X太空爭霸遊戲上面, 即使稍有改良都足以令我重新投入TI既懷抱.
除左呢D改動外, 重有其他修改,例如貿易方法, 比TI3更實在, 版塊比TI3略大10%, 可能有助當星艦放置後容易讀取版塊資訊, 太空船廠(兵廠)建築方法優化等總總 , 比我既感覺係FFG 完全明白TI3既問題, 在盡可能保留TI世界既史詩感之下, 優化遊戲系統.隻Game本身既規則多, 但唔算複雜, 玩兩round基本上手.
另外, 人數彈性足夠 , 3-6人都玩到, 以前我未搬都有足夠地方6人玩, 如今TI4為保持有足夠空間, 我諗我最多只會玩4人局, 可能4人局人少D重好玩D, 就算3人玩, 因為夠Epic, 3人混戰都有足夠既過程玩味. 遊戲中有16個種族, 各有特色, 遊戲中重有本書介紹TI背景故事 , 真係未出發先興奮.
所以未入想入而睇完都重有興趣入手既話就出手吧!
