Twilight Imperium 4th Edition，盒的大細記憶中細過TI3，對比於依家愈黎愈誇張的KS Game，唔算係咩大Game了。
遊戲中包含3本書，只需睇Learn To Play都已夠玩9成，Rules Reference就需要時睇，至於最後果本係介紹TI的背景故事。
唔知同我玩過TI3有無關，規則書清晰易明，而且亦有一定的修改，感覺簡單左。
遊戲中如果遇上不明或爭拗點，按關鍵字查找Rules Reference，一般都可快速排解有關問題。TI4我玩過幾次，需要查找的次數都好少。
背景故事，我已經翻譯成中文，想睇下我譯成點可以睇下呢到:https://bit.ly/2U5Y9yK。
TI4包含17個族，每個族都有不同能力，起始星球，起始兵力，部份的兵種能力有差異，每個族的旗艦亦有不同能力。
每個族的背面都有該種族的介紹，不馬虎求其。
將左邊的種族Board加上右邊的Command Board，就可以清晰咁控制自已的種族，Command Board有3個三角形區域，每回合開始時所有玩家要重新配置你的Command Token，第一個Tactic用於調兵，攻擊，建設等，中間的Fleet代表你的艦隊補給，有幾多個Token在Fleet Pool，同一區域就最多可以有幾多架星艦。最後的Strategy主要用於啟動Order Card能力。
至於左邊的種族Board，絕對為TI4加分，以往TI3並無咁清晰的兵種能力分區。所有兵種戰力，能力，清楚俾你同對手睇到。
例如上圖的Carrier，我想將佢升級，佢本身果格右邊已標明你升級的前置條件(需要已經研發2個藍色科技)，當你決定升級後，你將Carrier II的咭復蓋係本身的格子上，就可以輕易睇到升級後的能力(移動力提升到2，運力提升到6)。大大改善TI3對各玩家各兵種能力唔清晰的不足，大大加分。
遊戲過程主要係先從8張Order Card選一張持有，Order Card的數字代表黎緊呢個回合的先後手，Primary Ability係持咭人發動這張Order Card的能力，而Secondary Ability係當持咭人發動這張Card後，其他玩家可以做的能力。
玩家按Order Card的順序輪流做一個動作，例如發動Order Card能力，用Command Pool入面的Token調兵、攻擊、建設。假如玩家已經無野想做或可做就可以Pass，Pass之前Order Crad能力務必已經發動過，而發動過的Order會將其反轉，背面只會顯示出數字。
當所有玩家都Pass，新的回合就會開始。
Command Board的設計都好實用，除左分配Token外，亦可存放貿易商品(交易後才可變成有用資源)，更附有回合流程表，而且Command Board係雙面印製，左右皆可使用，隻Game佔用空間唔細，有時唔適合放某一邊轉放另一邊都可以，我覺得係好貼心的設計。
遊戲地圖，每次遊戲的面貌都由玩家逐步推砌而成，所以每局遊戲都會不同，只有中間的帝都行星位置係永恆不變。除左星球之外，重有空白的星空，不能通過的超級新星，要研究某種技術才能通過的小行星帶，以及可以縮短移動動離的蟲洞等天文面貌都會在版圖中帶來地型效果。
隻Game海量的棋子，分為6個色支援最多6個玩家，不過造型上我比較鐘意TI3。
棋子分為10個單位，包括旗艦(只有一隻)，無畏艦，巡洋艦，驅逐艦，運輸船，戰鬥機(無入鏡)，戰鬥恆星，船廠，防護炮同陸軍。
行動牌，可以提供特別的行動，奇襲等。
政務咭，我認為最唔好的一Part，不過係TI4已經將佢大大改善，政務咭現在要等到帝都行星被佔領，並且會在回合結束先會進入政務階段，咁做可以減少前期各勢力唔大，政務影響少處理黎都晒時間的問題，第二係唔會再由Order Card觸發，減少係玩家小回合中突然要跳出黎處理政務的問題，大副增加遊戲流暢度。雖然政務仍然保留在遊戲中，但佢既缺點已經消退，各族要坐埋一齊處理政治問題，拉隴對手的優點開始顯現。
星球咭，當玩家佔領一個行星就可獲得該星球咭，一個星球會有2項資源：資源及影響力，資源主要用於建設興兵，影響力主要用於政務投票。另外部份的星球會有某類型的科技優勢，可減少科研的研究前置需要。
另外，玩家過程之中可能會有好多承諾，例如我唔會打你，你放心去打邊個邊個，但口講無憑，遊戲中加入左協議咭，每個玩家都有4張協議咭，係需要時按不同需求可以交換協議，令大家的口頭承諾變得更有約束力，令成隻Game的外交作用變得更有力。
遊戲按之前的介紹一路落去，直至任一玩家成功獲得10-14個VP為之勝出，VP的獲得例如係佔領對方首都，成功支付X點影響力，X點資源之類，間接反映緊你的國力，所以遊戲未必需要完全透過戰爭去獲得勝利，但迷信和平必定會負出代價。
總結:
遊戲我玩過4次左右，但面積所限，最多只開過4人，每次都覺得滿意，遊戲一洗TI3果種漫長、複雜的感覺，雖然唔係真係有太大既改動，但成隻Game感覺簡單易玩好多，TI3好既野都有傳承，同時將唔好既野改走，黎到第四代，已經無咩可以挑剔。
我見有人用TI3黎比，或者諗買TI3定4好，有D外國玩家會覺得TI3都有吸引的地方，但我覺得如果你係住係香港，唔好玩啦，一定係TI4，首先TI係一隻長Game，我玩TI3真係8粒鐘都好似睇唔到盡頭，TI4 4人既話最快6個鐘完到，慢既話7個鐘都見到埋尾，而且唔會覺得辛苦，TI3去到尾真係好倦。
而且TI4係兵種能力表達遠比TI3清楚，比如我想打你，我無理由打你之前叫你讀晒你咩兵升左咩級，咁你咪知道我有準備攻你的圖謀，而且佔用面積大，所有升級咭無一個好的方式放出黎真係好混亂，依家我想打你，我望一望你個表都心裡有數。
另外政務Order Card的修改絕對係改得好，我都係因為佢改我先決定買入。但無受過TI3呢個問題影響玩新玩家就未必有咩覺得加分。
TI4呢隻Game既規則，現在比我既感覺好純樸，無咩花巧令人驚奇的設計，簡單D講我覺得個規則好『舊』，但經過不斷的演化磨合，流程順滑，要擲骰有擲骰，要有策略有策略，要口水外交亦有，規則襯出黎的是玩家為重心的遊戲過程，Epic不在於遊戲本身，係在於玩家在遊戲中可以成就的偉業，帶領自已的種族，稱霸銀河！
如果有心入TI，不論TI3幾錢，都唔好入TI3，有TI3心郁想轉既，又會玩到既，絕對建議轉，無玩過而想玩既，首先如果你接受到係一隻長Game，有機會比人圍比人打到反艇甚至被完全消滅(完全消滅機率唔高)，中等文字消化量，接受到骰運可能係某D戰爭入面有大影響等，較多原素要處理，而又鐘意大規模戰爭，斷斷逐逐的攻伐，睇到自已的科技成長，與敵人對抗時一目了然雙方實力的差距，有趣的外交關系變化，多樣化的種族能力，TI4我絕對推薦，對我黎講，TI4已經非常接近我想要既戰爭類遊戲，縱使未完全相同，但縱觀多年所推出的遊戲，TI4已經達到我既要求，買入TI4既時候，我同自已講，TI4會係我呢類遊戲中最後一隻入手。
主觀評分：4.6/5 (難得一見的戰爭類遊戲)
客觀推薦: 3.5/5 (未必可接受過長的遊戲時間及相對繁複的規則)
策略度：4/5 (雖有骰運，但整體行進達至勝利，策略必不可少)
簡易度：2/5 (Setup、規則講解、文字消化需時、亦有唔少細位)
耐玩度：4.5/5 (17個不同能力甚至玩法的族，每次不同的地型)
氣氛：4.8/5 (叫骰，奇襲，變化多端的外交關系，密謀已久的行動)
