自製戰棋

幾年前無意中發現有D 1:72的兵仔, 造工都唔錯 , 當時打算自製戰棋, 但因為不同原因慢慢又掉低左 , 估唔到過左咁多年呢個 Dark Alliance 系列重有繼續出, 個模既細節亦有提升 , 範疇愈黎愈多 , 加上多年Boardgame生崖 , 隨住FFG半收檔既狀態 , 新桌遊俾我既新鮮感同滿足感愈黎愈少 ,  口味都愈黎愈窄 , 硬係覺得D Game呢到差D果到D差 , 唔係話D Game唔好玩 , 但就達唔到我自已心目中既完美。

而且買左咁多年Game , 好多配件可以左拎右拎 , 整整埋埋都唔輸蝕 , 於是今年又再開始收集Dark Alliance 系列既兵仔, 經過大半年既感受 , 點整既方向大致定落黎 , 依家會慢慢測試調整數值 , 能力之類 ,最終會唔會有正式完成唔知道 , 但過程都幾有趣 , 特別係呢D兵仔幾吸引。

本身未用呢個系列整之前重趁Amazon賣既Runewars有特價掃左1k返黎整，又趁Discount買左盒Massive Darkness諗住用入面D棋黎整，果D棋會大隻過Dark Alliance， 細節亦都更好，但最終種種原因都係放棄，決定全力用Dark Alliance黎整會好D。

Dark Alliance(Light Allaince) 系列有好多不同既種族，大部份取材相信黎自魔戒，有興趣可以睇下呢到：http://theredbox.com.ua/alliance.htm

唔少造形都好吸引，係佢出埋牛頭人、黑騎士(戒靈)、炎魔之後真係忍唔到，好想買黎玩下佢，由於本身佢唔係for特定既Game，你可以自已用其他rules玩，我就諗住整隻簡單規則可以solo既戰棋自high。

一盒有32-48隻兵(步兵) , 騎兵一盒就大約12隻 , 拆件之後要自已整個底, 相信呢種size既棋通常都係俾人當 tabletop wargame , 本身我都想行呢個方向。

▲逐隻黐 , 連拆連黐1set整大約1個鐘左右

整好晒之後，因為佢本身預設既色每次盒盒都可能有分別，預你自已上色，我就是旦油單色算，容易分到陣營。

規則大綱有日心血來潮就已經諗好，係油好之後就作再D數值，能力俾佢就可以測試下感覺下個feel。

▲▼早期測試

由於佢大致上一就只有弓，步兵、騎兵，要買不同既set整合佢地，顧及每個種族feel既一致性，希望每個族至少有4-5個兵種。

測試其實我覺得幾順利，但我既目標係收納面積少、簡單、容易開、有指揮空間，係呢D限制之下，覺得咁整有少少失控。

係諗既過程經常諗可以用Battlelore 既系統做底去設計，但因為我已經有全套Battelore 2nd edition 、唔係好想整個類似好似取代左佢咁。

但經過反覆考慮後，由於想收納空間少，容易開係一個幾大既重點，決定轉用Battelore 系統去玩，整體會有好大C&C系統影子，但會改下一D我覺得唔好既位。

目前仍然係摸索階段，要平衡運氣、趣味、直觀同策略空間，但至少可以解決收納同容易開既限制。

除左兵種設計同規則大綱既改進外，因為改左用版圖去玩，兵種既多樣性既重要性增加左，所以要增加現有種族兵種數量，希望增加至至少5-6種。

種族設定方面暫時有6個、名就暫時起住先，左起：

東方部落(72050)：擁有特殊金屬合成強勁的兵器，防禦及攻擊力較佳，騎兵弱、需要陣列發揮、擁有石化能力的獨眼巨人(72054)為其特殊兵種。

混沌荒原(72049)：(參考Warhmmer的混沌)北方的嗜血部落，有不同的獸類兵種(牛頭人72047)加持，近戰強大、騎兵弱、俗化炎魔(72036)為其標誌性兵種。

死靈族(72012)：經典不死族，死者再生及同化為其特長，單兵及遠程攻擊弱，巫王及死靈騎兵(72055)為其特殊兵種。

精靈族(Caeser Elfs II)：高等精靈族，樹林可提供優勢，遠程兵種較強，兵種相對靈活，共同生活的半人馬(72046)、樹人(Runewars)及巨弩(Ballista 28mm)為其特殊兵種。

矮人(72007)：經典矮人族，強大防禦力，擁有軍樂團造成陣列提升對戰能力，騎兵弱，擁有強大的特殊遠程武器(大炮、連珠炮、火槍手 未搵到適合)。

獸人(72002+72003)：原始獸人族，單兵能力較弱，團戰加上大猶長助陣可以發揮戰力、狼騎兵(72010)及原始巨魔(72032)為其特殊兵種。

正在組軍既係正統人類，以洛汗+剛鐸為參考。

我諗最終全部完成仍然有一段時間，主要睇返相關模型搵唔搵到/出D咩新野出黎同現有既組軍，普通的步兵單位已經無咩作用，希望有更多有吸引力既兵種。

Aliens: Another Glorious Day in The Corps 戰報

最近玩返D買左排無開過既Game，今日玩玩異形，之前玩過1次獨立關卡但感覺幾唔好，今日決定再試過故事模式睇睇如何！？

睇之前可以睇睇異形續集Trailer先：

https://www.youtube.com/watch?v=bTCaVjQ8nU4

先玩第一關，故事就如異形續集咁一開始主角同班小隊黎到呢個失聯的殖民星LV426，但發現上面完全無人唔知發生咩事，就係呢個時候，佢地發現似乎重有人生還，於是就入去拯救生還者。

任務目標要搵到LV426上的唯一生還者小女孩 Newt，佢會隱藏係四4個位置之一，其他3個位置就有機會係異形。搵到之後重要安撫佢，成功就會可以控制埋佢一齊離開，如果呢個小女孩死亡或所有隊員死亡都算輸。

(圖中4個圖形之一就係小女孩位置。Token既設計同電影入面既追蹤器一樣，幾有feel。一開始就直入去搵第一個Token係空白，而另一個就係Newt，之後用左1個回合幾個人去安撫終於成功帶埋佢走，係左右都有異形但我地重火力掩護下0威脅安全完成任務，呢關只可算係教學關。

我心諗，唔通真係咁無聊？同我上次玩獨立關咁好似無咩威脅無咩緊張。於是點都繼續試落去啦，準備第二關，係故事模式下，遊戲過程有機會令你出現Discard，而discard既牌一部份會係之後既關無得再用，用以反映你既資源量，無充份準備既攻擊，某些異形出沒牌，某些工具都有機會令你discard，小心控制資源係本遊戲其中一個賣點，但我玩既獨立關卡時完全睇唔到呢個賣點。

第二關係講大家都知道呢到有異形，我地需要離開，但主角Ripley與一眾部隊失散，部隊需要走到Ripley區域的撤離點離開，而Ripley身邊只有無攻擊力既Newt同弱雞Gorman。故此幾個士兵就要靠自已突圍，而Ripley就守到幾耐得幾耐。勝利條件係被困的士兵任一成功撤離。

右上角既就係4位被困士兵，要撤離需要走一大段路，而路途中會經過幾個異形出沒點。4個士兵都配備護甲同頭盔，火槍、重機槍同配備手槍。

一路上雖然有6個異形蹤跡，不過都算容易解決。去到接近2號出沒點時再遇上一批異形。就在此時，異形行動階段抽到通風口，異形由通風口爬出直撲玩家角色(我選Ripley)，Ripley突然被攻擊。

下方的士兵係火槍無雙既情況下都無遇上太大威脅，逐漸打通去路，但隨住更多異形由通風口撲向Ripley，Gorman都出去幫拖，但火力不足，最終被異形活捉！

Ripley臨危不亂，走返入去室內再加固入口，希望籍此吸引住異形唔俾佢地走去追殺下方的士兵，爭取更多時間。但加固並不穩固，異形太多入口被突破！

Ripley眼見入口被突破，立即與Newt撤出逃脫，剩餘的士兵們要靠自已了。

剩餘的士兵逐漸被異形追上，位置較窄大殺傷力火槍使用不容易。不久就有人被擊倒，但士兵們不放棄繼續向前推進，終於1個隊員不敵被殺，而更多的異形繼續追上。本身Ripley的小隊主要透過休息去將用作子彈的咭補充，現在Ripley已經撤離，而士兵們沒有足夠的空閒去執行休息補充消耗，子彈愈黎愈緊張！

士兵不顧一切突圍誘敵，由重機槍手負責清路，由於同一回合中的命中率會因為你開槍既次數愈黎愈低，機槍手要用大量既彈藥(Discard)才能成功清路，最終再多1個隊員陣亡。

最後，係死亡2個，1個被生擒既情況下過關，而60張既彈藥則消耗左13張(在下一關不能再使用)。

結果有D意想不到，原本諗住都係輕鬆過關，似乎太輕敵，現在有3個選擇：繼續進行第三關，或進行唯一一次的資源搜索關卡、或進行拯救任務，嘗試將Gorman救出。

以我目前的想法，我認為直接進行第三關似乎會較好，一來進行其他關卡都可能會有損耗，二來Gorman戰力較弱被捉應該唔會太大影響？至於資源搜索，暫時消耗左60張中的13張，感覺唔算太多，而資源搜索任感覺並不像去超市可以輕易補充，除非有特別的裝備需要補回，但目前應該可以應付。會盡快打埋再寫感受。

2022/6/19 總結：

唔記得左補返，已經係大約半年前完成主線關卡同一場Bug Hunt，最終感受係唔得，隻Game本身既可塑性應該唔細，但唔知係play test太少定點，愈玩愈似單調版Zombicide，以呢隻Game既格局，應該可以設計得更有深度，可惜無論手牌資源設計，異形攻擊方式，異形的威脅，裝備卡既設計，都係半桶水既感覺，除左精美既模型外，唔太有異形果種壓力同恐懼。

異形會不斷出現，一大堆追住你，但威脅太低，異形亦太易死，唔知似乜咁。

最後一場關卡已經太耐，唔太有印像，基本上我係直接跑去終點結束，無咩威脅下完成。

最終感想係失望透頂，你當買模型有特價買或者可以，當Game玩感覺係晒時間，呢個規格下設計唔應該咁無趣，完全浪費隻Game。我已經睇過不下3次Rules以確定有無玩錯，但就算有都好都係非常輕微，對於整體感受唔會有大影響，唔明點解BGG會有7分，

評分：☆
策略：☆
簡易：★
耐玩：☆
歡樂：☆
(5星最高)

一年2個月無寫

其實呢2年真係提唔起勁寫、今年買左D新Game都無動力睇Rules，睇頭兩頁就無晒心情，不過最近的起心肝開開局玩下D Game，終於睇晒Civilization : A New Dawn，玩左局5人，隔兩日再睇埋Fallout Boardgame再Solo左次。

提唔起勁寫，亦都提唔起勁買，一來心情影響二來新Game唔太吸引。年頭買左Fallout同Civilization 擴，重有隻 Richard: The Lionheart同Aliens：Another Glorious Day In The Corps，呢2隻都係未睇說明書。

不過少買Boardgme就入左D之前買過既1:72模型兵仔黎砌下兵，隨便油下唔洗用腦，可以有一刻既抽離。

今年都有開過局，去朋友到玩過Nemesis同魔戒，魔戒打爆左Core既第二關，玩完自已都入左魔戒，目前諗緊入唔入埋隻大擴Shadow Path，細擴入左1個，但心情問題，仍然糾結。

感覺開始衝破左呢大半年黎既困局，黎緊應該會寫返多D，暫時應該會寫下Fallout the Boardgame同Civilization : A New Dawn。

早兩日亦入左Spector Ops同Game of Thrones Iron thrones 同擴Wars to Come。期待Spector Ops好玩。係咁多先。