2020年7月4日星期六

Sid Meier's Civilization: A New Dawn 新擴展即將釋出

幾個月前廢紙價$170入手的 Sid Meier's Civilization: A New Dawn ,估唔到FFG即將於7月7日會宣布推出新擴展,據消息指將會支援第5個玩家,10個新Leader,其他原素因為我仍未正式開過都唔係太清楚代表咩野,目前圖都無一張,主題係未知世界:Terra Incognita。



不過呢隻當日大特價的Game竟然可以有擴出重新翻生,會唔會代表FFG覺得SW已經去到一定地步要放返D資源搞返其他系列呢,例如Battlelore 2nd Edition,符文戰爭第三版,TI4的擴展等等,黎緊可能將有更多新消息,希望有更多驚喜。

30/7 FFG In-flight report : 只講我關心既Game,Star Wars Armada,終於有多D Clone War既野睇到,Squadron 既造形好似唔太吸引,但戰艦就幾吸引,另有Update Pack將舊版update去新版,似乎可以混埋一齊玩。

Twilight Imperium 4 帝國曙光出擴,Prophecy of the Kings,支援到8個玩家,加1個新兵種機械人,應用於登陸戰,更多的版圖版塊新增7個種族每個族新增3個Leader,售價$100美金,相信正式出大約HK$500左右,估計應該會有更多其他內容未公布,但暫時睇落都係TI3擴既內容,唔算吸引

最尾最尾Show左個立方體盒,傳聞的Descent : Legends of the Dark終於露面,但賣晒關子,完全唔知係咪Descent 3,感覺咁大盒似Gloomhaven 或者 Legacy D frd,不過咁大盒咁Epic應該未必會收,除非真係超驚喜

今日會有隻未公布既Game會公布,唔知會唔會係report入面提過定係提都無提既Game呢?


講返最近好想搵隻易handle既戰棋玩,對Wrath of Kings既玩法幾有好感,不過一來已經無出,二來佢個Base好麻煩。

諗諗下覺得冰與火之歌戰棋或者Runewars戰棋可以改成類似Warth of Kings玩法,雖然我覺得Runewars背景有趣D,但始終已經停左,冰與火持續給力Support,有足夠的旗手、英雄、指揮官、一盒Core已經夠料俾我改睇完FFG無類似新野就唔等了決定入手ASOIAF黎玩,收到再講下想點改玩法。




2020年5月11日星期一

Western Legends 西部傳奇


玩家扮演19世紀美國西部的傳奇人物,在未開發的土地上揚名立萬,你可以係呢個充滿可能的世界上面選擇自已的人生,做一個平凡的放牧牛仔,閒時淘淘金幣,成為一個儆惡懲奸受惡人所懼怕的模範人生、定係將你的裝備武器改做得金光閃閃,令自已成為地表最強的神槍手,還是壞事做盡,唯一底線就係唔做好事既匪徒?係西部傳奇呢款遊戲入面,你可以試試不同的人生。

遊戲版圖集中於黑岩鎮及紅瀑鎮及其周遭地區,玩家遊戲中會係呢D格子上移動並執行相應行動。版圖中各個標記代表該格可以做的行動,例如商店買裝,銀行兌換金塊,賭錢、嫖妓、淘金、套牛等。



遊戲中有12個角色選擇,最多支援6個玩家,玩家選擇其中1個進行遊戲,每個角色都有不同起始裝備,亦有不同的背景描述及秘密目標。



遊戲中有13個模型,特別之處係部份角色不能夠好好配對到角色咭,遊戲亦明言只需隨意選擇你喜歡的模型,再將與你玩家版面顏色相配的底座套上模型即可。即係可以用蓄鬚既角色但選女性外觀的模型,(估唔到隻Game連變性都可以滿足到!)

其餘未被選用既角色將會被分配成為警長(啡色)及匪徒(灰色)。



每位玩家都有一張厚咭紙的玩家面版,玩家將角色牌、裝備、錢、金幣等放係版上面,清晰又有條理。



按說明將其他配件都設置完畢就可以開始遊戲,遊戲以不同的分數設定出長中短遊戲,短局15分,標淮20分,長25分,一旦有玩家達到該分數將觸法最後回合,所有玩家會再完成最後一個回合,才進入最終結算分數。

每回合開始時,玩家選擇拿取$20 、拿取 $10+1張撲克牌、拿取2張撲克牌。然後開始該回合,玩家每回合中可以有3個行動:移動最多2格、使用撲克牌上的能力、與同格另一玩家決鬥/搶劫、執行該格子的特別行動。
完成3個行動後回合結束,下位玩家開始他的回合。

遊戲入面既動作都離不開一個目的就係跑分!

而遊戲其中一個主角:撲克牌,共52張,就如同一般撲克牌一樣(即係買西部傳奇送啤牌),用途有三,一個係使用牌上的能力,可以創造不同的優勢。二係用於與NPC或玩家之間的戰鬥。三係賭錢時用。



地圖上有很多不同的標記,每個標記都有其獨特的特別行動。



比如上面的黑岩鎮,水桶代表商店,接鄰的3格都可以進行物品購買或升級物品的行動,錢代表銀行,可以將金塊兌換成現金或者打劫銀行,咭牌代表賭錢。

不同的行動都有佢賺分的可能,例如淘金可能會淘出金塊(擲淘金骰),再將金塊拿去銀行兌換,每換一塊就+1分,賺到既錢又可以去嫖妓($30換1分)。



進入有匪徒既位置則需與之戰鬥,獲勝又可獲得1分!不論勝負該匪徒移出版圖。而當你身處係其他玩家的格子,你可以選擇行動同佢決鬥(勝利可得1分、搶劫(勝利可搶得其金錢、金塊及牛)、或者如果你已經有警官點數,就可以運用你既逮捕權去逮捕佢(勝利獲得1警官點數)。



遊戲另一個核心係警官/通緝點數系統,玩家如果打劫玩家、銀行或者偷牛,就會獲得通緝點數,而警官點數就要通過運牛、逮捕去獲得。

一位玩家不會同時獲得警官及通緝點數,一旦警官突然去打劫就會衰失所有警官點數,而通緝點數的玩家是不能獲得警官點數的,由於通緝的玩家比較容易被針對追捕,所以通緝點數的玩家每回合結束會取得其對應的分數,而警官點數則要待整個遊戲結束才會結算,故此做好人既玩家一旦選擇玩警官路線通常唔會改變,而通緝的玩家一旦被捕,通緝點就會消失,成為一個普通人,可以從新選擇善惡。



上圖當你的通緝點達到7,你每回合結束就自動有3分!只要唔俾人捉到,爆分不是夢。



而同樣警官去到7要待遊戲結束才會獲得3分,但進程中亦有唔少錢或分數獎勵!

除左各種行動外,遊戲中亦有事件牌,事件牌同時會有2個進行,玩家可以自由參與。只要有參與,當事件結算時你就有份選擇/獲得相應的好處/獎勵。而最後一個去令事件結算的玩家重可以移動警長,所以通緝的玩家應該要把握做最後結算人以令警長唔好被其他玩家操控去追捕自已。



視乎玩家人數,事件會有不同的結算需求,當你完成事件的需求就放一個你的顏色的Token上去標記。



事件牌會有背景描述,中間的獎勵(通常無參與的玩家就會無得益),補充之前被移出的匪徒,及移動警長。

除左以上常規行動可獲得分數外,每個角色有4張秘密目標,完成會獲得傳奇標記,標記背面係1-3分,在遊戲結束時才公開,加大其他玩家對自已勝利與否的不確定。



值得一提的物品架,需要自行組裝,遊戲中的物品就係架上的9種,如槍械、坐騎等:



部份物品可以再俾錢升級,增加威力,獲得專稱及最重要的分數:



另外賭錢亦係一個有趣的行動,當一個玩家選擇賭錢,同一個鎮既其他玩家都可以付$10參加,然後所有參與賭局既玩家或者如果無玩家參與的話就會有莊家與玩家對賭比牌型大小,最大的玩家就可獲得至少$50及1點分數。重點係賭局是可以打出玩家本來的手牌,即是玩家可以有預謀先預備好一些較有優勢的手牌才參與賭局,勝利的機會更大亦令賭局並非完全的運氣,連賭神都可以玩埋。



總結:
呢隻Game一開始聽得最多就係自由度大,其次就係可以嫖妓,感覺好似可以重演西部電影果種無王管,縱橫天下的感覺,但實際上嫖妓只係一個格子洗錢換分的動作,並沒有更多的細節!而自由度由於版圖並不真係好遼闊,從銀行行去淘金一個回合就可以做到,下次就已經可以返去銀行兌錢,所以隻Game雖然話自由度大,但實際上相互競爭跑分的壓力不少,你沒有真係太多的閒情逸致做無謂野,而且,遊戲所有動作都係指向分數,果種係西部歷險的感覺好低,物品牌亦只有幾款,事件牌亦被富上策略性,故事性缺乏。

所以如果你當佢係一隻西部式歷險遊戲就會係錯(我本身以為係),其實佢更似一隻工人放置遊戲,但就加入左唔少不能操控的成份,如撲克牌或者被其他玩家打劫。

遊戲玩過2次,原本聽過話人數太多會太長同版圖太迫,我覺得重點係對手,如果大家都玩平穩的警官路線,隻Game步調應該比較悶,互動會低,一定要有人行通緝路線先可以將隻Game提味,只要有識玩並且會玩通緝路線的玩家,競爭就會大大提升,一般諗住做平民既人都幾難贏,而警官就同通緝必定對立,但係如果你追唔到佢你的警官點數就衝得唔夠通緝路線快,而玩通緝路線的玩家心水一定要清,知道要留咩牌,幾時要搏打劫銀行,只要佢打劫就有3點通緝點,雖然呢條路係難行,但爆起分上黎只有警官路線可以追到。

我既感受係高期望,玩完第一次之後有D失望,第二次玩體會到另一番味道,分數又回升不少,雖然唔係我諗咁既口味,不過遊戲的互動性唔低,撲克牌的能力有時可以創造到一D奇蹟,加上搶事件牌的結算等,都有唔少有趣的過程的,缺點係遊戲規則如此簡單,行動亦不算燒腦,但時間比較長,因為有大量的對戰、賭局等,雖然我暫時未覺得太大問題,但相信新鮮感退卻的話呢個問題可能會慢慢發酵。

遊戲陸續推出擴展,稍後會有一個大擴,如果時間唔係太大問題,我覺得都可以一玩,我覺得遊戲唔算好突出,不過整體玩落流暢,舒服,悅目,亦有唔少笑位,亦有策略地善用你每回合的3個行動的空間。

稍後如無意外會補埋2個細擴,其中會有更多鼓勵玩家互動(戰鬥)的原素。

主觀評分:3.5/5  (尚算有趣的遊戲)
客觀推薦: 3.5/5  (既有策略亦有運氣,既有搞笑又不失思考)
策略度:3/5  (要成功贏得遊戲,必需善用每個行動,風險與策略要適時取捨)
簡易度:3.5/5  (唔需要太詳細講Rules,亦有清晰的玩家輔助表)
耐玩度:3.3/5  (似乎有多種路線,亦有多個角色選擇)
氣氛:3.8/5  (一齊賭啤,搶人錢,睇住人俾警長追都幾有趣)




2020年3月8日星期日

又買Game

1月買左4隻Game未玩晒,2月買左隻推理事件簿,從未買過一隻要用App玩既Game。


我個人對隻Game興趣不大,不過對桌遊零興趣,聽1分鐘規則就會訓著既太座竟然有興趣,一來佢對推理一直有好大興趣,二來隻Game無咩Rules無咩字所以就想試試,暫時玩左2個簡單劇本,的確係簡單,但都部份過唔到,一黎諗得佢太複雜,二來無咩心機睇入面既對話,集中唔到,以致整體唔係好投入到個案情,所以暫時感覺一般,用App玩係有新鮮感,但整體唔係覺得有咩大突破,遲下玩埋先再講。

然後呢個月,記得CMON出左個時光機Kickstarter,可以買返以前出過KS Exclusive 既貨,然後就終於忍唔住買左HATE,一盒千頭有成百多隻模型,2 set board配件,再加上好多token都係膠化,感覺好精緻,知道隻Game戰鬥上好似好luck,戰鬥好似無咩複雜規則,加上CMON D Game一向俾我既感覺都係賣模型多過遊戲設計,所以雖然吸引但又擔心遊戲性,諗左2日都係忍唔住俾錢,連埋3D地型一齊買,但唔知幾時先收到貨,希望5月。



我對遊戲性期望唔大,但我希望可以稍為House Rule例如我想所有figure有3hp,而有toughness 既角色就再+2hp 或者 要骰出2劍或1個 wild 才算被命中。減少角色1hit就死好似太過骰運既情況,不過收到再算。

另外隻Game本身個board同3D地型我本身都想買黎用係其他Game如Warcry,既然隻Game本身有2 set board就不如成隻Game買啦!

呢大半年真係無咩心情詳細寫Game,是旦寫下舒發下算,遲少少希望會加密返寫啦。

2020年1月21日星期二

新年前買Game

最近買左幾隻Game分享下。

呢半年都無點睇Game,最近終於初四約局,即刻睇下Amazon有咩Game,本身無咩心水,點知睇到Zombies!!! 呢隻Game N年前我玩過MidEvil,但感覺好麻麻,風格有D難頂,但今次見到比較新版既Zombies!!! 3rd Edition,價錢唔洗$200,竟然有成百隻喪屍,而且有4個造型,地圖美功都有進步,感覺都幾精緻,而且重可以6人玩,互相陷害,重有好多擴,所以就決定入手,但要買滿$400先免運費,於是就再係咁睇,專睇平Game,後來就見到隻 Civilization a New Dawn,呢隻Game由一開始出都已經留意,不過一開頭見佢有D卡,會以為類似Transforming Mars 咁既機制,因為唔想有咁多字消化,擔心效果太多樣化玩家之間要睇黎睇去咁好煩,就無再深入研究,點知見佢賣$170,分數都幾高,先知原來用到既卡唔多,而且係固定,似乎可以好集中係個Board到對抗對手,於是立即入手,再買多少少野就過$400出貨。




出完第一批,貨未收到已經忍唔住再睇下有咩其他好野,又發現到隻History of the World,只係賣$150,發咩癲,廢紙價,呢隻Game既AH版想買好耐,但果陣已經絕版,新版出果陣對D棋改左設計就唔大吸引,遲遲無入,依家賣$150就果斷入手。



買完呢3隻Game,仍未收貨,依然未止痕,尋日睇到條片講Western Legends,感覺唔錯,立即入手,價錢就$4xx,不過可以6人,再加上似乎幾大自由度,類似感覺既Merchants & Marauders 系統行得太慢,呢隻6人應該都係3個鐘左右,可以接受,而且都多擴,希望好玩。

玩完再寫下呢幾隻Game,好耐無試過咁有滿足感,而且4隻Game加埋唔洗$1000,實在抵玩。