三國群英錄

三國 一個歷久不衰的題材 但套用在桌遊上卻不甚多見 

如今 呢隻區控三國群英錄又如何呢？先開箱睇睇~

三國群英錄係一隻大陸設計既遊戲，該公司主力做兒童向既桌遊，無意中比我發現到呢隻Game，雖然佢做開兒童向，但都俾佢個畫風吸引，而且感覺呢隻相對無咁兒童，遊戲支援2-4個玩家。外盒比一般FFG方盒再大一圈。

開盒先見到規則書一本，及武將功能牌介紹書。

規則書排版清晰，好有外國桌遊既標淮。

所有係本遊戲中出場既武將及一些功能牌的背景都有所介紹，可以對小朋友加深三國的認識。

之後就係版圖，非常厚實，每個區域都有佢既特有資源，遊戲結束時玩家霸佔了相關資源可以獲得對應分數。

然後就到主角，武將！遊戲總共提供40個武將，每個勢力有10位，除魏蜀吳外，另有群雄選擇，個個武將立牌造形各異，而且畫風都幾唔錯，唔算太中二、色情、浮誇，而又不失霸氣。

武將之後可以睇到遊戲收納格，實用既收納格，煩少樣。

4個勢力既玩家面版，武將牌及各32張勢力專屬謀略牌。

每次遊戲，玩家隨機從自已的勢力抽5張武將，再從中選擇3張武將使用，其他武將將不會進場。(不過我就咁睇覺得可以改為如果有武將陣亡，該勢力可以抽2張選1個新的武將上場，增加新鮮感。)

將武將立牌插係底座上面，每個底座有數字1-5，視為其兵力/生命，可以轉動，插既位置設計無問題，正常唔會因為咁樣整爛武將的立牌，但底座的轉盤有小部份較鬆，可能係玩緊果陣會無意轉動到數值，可能要自已稍後整整，但整體問題不大，不過我收到既呢盒，其中一個轉盤無數字，無法補件亦不能再買1套，唯有遲少少自已畫返上去。

每局遊戲玩家會秘密抽取目標卡，雖然目標卡數量唔少，但都係類似，例如你佔有最多人口資源在最終計分時+5分，而另每有2個河流+2分，每有1個山脈+1分，大同小異。

每個勢力的武將都有專屬的武將卡，卡上亦有佢專有既能力，以及發動能力所需要的(士氣/氣)。

每次如果攻陷一個領土可獲得2分，而擊敗對方的武將則加3分。當任一玩家達到該局所需的結算分數，遊戲就會結束，結束後再逐一檢視目標卡，將全部分數加埋以判定最終勝利者。

除左武將，每個勢力亦有士兵，士兵以cube代表，武將佔領土地時亦可以從自身的兵力每減少1個，就可以為地方增加2個守軍。

一開始所有玩家只有一個起始領地，其他地方都被中立勢力控制，要逐一征服。

每個勢力的32張謀略牌都有部份不同，例如蜀國就有桃園結義，三英戰呂布等。卡牌質量都幾好。

每個勢力的player board可以俾你放晒3張你正使用的武將卡(以及氣)，而且亦有位置可以放置分數，當4人遊玩則以12分為結算時刻，而2人時則需15分。凹槽設計令我超預期。

遊戲專用骰，用以斷定命中，回復氣等等。

總結：

遊戲我尚未玩過，遲下玩過再寫，暫時感覺都係簡單，入門級既程度，如果唔係同小朋友玩，頭一兩次玩應該都有一定趣味，但重開就未必，不過感覺遊戲有可塑性，或可自行作一定修改以加強策略感。

三國區域控制加上武將不就是三國桌遊應該行既方向? 但一直未見有面世，如今終於出現，即使感覺未必太適合，但都忍唔到入手。不理會遊戲性黎講，$170HKD既遊戲質量交足功課，整盒Game除左個底座略嫌可以再加強外，整體都好有一隻正常外國桌遊既質量，係大部份桌遊都係MIC既情況下，大陸自已理應可以出到高質量既遊戲，今次我覺得硬體已經好合格，而遊戲性可能係下一個需要克服的關卡。

如果呢隻Game有野心，可以透過出擴去進一步提升隻Game，話唔定可以做到下一隻武將瘋雲錄呢種傳奇。

講下最近買咩 / 想買咩Game

呢排感覺少左集中係Boardgame ，主要係無咩好吸引既Game ，同埋有其他類型既遊戲如劇本遊戲、COC、設計中既戰棋、繼續跑Gloomhaven、MOM等等，都令我少買左BG。

睇返對上一次買既Game 係2/3月，買左Heroquest 、Wildlands、Betrayal at The House on The Hill、Disney The Haunted Mansion、星際武士(Starship Samurai )、本身有買埋Northgard ，但俾完錢無貨要我等、自從過左呢幾年，我真係好唔鐘意等、唯有退錢買第二樣算。

幾隻Game目前只係開過3次Heroquest，一次係玩佢既原本設計，其餘2次都係同女友玩各自設計既任務，無論邊種，感覺還好，但又唔會好好玩，可能係對手問題，遲下會再開，佢既擴價錢都幾吸引，但未試真就唔買住。

Wildlands同新版Betrayal at The House on The Hill 都幾有興趣快D開，但一直未有適合時機。

跟手最近買左召喚師世界 2個族，高等精靈同黑晶矮人，暫未體驗。

然後呢幾日睇到隻大陸出既三國群英錄，幾吸引我，可以最多4人玩，分別有魏蜀吳以及群雄4個勢力。每個勢力有10個不同既武將，以及各有無記錯32張策略卡，各自係版圖攻擊對手，係一隻輕策區域佔領遊戲，最吸引係佢不同武將既立板，每次玩你可以選擇3個武將，裝上底座進行遊戲，無論係武將立板，板圖本身，策略咭等等美工都做得好吸引，但我猶疑一來呢間公司本身出開親子遊戲，呢隻估計唔會太多層次，二來對大陸Game仍然有保留，但我既印象已經停留左係好多年前，最終決定買入試一試。

暫時未收到貨，到時可睇睇打返篇開箱文。呢隻Game如果簡化黎睇，其實同另一隻我有興趣既泰坦國度係咪差唔多呢？都係最多4個國家(唔計泰坦國度第5勢力擴)，都係淨打無咩內政，都係出卡打，即管睇睇。

而係買呢隻三國群英錄前一日，本身係Amazon見到諗住買Okko Chronicles Cycle of Water，對佢N年前相同背景既OKKO Era of the Asagiri念念不忘，不過了解過後，隻Game好似要消化好多字，最大鑊係佢法國公司翻譯英文好多甩漏，感覺我無咩心機會對返正再開，又唔知係咪真係好玩、可惜。

當晚就買左另一隻2年前想買但無買到，依家出左全集加修訂版既三國殺戰棋。

本身我對三國殺都幾反感，除左最原始copy bang既三國殺版本之外，之後果D都無玩過亦無興趣，不過佢出戰棋感覺終於有返D創意，但棋既質量令我猶疑，加上佢D技能效果其實不容易理解，字眼難消化，可能除非你玩開三國殺，否則文化有一定落差。

而俾我睇到佢出既全集: 臻藏版，首先將戰棋改晒做籌碼，解決本身戰棋質量問題，其次出左咁多擴之後做左技能修訂再平衡，字眼亦應該更統一，版圖亦改為紙版，加上個盒都幾靚仔，就買入試試，大全集包晒基礎同擴，共超過60位武將，同200張咭，如果真係做得好又好玩，咁既陣容真係有排玩，暫時未收到，等我試試再打遍文。

三國始終係一個好吸引既主題，以前玩三國武將瘋雲錄玩到傻，今次呢2隻三國game又如何呢，竟然有久遺既小期待心情。