Battles of Westeros 維斯特洛戰役

"When you play the game of thrones,you win or you die,there's no middle ground" - Cersei Lannister

改編自小說 A Song of Ice and Fire 冰與火之歌，FFG出品，類似Battlelore既戰棋遊戲，重塑各大家族既戰史，Core Set包括兩大家族，Stark 史塔克對上Lannister 蘭尼斯特之間的戰役。

遊戲供2人對戰，而最新既House Baratheon擴展加入左多人對戰既規則。

隻Game依然有Battlelore既字眼，但其實有唔少改進。
遊戲包含138隻模型，之前一直對呢隻Game有保留係因為見到Lannister既騎兵同步兵模型好似瘦瘦削削，感覺唔討好，而且模型需要玩家自行用膠水與底坐貼合，否則非常容易掉落，所以玩之前都需要時間做勞作。

以下的介紹會比較詳細，因為想比有興趣既朋友更了解遊戲的運作，我覺得遊戲係比Battlelore Second Edition或Memoir'44等更好的。

▲Stark部隊，有5個指揮官，當中有Robb Stark，Eddard Stark等角色。32隻步兵(8隊)，騎兵12隻(4隊)，馴犬者9隻(3隊)，弓箭手12隻(3隊)。

▼Lannister部隊，亦有5個指揮官，包括Tywin 及 Jaime等。矛兵24隻(6隊)，騎兵15隻(5隊)，重步兵9隻(3隊)，弓箭手12隻(3隊)。

全部士兵我用AA膠大約2個鐘頭完成，唔會好困難，相對處理Samurai Battles輕鬆好多。
每個指揮官的造型都唔同。實物係手之後，之前負面既感覺大大減少，雖然比Battlelore Second Edition既模型比會有距離，但我覺得都算滿意，用AA膠貼合後玩過幾場未有剝離既問題，過程亦唔需要特別輕手對待。

遊戲與以往的Battlelore類似，兵類有分顏色，綠色機動最高但攻擊力及護甲弱，相反紅色的移動最慢，但攻擊力最高。Core Set入面原本既旗幟並不如上圖般，係用一支塑料棒上面夾住一個紙造的Token，又大又唔美觀，而且好似容易掉落，所以FFG後期出左個Expansion內有44支旗以給玩家取代原有既Token，一盒($6X-$8X)正常已經夠用了。

旗的作用係標示該部隊是否已經行動過，所以一支旗兩面顏色分為黑及白，假設呢個回合白色代表可以行動，面向自已的白色旗則代表可以命令，對手就會睇到你可行動的部隊旗為黑色。不過我覺得呢個方式好似比較煩，又要將隻棋轉黎轉去，我直接放個Token係已經行動過既部隊格子上更佳。所以旗既目的對我黎講只得返用黎識別部隊等級的作用。

遊戲的命令部隊方法，較以往Battlelore及Memoir'44大有改進，亦都係我鐘意呢隻Game既一大原因。遊戲取消了左中右的設定，玩家會拿取一個Command Board，根據遊戲設定，你會獲得一定數量的Command Token，將Token放係Command Board上備用。

▼Stark 及 Lannister Command Baord 及 中間用於判別誰可贏得打和情況的Momentum。

指令分為兩個部份，先講下指揮官的指令，玩家不同於Battlelore般，由公家的指令抽取命令咭，而係每個玩家會擁有獨立的指令咭，雙方會拿取10張基本的指令咭加上指揮官指令咭，混洗成一疊，玩家每回合只會由其家族的牌疊抽取若干數量的指令咭。

▼基礎指令咭，每個家族各有10張，任何戰役都會用到。

▼指揮官指令咭，與基礎指令咭一樣牌背，每個戰揮官都有5張其尊屬的戰揮官指令咭，戰役中，有份參戰的指揮官的指令咭就會洗入基礎指令咭中成為一疊。

遊戲時，指令咭不再主觀地由你打出命令，而係需要在戰場上的指揮官打出，指令咭的影響範圍為2格距離，即是說，當你打出"Order 3 Units"的時候，不再理會戰場左中右，而係睇返指揮官附近有什麼部隊可以給你指揮，當你選定了其中一位戰場的指揮官打出指令咭，你需要從Command Board支付一定數量的Command Token到你的指揮官咭上。▼

以上圖為例，指揮官身上已有一個Command Token，他每回合最多的Command Token數為2(左下角)。簡單地說，即係佢每個回合最多可以Command他範圍內的部隊2次。

除左指揮官下指令外，玩家亦可直接向單一部隊下令而無需理會是否在指揮官的範圍內，亦即指揮的第二部份：
每回合玩家擲出依據戰役設定所述骰，拿取對應擲出的結果的Order Token。▼

遊戲用上8面骰，其中綠色3面，藍色2面，紅色1面，拳(Valor)一面，旗一面。依據擲出的結果拿取相關數量的Order Token待用。

所以遊戲中，玩家可以
1A)使用指揮咭，透過指揮官打出命令，一般一次過指揮多個部隊同時行動。但需要在指揮官的2格範圍內(Zone of Control)方可被命令。部份咭可以將已經行動過的部隊重新轉為待命並在同一Round入面稍後時間再次被命令。
1B)或任意打出一張指揮咭並支付1點費用，以在ZOC中指揮一個部隊。
或
2)使用Order Token，直接對戰場的部隊命令，每次只能對一個部隊下令，但無需考慮該部隊的位置。綠色的Token命令綠色的部隊，Valor可命令任意部隊。
旗可以透過-1士氣去將已經行動過的其中一個部隊重新轉為待命並在同一Round入面稍後時間再次被命令。
2B)或令士氣+1。2個相同的Token可以任意指揮1個部隊。
或
3)PASS。
玩家輪流執行以上的行動直至選擇Pass，當雙方都Pass就會進入下一Round。
玩家最多只可保留1張指揮咭及1個Order Token。

所以一Round入面，你的全部部隊都有可能被命令，而不再好似Battlore般單靠一張命令咭只能命令左中右或部份的部隊行動，令到戰鬥時的指揮更有實感。玩家你一步我一步，睇住對手的Order Token，手牌量及Command Token數量等，戰術考慮大增，係我非常鐘意既其中一點。

▲士氣條及回合條，遊戲加入了士氣的原素，根據戰役設定，有機會因為士氣太低而立即輸掉遊戲，但目前未試過呢個情況。當你綠色的部隊被消滅，你會降低1點士氣，藍色2點，紅色3點。當一方的士氣降低相對對手的士氣就會提高，此消彼長。每回合結束時，玩家有機會可以恢復一些士氣，例如你的士氣為綠色圈的7，回合結束時就可恢復至綠色圈的4。

黎到遊戲的核心，戰鬥：

戰鬥一樣透過擲骰檢視視否命中，戰力可以透過士兵參考咭去睇返，不同的士兵有不同的能力，如Advance(推進)，Pursuit(追擊)，Heavy Armor(重甲)等等，似Battlore 2E。

戰鬥核心：

假設紅軍命令騎兵首先攻擊白色中間的弓箭手，就會放一個Engagment Token與攻擊的目標中間，代表此2個部隊正在接戰。如果紅軍的矛兵之後攻擊接戰中的弓兵 或 白軍的步兵或馴犬者攻擊接戰中紅軍的騎兵，就代表Flanking Attack側擊。

側擊時無需再放置Engagment Token，直接擲骰，擲後可以選擇其中一個符號的全部骰重擲，加上原本的結果，令到命中提升，加強接戰中的部隊被夾擊，分身不下的情況。此外，如果接戰中的部隊(不論主動接戰或被動)移離或攻擊另一個部隊時就視為脫戰，會被與他接戰的部隊先進行一次追擊(Parting Blow)的攻擊，所以要小心決定是否進行接戰。

另外，正常情況下，部隊不同於Battlelore 2E般，部隊不會反擊，除非如上圖白軍的弓隊的位置，只要他接鄰著兩隊友軍，則他會獲得Stalwart效果，可以進行反擊並且無視一個旗的效果。但白軍的馴犬者及步兵則沒有Stalwart效果。故此，如何布陣抗敵又多一層考量。

除左說明書外，另有一本Battle Plans 包含10個預設戰役。

地圖Baord印有A/B兩面，B面較細，A面較大，其中A面應較Battlelore 2E的地圖寬及長兩行，深度足夠，係我鐘意既另一個因素。

▲隨機戰役咭，除左預設的10場戰鬥，遊戲中附有2張隨機戰役咭，玩家可先依據指示選擇你想用既指揮官，再隨機用兵力兵種牌生成此戰役的兵力。然後輪流布置戰場，士兵等，然後就可以開戰了！簡單方便，有玩家覺得呢個方式會有唔Balance既情況，例如果係一D勝利條件，但我覺得好易可以House Rule到，至於兵力既唔Balance，就當作考驗吧，不竟一場戰鬥所需時間唔會好長，大家都係for Fun既情況下唔需要太介意，實際上又有幾多場真實的戰役雙方的兵力係Balance呢？

▼Stark的隨機戰役咭，用此咭選定的指揮官將不會再成為隨機兵力，而一般選擇愈強的指揮官你就等於放棄愈強的兵力，此設計已經有一定程度上的平衡：

遊戲還有不同既Token如燃燒標記，各式地型，橋樑，木欄等，不一一詳述，指揮官本身亦有不同的能力，但每場戰鬥中只能使用一次。

總結：
如果你本身對Game of thrones有興趣，又或鐘意冷兵器的戰鬥，鐘意模型戰棋但又唔想太復雜既戰鬥，嫌Battlelore;Memoir'44等不符現實的指令方式，呢隻Game絕對推薦。
以上就係我推薦呢隻Game既原因，有兵種，兵種各有不同既能力，攻擊力移動力又可輕易調整，有將軍，將軍又有能力，指揮的方式，戰鬥的方式及強化不少的實感，依然不失簡單，遊戲時間唔長，甚至自已自設戰役Solo自娛都有樂趣。遊戲排除了左中右的設計，對戰場設計有更大彈性。

壞的方面：模型始終唔係非常好，較Battlelore 2E有距離。模型要先進行貼合才能遊戲。規則書有唔少錯誤或唔清晰的情況，需要玩家再查FAQ或其他玩家的答案，小部份咭內容有誤，需要根據FAQ修正，FFG到目前為止出了5個小擴，1個大擴，但已經係2012年既事，未知重會唔會出。Battlelore 2E雖然目前未有如BOW般好，但擴展在後，仍有望繼續改善。

如果你已經有Battlelore 2E咁重買唔買BOW好呢？如果你好鐘意玩呢種System既戰棋又鐘意個背景，嫌B2E太簡單無深度，又會有時間玩既話建議入。

如果你有BOW重買唔買Battlelore 2E好呢？除非你好鐘意奇幻背景，否則可以等等Expansion正式推出再決定，從BOW去到Battlelore 2E，你可能會覺得除左模型外，在戰鬥過程的實感及戰略考慮會大為下跌。

2隻Game目前俾我最大既差別係Battlelore 2E既樂趣係可以自行組兵布陣，Battles of Westeros就係戰鬥的過程。

期望FFG會繼續出BOW，BOW Core Set國內曾出過中文版，但不久該公司似乎已經結束了，市面亦難搵到中文版的BOW，不過遊戲中需要的英文實在唔算太多的。

Solo戰報1：http://talkboardgame.blogspot.hk/2015/09/battles-of-westeros-2sep.html

評分：★★★★☆
策略度：★★★★
簡易度：★★
耐玩度：★★★
氣氛：★★★★★
(5星最高)