2015年6月24日星期三

Dead of Winter 死亡寒冬


好似係近來少有的連續2日出Post介紹遊戲,今次係大熱既死亡寒冬 Dead of Winter。
生死抉擇的生存遊戲!(Ok!)

遊戲講述喪屍橫行的世界,一群人到達左一個避難所,但不同團派組成的人群都各自有佢地相信既事,例如我認為除左大家合作挨過呢個逆境之外,我亦都要從中儲備定足夠的食物,彈藥,燃料等等,以在日後可能用得上,又或者,你覺得呢個避難所已經夠安全,除左一齊挨之外,你重想要將呢個避難所變得更安全,成為一個可以安身一段長時間的要塞,你群人的目標就會係加固避難所。總之,遊戲中除了一個共同的基本過關條件外,每個玩家所控制的一群角色都有不同的秘密目標,如果你最終無法完成,即使過關你仍視為失敗!

遊戲支援2-5個玩家,在此略述遊戲流程:
一開始先決定今次遊戲的共同目標(背景)。



▲遊戲中共有10張共同的目標,背面係高難度的設定,一般來說,所有玩家都需要維護主要目標,否則即使個人目標達到但主目標失敗仍然視為失敗。

選擇後有如Mansion of Madness般,先說一段對應的故事背景。

然後,每個玩家抽取一張秘密目標卡,依照規則將一定數量的一般秘密目標及一張背叛者目標洗混,然後每人派一張,多出的移出遊戲。所以遊戲唔一定會出現背叛者,但由於大家唔知道對方的目標,所以就算係為左普通目標去做一D行動,都仍有機會被視為背叛者。

▲秘密目標咭,左邊係一般的秘密目標,右邊係底部標記為背叛者的背叛者目標。

如果你抽到的係背叛者目標,咁你的主要目標就係要令其他人失敗!(佢地唔配生存係呢個世界!This is my World!My World!)

然後每個玩家拿取4個角色並從中選擇2個,遊戲有30個角色,各有不同的能力值及特殊效果。



▲部份角色咭。右上角的數值為影響力,一般較低會較為不妙,中間的係攻擊力,數值愈細愈強,第3個係探索能力。

玩家一開始會有5張起始物品,然後玩家都各有一張玩家表,將你的成員,行動骰,隊長等按指示放好,遊戲就即將開始!

一開始所有的角色都會身處於這個避難所中:
▲避難所亦有多種功能,如回合記錄,士氣,食物,棄牌堆(垃圾堆)等。

回合開始時先揭示一些危機咭,遊戲有20張危機咭牌,各有不同的解決的需求及失敗的後果,玩家們應盡量在本回合中解決危機,否則會對整個團隊帶黎打擊。而解決危機在稍後再說明。
▲部份危機卡。新的危機會在每個回合開始時揭示。

▲玩家表左右都有一個欄位,用以保存行動/未行動的骰子。

所有玩家同時擲骰,骰數等於1+角色數,所以一開始會擲3粒骰,將結果保留並將之放到玩家表的左下角"未使用的行動骰"欄位中備用。
起始玩家可選擇角色去做一些行動,行動一些需要消耗骰子,一些不需要,包括:
▲玩家可以選擇的行動,如攻擊喪屍的話,玩家需要指示一個與喪屍同一位置的角色,如該角色的攻擊能力為2+,你在你的"未使用的行動骰"欄位中選擇一顆等於或大於2的骰子,放到已使用的欄位中,該角色即可執行一個攻擊行動。而不需要骰子的移動每回合每個角色只可移動一次。另外玩家可攻擊其他玩家的角色以搶奪其他玩家的咭甚至將角色殺死,在此不詳述。

遊戲除左避難所外,當然要四處搵物資去完成自已的目標,應付每個回合的危機,以及食物的消耗。但係在喪屍橫行的世界,四處亂走一定會有危險!



▲6個可以探索的區域,右上角的符號代表可以從中搜尋得到的相關物品的機會,中間的虛線圓圈代表區域的容量(角色上限),下方生化的圖案代表喪屍的位置,當沒有空間再放新的喪屍,每隻沒有空間放的喪屍令到該區域入面影響力最低的角色會立即死亡。

每當玩家移動及攻擊喪屍後都需要擲曝露骰,以判定角色在相關行動有否受傷。一旦角色有3個受傷標記就會死亡!
▲一般受傷,角色獲得1點傷害。

▲雖然沒有物理的傷害,但外面太凍(抱歉..有名你叫,死亡寒冬)角色凍傷,獲得1個凍傷標記,角色如有凍傷標記,在回合開始時就會增加一個傷害標記。(慢慢步入死亡!)

▲好簡單,唔洗放標記,因為即時被咬死了!而且死亡的角色會將病毒傳播俾同區域影響力最低的角色,該角色的玩家可以有2個選擇,1)立即殺死被傳播的角色以阻止傳播,或2)為被傳播的角色的擲曝露骰,如擲出空白,角色無事存活,如其他結果,則殺死被傳播的角色,另再傳播到另一個影響力最低的角色,繼續以上流程,可以出現嚴重後果。

每次有角色死亡,士氣就會下跌,遊戲中如果士氣跌至0,除叛徒外,其他玩家都輸。
幸好,一般的傷害都可以以藥物治療。

玩家到達區域搜尋後,可抽一張咭,每個區域都有20張咭,種類都不少。玩家要為解決危機,為著不同的行動搵適合的物品,如果抽到的物品覺得不適合,可先保留,然後繼續搵,每次再搵都會發出一些噪音,放置一個噪音標記至該區域,如果玩家覺得搵到適合就可以從中選擇一張,其餘放回牌疊底。
▲部份物品牌。你可以會搵到新的角色加入,你的團隊成員可以增加。

▲噪音標記,一個區域最多可以放4個,但可能會吸引喪屍到來!
當玩家搵到合適的物品可以進行危機捐繳,將你想捐繳的物品面朝下放到"危機捐繳"的位置,捐繳張數不限。而為了成功,損繳適合的物資數量要至少等於玩家數,但一些玩家為了自已的目的,可能會損繳一些不適合的物資。

▲所有玩家行動完結後,危機就會被解決,將所有捐繳的物資洗混後翻開,每張適合的+1,不適合的-1,上圖為例,危機需要食物,假設遊戲為5個玩家,則需要有5張食物牌,但上圖屬於食物的牌只有4張,而且裡有2張是不適合的物資,4張適合減去2張等於2張,當然是失敗了,玩家們會得知有人搞破壞了,但目的是什麼?誰人搞破壞呢?

另外,在回合結束,每2個身處在避難所的角色,包括只有影子的無助者角色,都要消耗1點食物,如果不足,就會出現饑餓!

▲9個角色身處於避難所中等食飯。


▲4個食物,1個饑餓標記,每有一個饑餓標記,士氣就會減1,而且饑餓標記不會被移除。

另一個可以令士氣下跌既情況,就係每當玩家使用過物品(除了捐繳),都要棄到垃圾堆中,身處避難所的角色可以清理垃圾,每次最多3張,但當在回合結束時,若垃圾堆的牌每有10張就需要減少1點士氣!(垃圾比喪屍更恐怖)
▲垃圾堆

除了上述的幾個重要行動外,還有一些較鎖碎的行動就不詳述,但還有一個較為重要的行動講講,就係流放玩家:

如果一個玩家被嚴重懷疑佢唔止為左自已的個人目的而係叛徒,又或者叛徒自已搞破壞,不斷指控另一個玩家為叛徒,係玩家的回合中,該玩家可以發起流放玩家的投票,所有玩家都有一票,同時投贊成或反對,如果流放通過,被流放的玩家角色如有身處於避難,他要選擇任一區域移往,移往的過程也需要擲曝露骰(OMG!),被流放的玩家抽一張流放咭。

▲流放咭

抽取流放咭,視乎你的身份,你的秘密目標將會有所改變,一般來說,如果你不是背叛者,你的勝利方式相對你係背叛者時會簡單一些,如果你係背叛者,一般會要求你做更多的事,增加你勝利的難度,所以叛徒應盡可能暗中搞破壞,不能明目張膽(或明張目膽)!

而如果玩家們流放了2個玩家都不是叛徒的話,士氣就會立即歸 0!


遊戲中玩家們為了保命,不斷為左團隊及自已四出行動,難免會有死傷,難免有自已的盤算,如果太私利,又會被人懷疑,而重要既係你不知道身邊果個到底係人定係鬼,所以遊戲應會係充滿懷疑的態度下進行。

另外,每個玩家回合前,另一位玩家會抽一張Crossroads Card,係一件有機會會係當前玩家打出的事件咭,咭會指示玩家何時打出,可能係話當玩家搜尋時,或者係當玩家身處避難所時等等,當前玩家或所有玩家都要為該等事件作出一些決定或投票。

▲Crossroads Card,大大加強遊戲氣氛。

總結:
首先呢隻Game既評分非常高,而且都出左一段時間,已有一定時間驗證,好多人會對比另一隻身份猜疑遊戲Battlestar Galactica 太空堡壘 卡拉迪加。太空保壘係我覺得唔錯的遊戲,而死亡寒冬的確有不少較太空堡壘好的地方,例如規則無咁繁複,時間可長可短,除了共同需要維護的目標亦有各自的秘密目標,相反,卡拉迪加如果你並不是克隆人,你通常都會全心全意為團隊行動,但感覺又的確有D呆板,而且在多次遊戲後我發現,克隆人就算被指控,甚至唔做什麼破壞,人類都係比較困難,但純粹以感覺而言,兩者都有危機需要處理,但卡拉迪加作為克隆人做破壞時的行動更有張力,如果卡拉迪加可以稍為調整人類既難度以及克隆人被發現後會有更多的懲罰,以及簡化一些規則細節,可能我仍然覺得加拉迪加更好一些。

純粹講返呢隻Game,小弟暫只開過一次,係叛徒,目的係要收集4件裝備,並且令到士氣為0,遊戲為長劇本,需要生存8個回合,頭幾個回合所有玩家都全心全意去做,我就扮野,呢樣又話無,果樣又話得一張,某D唔緊要既位就落力幫手,主力就係警局同油站係咁搵裝,直至到尾3回合,當時我係該回合最後一個行動的玩家,我只有2個角色,將佢地全部送到油站佔位後,食晒佢地既儲糧(可以增加行動骰的點數),亂用咭(增加垃圾),亂捐繳(令危機發生),一下只將士氣大副降低,但因為第一次玩,時機有D失算,士氣未到零,而且我亦未集齊4件裝備,我當時打算就算我被流放都可以霸佔油站以最終獲得4件裝備,但最終,我被流放了,我搵一張流放咭,我的流放咭係「寬恕」(WTF?)目標改為要保住遊戲的主要目標!!

由搞破壞到要守返住佢地,好我覺得仍然有機會,但士氣已經降到1,此時一個玩家觸發了Crossroads Card,Card既故事係講佢有D心裡既抑鬱,佢會點樣去處理佢心理既問題呢?我地係選用可選規則中,以引導式既方法俾果位玩家決定(即唔俾當前玩家知道佢選擇後的後果,純粹引導佢可以選擇什麼)佢選擇了一個比較灰暗的心態,結果佢吞槍自殺,佢一死,士氣減1,遊戲結束,所有人皆輸!


▲文字量大,加副圖養眼,注意:配圖與本總結無關!

死亡寒冬有唔錯的主題感,而且玩家可以選擇既行動不少,但規則都算簡單,無太多無謂浪費時間的支節,成功融合團隊合作,但又可能各懷鬼胎,我覺得係受電視劇The Walking Dead所啟發,「Fight the Dead,Fear the Living」,如果本身無猜疑遊戲,呢隻絕對可以選擇,但你話係咪去到極緻,我暫時又唔太覺得係隱藏自已的身份與目的又太大既壓力,呢個位我覺得唔夠卡拉迪加,而且未俾到我想一開再開既感覺,只能夠說遊戲流暢,各方面都合格,但實在又唔算係非常巧妙。但當然,遊戲核心未必係猜疑身份上,呢個可能只係配菜,主菜係大家能否渡過不同的難關,遊戲有不同既難關選擇,又有大量角色,物品亦都算多樣化,耐玩度不成問題,又有一大疊既Crossroads Card,的確係心機之作。

I recap in Chinese,我暫只玩過一次,可能有D位都係未玩出個味來,但Crossroads Card俾我既感覺有D怪,俾另一位玩家抽以隱藏幾時會被觸發呢個設計係好的,但為左增加遊戲感,你唔俾果位玩家知道結果,呢個方式當然有代入感,但始終有一日會記得,而且部份咭的一些選項如果你知道結果通常都唔會選擇,慢慢就只係變左一張普通事件牌?(你玩過一次唔好講咁多野住啦)OK就留待時日的驗證吧!

24/8 : 玩過3次之後既感想,遊戲的確係OK既,不同的秘密任務的確為呢類身份猜疑的遊戲增加一個層次,但係,個人而言,又覺得壓力不足,與BSG太空堡壘做賽隆人出古惑時既感覺,大大減少左玩弄其他玩家既感覺,而且BSG人類方因為途生已經非常困難,始終希望排除出賽隆人,令到要找出叛徒既動機大增,而DOW就俾唔到呢種感覺我,玩家們更似自顧自去做自已既任務,都未必咁好氣去推測其他玩家是否係鬼,而且,DOW中唔一定會有內鬼,成隻GAME更加似係大家在同一時空但各自修行的RPG遊戲。

不過,如果以情景代入遊戲黎玩,唔當身份猜疑係主菜既話都不失為一隻唔錯既遊戲黎既。

評分:★★★
策略:★★
簡易:★★
耐玩:★★
歡樂:★★★★

沒有留言:

發佈留言