Tide of Iron : Next Wave 鋼鐵狂潮

Tide of Iron Next Wave

遊戲背景相信都唔洗多講，話說係1939年……(下刪幾十萬字)…英美等為首的盟軍係1944年6月6日法國北部灘頭登陸，開闢西歐第二戰場，向德國柏林推進的各個小規模戰役。

呢隻Game係8年前FFG推出的同一款遊戲，1A Game在獲得版權並為遊戲作出一定更新後再次推出。舊版係同StarCraft the Boardgame，WOW，TI3等等一樣大既長盒，但新版只有魔鎮驚魂，戰爭之道，符文戰爭等這樣的尺寸，不過內容物似乎更有吸引力。

遊戲有3本說明書，第一本係邊玩邊學既入門規則，第二本係正式規則，第三本係包括9個劇本既戰役設定，以往並非咁樣分割，新出版商告知咁樣會更易明白同更快可以讓新人入門，不過小弟覺得，寫得有系統既說明更加重要，我建議如果有玩開戰爭之道，Memoir'44甚至Conflict of Heros，Combat Commander呢類戰棋應該唔需要睇第一本，因為佢講D唔講D，一次過睇第二本更好。

可能有好多人都想知呢隻Game既深淺度，會唔會好復雜，我咁樣做個比較：
由易至難：
M'44 > 戰爭之道 > Battles of Westeros > Tide of Iron > Conflict of Heros

佢的確稍稍多D資訊，但又唔係復雜到死，亦唔係非常講究史實，佢既定位係俾鐘意二戰背景，嫌M'44 太易，又覺得成行成市果D二戰戰棋太復雜，只想深入少少，真實少少既玩家，正正就係我呢種喇！

遊戲不同於M'44 果種地圖，而係有12塊非常厚實，底面不同既版圖合併成不同既戰場地貌，所以戰場可大可小，想輕鬆打一場小型戰鬥又得，想大規模接近營級戰爭都有可能。

除左地圖，亦有一些供玩家自設地型的板塊，更具彈性同耐玩。

小弟最鐘意既德軍，戰車有Stug III 三號突擊炮x4，Panzer IV 4號坦克x8，Tiger 1 虎式坦克x4，Sdkfz 251 半履帶車x6，歐寶卡車x4 ，不過我就對Stug III與4號坦克的比例有小小唔鐘意，覺得Stug III太細，而4號坦克又大左D，都說服自已幾日先接受到。

美軍戰車，有M4A1 Sherman 雪曼坦克x10，M10 驅逐戰車x4，M3A1 半履帶車x4 以及GMC CCKW卡車 x4。同樣覺得雪曼有D大，不過都尚可接受。

德軍步兵，底座有四4個孔，選擇戰役後，玩家可以按戰役的兵力供給數量，自由編制每一個班既兵種數量，將選好的士兵插入去就可以進行編制，步兵選擇有5個，軍官，一般步兵，精英步兵，機槍小組，迫擊炮小組5種。

美軍都係一樣，不過不同既兵種數量兩軍有些小不同，例如德軍的精英步兵有18人，美軍只有14人。底座顏色不同有兩個目的，不同色既隊目在戰役故事中為兩個不同的團隊，另一個用途在於支援3-4人遊戲，2人遊戲並沒有功用。

新版的遊戲商說改善過模型底座，我無舊版比較，一開始都有D擔心會唔會唔耐玩，不過目前又未見有問題，模型都幾有質量，唔會容易出現斷裂。

部隊要插係底座的原因係因為在同一格，可以最多有3個班存在，所以為分別不同的班就需要插係底座以分別。

玩法(概述)：
選好戰役後，玩家依據指示併好地圖，拿好兵力，按自已喜好編班(大賣點)。
按設定先後手，然後玩家輪流執行一定數目的行動，行動的數量一般已於定於設定中，所以並唔同戰爭之道，M'44等要用咭去驅動部隊，而且，雙方會輪流為各部隊執行行動，完成行動後會放置一個閃電標記(Fatiguted 疲乏)在部隊的旁邊，以示在本輪中已行動。一直輪流行動至所有部隊都行動過。

這與一般C&C系統指令部隊有好大既分別同更合理，有時C&C系統既戰棋，有些部隊可能由開始至完場都未行動過，甚為奇怪。一些重要的位置的部隊卻不斷行動攻擊直至死或者無咭先會去命令其他部隊，我認為係非常唔好既設計，但呢隻Game就無呢個問題。

▲Fatiguted 疲乏 部隊

玩家既行動有以下多項，對每個部隊每輪只能選擇任一執行：
移動 (根據該單位既移動力進行移動。)
集中射擊 (根據該單位既火力進行射擊，其他友方部隊亦可參與支援，但支援單位火力減半。)
移動射擊 (單位移動後射擊或射擊後移動，但火力減半，而且友方部隊不能支援射擊。)
攻擊 (單位進入敵方的格子中，進行埋身肉博，雙方各自打出火力，命中較多的一方勝，輸的一方需要撒退到接鄰一格。)
啟動策略咭
準備開火 (讓單位進入預備開火狀態，當任一敵方單位移動時進入射程，預備開火的單位可以進行攻擊，有機會阻止目標單位的行動。)
疲乏 (讓單位進入疲乏狀態。)

以上就係遊戲既核心，玩家輪流為單位選擇以上的行動去完成任務，當中我最鐘意佢 準備開火 呢個選項，準備開火除了在玩家的行動中可以被選用外，在大家既單位都執行完行動後，玩家可以立即為下一回合的單位部署 預備開火 ，你可以諗下對方下一個回合會移動什麼部隊，指派其中一些部隊以 預備開火 既狀態鎖死一些戰略位置以防敵方突破，特別係如果你用機槍單位，機槍班可以在 預備開火 狀態射擊後仍然繼續保持住 預備開火 而無需變成 疲乏。非常有威脅。

▲美軍一隊 預備開火 狀態的班。

玩家在射擊時，可以選擇用 一般射擊 定係 壓制射擊。
一般射擊命中的話會導致目標單位損傷，想擊殺目標時一般用這個選項。
被射擊的單位就會在底座拔除被命中的士兵，由被攻擊方選擇，而機槍組及迫擊炮組都只視為一個士兵。

壓制射擊命中則會令單位既狀態變成 被釘死 或 混亂，甚至將該單位一次過瓦解，這個選項較有戰術性，因為你未必能夠一個回合擊殺目標，但你可以使用壓制射擊去令目標無法行動，因為目標一旦被釘死，如果無行動過的話就會變成疾乏狀態，如果命中得夠多甚至會令目標混亂，混亂的單位需要兩個回合才回復正常，而且混亂中的單位再被命中就會被瓦解，該班兵全軍退走。

不過，壓制射擊不能以非班兵單位作為目標，例如坦克！(你用步槍怎麼射也不可能壓制到一架坦克吧！)

▲被釘死的美軍班兵，被釘死的標記翻轉就是混亂。當被壓制射擊並造成1-2個命中就會變成被釘死，3就會變成混亂，4的話就立即瓦解。如果已經被釘死，則再被命中1-2會變成混亂，3就會被瓦解。最後如果本身已經陷入混亂，再被命中1點就會被瓦解。

▲裝甲單位則不同於步兵，被命中後不會立即死亡，取以代之係用損害標記，類似上面被壓制射擊的狀態，1-2輕微損傷，裝甲及移動力-1，3嚴重損傷，裝甲-1，不能移動，火力減半，4則被擊毀。

▲兩架雪曼坦克攻擊一架4號坦克，由左邊的雪曼執行"集中射擊"的行動，另一架雪曼則支援，雪曼攻擊機械單位火力為8點，支援單位的火力減半則是4，合共12點火力，在正常距離時，命中為5及6。故此共計命中為4點，但是，4號坦克本身有裝甲4點，另外在樹林中提供掩護，另外獲得2點防禦，故共計有6點裝甲。無論情況，防禦需要5及6才算作成功防禦，故4號坦克有2點成功防禦。 命中(4)減防禦(2)=2 ，則代表最終命中2點，4號坦克被擊中並且輕微損傷。

另外，除了基本的5個兵種，遊戲中亦有多個特殊部隊標記，例如反坦克部隊，火槍兵班，醫療兵等等，可以有不同既技能或戰力，令到步兵這種單位有更多變化。

戰場上的其他障礙物，碉堡，沙包陣地，還有沒有影相的地雷，煙霧等等。

你可能會諗，鋼架，沙包，鐵絲網，可以用返M'44既模型喎？無錯！

▲用上M'44鋼架同鐵絲網模型係咪更有Feel呢？真係好鬼美式！沙包我就無用，因為呢隻Game，一格可以放幾個沙包，所以M'44既就似乎唔係咁適合。

▲策略咭，遊戲另一個特別既地方，跟據劇本，玩家要預備一些咭，咭已經分類，例如要求你預備一疊Supply Deck 1俾德軍，一疊American Air Supply Deck 1俾美軍咁，德軍就可以在該戰役中，有機會選用到與該戰役主題有關的行動，德軍可能會獲得援兵，美軍可能係呢個戰役講述會空投部隊或物資，用咭就可以出現這些隨機的事件，一壘咭有10張。

▲策略咭內容，下方有使用該咭的COST，這個資源需要在戰場中佔領Command Objective以獲得Command Point(例如佔領橋樑，戰略小路等等)，Command Point既作用有二，第一係用於啟動咭效果，第二係玩家可以將部份Point 放在"指揮部"，較多Point既玩家可以在下一回合中先手！令到玩家在作戰時有更多戰術考慮。

▲美軍的步兵單位資訊，所有單位在攻擊班兵還是機戒單位有不同的射擊距離及火力，例如步兵射擊步兵可以有4距離，但攻擊坦克只有1距離，亦都接近現實，M'44的步兵遠距離一槍打爆坦克的超現實變得不可能了！

▲德軍其中的坦克資訊，Stug III與4號坦克數值及能力一樣，可能有些咭會令這兩個單位有分別吧，又或想更貼近歷史？雖然Stug III與4號坦克在實際上火力，馬力等都唔算相差大，但兩個單位一樣始終有D奇怪，特別係我最鐘意自已設計戰場，BGG不少玩家都有討論過，亦有自已修改的建議，我自已就在Solo時將Stug III改為移動後不能攻擊以突顯這種坦克沒有轉動炮塔的能力。

▲說明書都有充足的示範，而且說明書加起來約60頁，但其實很多重複，並不很復雜，多玩2次已經很好掌握的了。另外，1A Game亦說已修正過以往FFG說明的錯誤，唔需要再睇Errata了。

最後送上幾張遊戲的寫真吧！▼

▲德軍準備搶奪前方的橋樑。

▲德軍一名軍官在半履帶車掩護下視察敵情。

▲總動員出發！

▲美軍打算突破德軍的叢林防線，一個美軍班兵在破廢的雪曼坦克掩護下前進，但被德軍固守防線，美軍班兵有不少傷亡。

▲坦克戰，簡介規則中的第一個戰鬥，虎式坦克射程，火力，護甲都很強大！

總結：
遊戲我未試過2人對戰，主要都係SOLO，係同類戰術遊戲中，深度最足，運氣較少既遊戲，當然，戰鬥仍然要用骰，都有一定既運氣，但相對M'44 抽咭控兵既不足已有大大提升，預備開火既行動亦增加雙方的互動，唔需要完全等到對手行完先到自已，在關鍵時刻可以用預備開火的部隊攻擊阻斷對手的行動。

攻擊亦非一味的射殺敵軍，加入班兵的狀態及裝甲部隊的損傷標記，將一些較高級別戰棋的原素簡化帶到遊戲，策略咭亦為遊戲帶黎一些不肯定的資訊，不再只得步兵/坦克/大炮既簡單分類，增加更多的兵種，特殊單位，令到玩家更有代入感，而最重要係，整體唔會為遊戲帶黎好重的負荷，遊戲依然算係簡單，但有更多戰術考慮。

有些人會覺得呢隻Game東不成西不就，簡單又唔夠簡單，深入又唔夠深入，但一些正如我呢種二戰門外漢，有一些歷史知識，卻對士兵的武器，坦克等資訊只有皮毛的人來說，已經非常足夠，我諗，首先你要鐘意二戰背景，第二鐘意玩微縮戰棋(如戰爭之道，M'44等，第三既想有些深度但又唔想太復雜，呢隻Game係絕對推薦。

一般一場戰鬥大約2小時內可完結，組兵會係較費時的準備，不過編班亦係呢隻Game不可或缺的樂趣。如果小規模的戰鬥，1小時亦可完, 整隻Game既配件質量都幾好，而且又有眾多既擴展，例如新的 Stalingrad ，加入在城市樓層分層的原素，令戰場更立體。

我自已都考慮緊入埋Soviet，不過1A Game唔知會唔會更新 Fury of Bear呢個Soviet擴，因為Stalingard Soviet 士兵唔算多，Fury of Bear 更少，想Solo Soviet人海戰始乎要收晒兩盒，另外1A Game應該會出太平洋戰區，我非常期待日軍既出現。

一句到尾，睇完仍然有興趣既話可以出手，應該唔會令你失望的！

7年後更新：已經買齊TOI的全系列，自訂戰場Solo仍然有趣，足夠多的配件可讓你豐富每場戰場的內容，基本上會永久收藏。

評分：★★★★☆
策略：★★★☆
簡易：★★
耐玩：★★★★
歡樂：★★★★☆
(5星最高)