呢隻Game佢幾年前一開頭出既時候都有興趣試，到最近忽然睇到佢出左呢個版本，基礎加5個擴既臻藏版，修正過武將技能，轉換左原版既棋子。
開盒睇到呢個版本所有武將既棋子(籌碼)，有透明盒蓋保護。
每個籌碼印有不同既武將，分為魏蜀吳群雄，共計超過60個棋子，每個都幾重手，底面印製，底部為黑白。
跟住睇到遊戲手冊，除左規則外亦有所有武將的技能列表，所有卡牌的功效。
然後有硬紙板地圖，共3張地圖雙面不同戰場。
地圖下面係Token，有地形版塊，分數，士兵等等。
最底層為卡牌，武將牌。
所有內容物，配件豐富，有效收納，都幾賞心悅目。
四大勢力的棋子，基本上最出名既都有收納其中，除左袁紹(好似係限量版先送)。
遊戲隨機或輪抽組成一個 3 vs 3 既戰隊，每人控制一個角色，故此可以不同勢力的武將在同一隊中效力，開始時，可以用佢既透明保護盒將棋子裝進盒中，有一個藍/紅色的類似海綿的膠圈以分別兩隊，不過我覺得比較麻煩，質量亦都麻麻，我就唔多會用，唔用應該都唔會太難分，你亦可以限制為分隊必須選擇同陣營。
遊戲目的係兩隊最快獲得10分，將師棋帶到對方大本營有5分，殺死對方武將有3分，被殺的武將可以在之後再次返回戰場，不會有玩家中途出局。
三國殺戰棋的目標係一改三國殺既身份同目標的玩法，改為沒有身份，分為2個陣營，以三國殺的方式出牌加上在版圖上移動去達成遊戲目標。
除左原本既戰場，遊戲出過5個擴中亦推出過如水戰，馬戰等地圖，有新的地形及規則。
地圖印製質量不錯，顏色都算特出，望落舒服。
不同既配件。
每回合玩家在公家牌補手牌，然後除殺之外基本上可以出任意既牌，手牌上限為武將手命力。
遊戲中配有2套牌，深色牌背果疊係原版，淺色係進階，我就咁睇大同小異，最大分別係進階牌既閃出完可以再移動一步。
武將牌係精美既，不過風格我就一般，但一次過有六十多張三國武將又有一定既滿足感。
總結：
我係買既時候以為佢會更加似另一隻我都介紹過既遊戲龍翼編年史，係自已無了解清楚呢隻係咩Game既情況下就衝動買左，一來咁耐無買過大陸Game都想更新下個認知，同時亦被呢隻臻藏版所吸引，可惜，隻Game實際上同我預期有好大出入。佢只係一隻無身份猜疑分左2隊係版圖上出牌對打既遊戲，本來就算係咁都無咩問題，可惜佢改左三國殺一部份，卻保留住另一部份，即係殺牌同閃牌，雖然我無好好試過隻Game，但咁樣感覺上將一隻可以越級提升既遊戲又降返去純鬥抽牌既遊戲，有無版圖實際上好似無咩太大分別。
我無試真隻遊戲，我亦暫時搵唔到6個人同我認真試呢隻Game，本身我以為可以2人對戰或者Solo，可惜唔係。
憑我睇佢既規則書，卡牌效果，武將技能，地型效果等等，都係比較低級既設計，無咩深度可言，比如佢步戰規則，戰場會生成步兵Token，步兵的移動方式同效果都比我好奇怪既感覺，當然我暫不能排除佢有巧妙的設計，但就咁睇完個Rules就係比唔到個吸引力，想像唔到會有咩好玩。
我個人而言都幾後悔入左呢隻Game，亦同樣失望地覺得佢應該可以借做戰棋既玩法，大幅提升好多，或者其實係佢想專注做三國殺呢個玩法，唔想做一隻唔同既遊戲。
比較我同時買既另一款大陸Game三國群英錄，睇完Rules感覺三國群英錄起碼叫上得大檯先，亦有好大既擴展空間，但三國殺戰棋既感覺仍然停留係十幾年前大陸啱啱興起桌遊對桌遊世界尚在摸索階段時所設計出黎既遊戲咁。
除左玩法唔得之外，語法亦都令人費解同容易出現誤會，阻礙佢自已設計時點樣好好令玩家知道到底有關能力既作用。
我自已唔會推薦呢隻Game，不過可能有人本身好熟三國殺，亦都可以有6個人一齊玩既話，唔排除都可以有樂趣，但一般人如果無玩開三國殺，唔建議入手。
反而覺得，以前隻龍翼編年史如果有三國殺戰棋既生產條件，再改善規則，會好過三國殺戰棋好多倍。
沒有留言:
發佈留言