2016年4月29日星期五

Star Wars : Rebellion 星球大戰:反抗軍

In long time ago in a Galaxy far ,Far away ... (音樂起)



相信呢隻都係好多Game迷注目的遊戲,Star Wars : Rebellion,背景我都唔廢話講喇,

遊戲支援2-4人(不過4人同2人玩分別唔大,嚴格上都只係2人Game)。

分別控制 Empire 帝國 及 Rebel 反抗軍,遊戲架設係星球大戰4-6的時空中,

帝國的目標要盡快找出膽敢繼續抵抗的反抗軍勢力,將其秘密基地消滅,

而反抗軍則在保存自身的同時,在反抗帝國的過程中獲得足夠的聲望與同情,以鼓動足夠的反抗力量去抗衡帝國。

內含超過153個Miniatures ,2個Baord組合以成的大星圖,2本規則書,24個角色立板,10粒骰,2張勢力表,配上Star Wars 既背景,$650既價,都算值回票價,如果你係星戰迷就更加合意啦。


▲由2個Baord 組合而成的星圖,上下兩邊既距離唔算遠,玩起上黎大家都方便交流到。


▲兩本說明書,Learn to Play非常簡潔,只有20頁,實際規則得15頁,重有好多圖,基本上30分鐘內都可以睇完,少有咁重份量既FFG Game係可以咁短時間睇完重要係無咩唔清晰既地方,另一本Rules Reference就詳細說明一些細節,感覺上真係玩果陣遇到先睇亦不遲。第一次感受到分為2份說明書既好處。


▲帝國軍的角色,玩家需要用角色去完成任務或行軍攻擊,角色立板以角切既方式去容易標記出其所屬的帝國陣營,小弟唔係星戰迷,唔能夠一一認出佢地,不過Fans就應該會有親切感。


▲反抗軍陣營,立板以圓角方式切割,雖然角色的底部也印有所屬陣營的標記,但畢竟較細,用不同的切割方式去適別更實際。角色的底部有分顏色(藍或橙)用於4人遊戲使用,藍色代表艦長,橙色代表將軍,4人遊戲時,同一陣營的玩家將會控制不同職位的角色,2人遊戲中沒有用處。

小喇叭,講咁多野,兵呢?OK,晒你冷!▼

150個單位要好密咁形造個感覺係咁大既星圖上都唔係好夠,所有唯有集中放一邊,感覺好多了!當然圖中尚有唔少單位未入鏡。帝國有89個單位,反抗軍有64個。


▲勢力表上列出不同單位的所需建造資源,攻擊力,生命力,特殊能力等,右邊的黑色區域係Leader Pool,將未用既角色放係呢個區域等代你的差遣。

反抗軍有9種單位,分別係 X-Wing、Y-Wing、Z-Wing(誤)等;聞說台灣人喜歡這種寫法,特意模仿一下(羞)。而帝國則有8種,另加在建的死星模型。完成的死星是沒有生命值的,固此,死星係常規作戰無法擊敗,唔知道有無特別的咭有機會將其消滅。


▲仔,過來吧!


▲星圖上有32個星球,按規則設定好起始位置後,反抗軍的玩家從未被帝國勢力影響的星球咭中選擇1張作為反抗軍秘密基地。然後將該咭放係Location位置,從此,帝國的目標就係要找出反抗軍秘密機地的星球並將之消滅。32張星球咭扣減去秘密基地的星球咭及5張帝國的起始星球咭後,剩餘26張會被面朝下放係帝國旁邊待用。而呢個Rebel Base就用黎俾你放係秘密基地既兵用,所以,就算帝國發現你的基地,都要消滅埋你係Rebel Base既兵力先可以成功。


▲遊戲的Tracker,左邊的係Time Marker,右邊的係反抗軍聲望,14係期起始位置,每個回合完結,回合標記向右移,而當反抗軍在遊戲過程中獲得聲望,則將聲望標記向左移,一旦回合標記與聲望標記相遇,反抗軍就會勝出,換句話說,如果雙方乜都唔做,第14個回合結束時反抗軍就會勝利。故此正常來說,遊戲應該會少於14個回合,甚至10回合內?帝國必需把握時間。

另有一些前置工夫,不在此詳述,整體上唔會好麻煩,唔會有太多卡呢樣果樣,大大增加開Game動機,兩個勢力的起始位置可以每次不同,所以唔洗擔心次次都係咁上下既發展,說明書中提供了一個第一次遊戲的Setup位置俾玩家熟習。而以下講幾樣隻Game值得介紹既位:


▲遊戲起始就會有幾個Leader跟你,亦會有幾既任務咭,每個回合中,分為3個階段,第1,分派任務,由反抗軍開始,決定指派誰人做任務,每個任務最多可以用2個Leader去做。如上圖,我打算做探聽任務,如果成功,我可以每4個位於Rebel Base既反抗軍單位就抽1張星球咭(即係上面講果26張到抽),抽出張當然就一定唔係反抗軍基地啦,但帝國唔洗Show俾反抗軍睇佢抽到邊張,將抽到既星球咭Keep係手即可。


▲續上圖,呢個任需要1隻眼既標記(上圖任務咭的左上角),於是我派出右邊既呢位角色去做,指派左之後就將佢反轉,然後將被指派的角色放上去待命,如果無其他任務你想去做既話,第一階段就完結喇。

第二階段,有2個行動可以做,反抗軍先手,每人選擇一個行動,
1)完成一個任務;2)行軍。
先講第1)完成一個任務,假設到帝國時,我決定要做我頭先選擇既果個任務,將其展示:
有少少錯誤示範,因為呢個任務要將角色放係反抗軍控制的星球上,我放錯左係帝國上,但小問題唔影響示範:每當有人想做任務,而該任務不是自動完成的任務類型,對家就可以派人或者以在進行任務身處相同星球上的角色去阻止。反抗軍知道其任務,覺得太大威脅,於是在Leader Pool中派出Leia公主去試圖阻止,Leia公主有2個眼的標記(配合返任務所需的眼標記),所以Leia可以擲2粒骰,而帝國只有一個標記,所以擲1粒骰,粒果,Leia擲的紅色骰子有雙劍(2個成功),而帝國方擲出的爆炸視為1個成功,帝國的成功數大不過反抗軍,任務失敗,失去任務的獎勵。

如果無人去阻止,任務就當作自動成功,反抗軍甚至可以派一個沒有配合該任務標記的角色去阻止,因為咁樣會迫使對方要擲到至少1個成功,才能以1:0作為結果結算任務成功,所以仍有機會阻止。任務係遊戲中一個重點,故此,玩家要備用一些角色去阻止對方的圖謀。


▲帝國任務咭39張,反抗軍29張,咭牌插圖精美,而內容大多與星球大戰出現過既劇情相關。

2)行軍:


▲帝國打算去攻擊反抗軍,派出黑武士領軍,派其到目標星系上,帝國可以任意將接鄰目標星系的部隊移進該星系中,但不能從已經放有自已Leader的星系調兵,調兵時,部份部隊需要運載先可以飛到另一個星系中(如步兵、TIE戰機),圖中的Star Destroyer滅星者運載量為6,所以可以運載最多6個單位。


▲帝國進入該星系,反抗軍由其Leader Pool中派出一名備用的Leader參戰,交戰時,無需先解決空戰,陸軍已可立即登陸到地面上,一旦有帝國軍的地面部隊登陸,反抗軍要告知該星球是否基地,如是,帝國只要在地面戰勝出就能獲得勝利。戰鬥時,先結算空戰,滅星者有1粒黑骰及2粒紅骰,而Y-wing 及X-wing則有1粒黑及紅骰,骰出上圖的結果。


▲滅星者有4血(圓形),生命值係紅色,代表只能被紅色骰子攻擊。反抗軍成功由紅色骰子擲出1個傷害,所以滅星者受到1傷,而黑色的骰子則可抽一張戰述咭或使用一個需要此效果才能觸發的戰術咭。


▲至於X-Wing及Y-Wing都係黑色的1血,滅星者擲出2個紅色命中,及1個黑色爆擊,爆擊效果代表可以對任何顏色造成1點傷害,所以滅星者用其消滅其中一架戰機,另外2粒紅色命中沒有效果。

空戰打完一輪之後到陸戰,陸戰與空戰方式沒有分別,完成後若未分勝負可以撤退又或繼續再開始新一輸戰鬥。


▲而在開戰前,其實玩家會跟據參戰Leader的統率力抽取相應的戰術咭,統率力分開空戰與陸戰,故此亦會抽取對應分類的戰術咭。戰術咭係一些簡單的效果,例如擋1點傷害,造成1點任意顏色的傷害之類,增加Leader在戰場上的影響力。內容唔復雜,應該唔會點影響戰鬥節奏。

當雙方玩家都已經完成想要做的行動後,回合結束,雙方收回所有Leader回Leader Pool,雙方抽2張任務咭(棄至上限10張),帝國玩家抽2張星球咭(視為被偵察),反抗軍抽1張目標咭,起兵(視乎是否到了起兵標記時間),獲得新的Leader等等。


▲反抗軍除左任務咭之外亦有15張目標咭,目標咭分為3個層次,永遠由第一個層次開始抽起,目標咭係用於提升反抗軍聲望,左上角的數字係成功完成目標之後所獲得的獎勵,由於目標咭只有15張,亦永遠由第一層次開始抽,帝國的玩家可能會係之後的遊戲中有印像從而作出針對的部署,但隨住時間的推移,由於目標咭的內容多樣化,帝國亦不可能完全防止。

一次玩後感

失望,遊戲節奏流暢,玩家最主要有效運用自已既Leader去做任務以贏得遊戲,任務咭雙方都有4張起始任務,這4張起始任務每個回合都可以再用,構成最主要既戰略行動,輔以每回合可多抽2張新的任務咭(行動咭),每一回合都為玩家提供新既戰略構想。

任務咭既執行並不繁複,文字量有限,內容清晰,插圖一流,而任務既選擇與派那名指揮官執行為遊戲一大主要內容,我認為佔有6成的遊戲時間,玩家可以好專注去思考任務咭的效益,無太多支節,但任務咭也非必定會成功,大部份對手都可以派人阻止,而阻止的成效就要睇指揮官有關屬性既高低,再以擲骰結算,對不喜歡擲骰的玩家來說就唔係咁好,但我自已完全可以接受,而且,少部份咭只要選擇執行就一定會成功,所以係重大戰略上運氣高低也不會有影響。

遊戲另一個賣點當然係指令部隊的行軍與戰鬥,行軍非常簡易,最麻煩係戰鬥,遊戲中,部隊的攻擊力與生命有分顏色,擲出不同顏色的火力只能對配對顏色生命的戰位造成傷害(除了爆擊),另外對戰時跟據指揮官的能力,可以抽戰術咭,而戰術咭亦可能會因為戰鬥過程中擲出雙劍而可以再抽,令到戰鬥並非單靠擲骰解決,雖然戰術咭效果簡單名字量極少而且只有15張,但唔係太睇到呢個設計有太大既實際戰術提升,其最主要目的係令到指揮官能力的高低也可以對戰鬥有一定影響力,及增加戰鬥的難測性。卻大大提高左遊戲時間,付出同收獲唔太合比例,算係一個稍為敗筆既地方。



但以FFG大盒遊戲黎講,相對Twilight Imperium,符文戰爭等遊戲黎講,呢隻Game規則算係非常簡潔,第一次遊戲連教合共6個小時,但玩過一次之後我相信可以回落去大約4個幾小時,但再大副下降就應該好難,隨住玩家愈熟練,戰略層次會相應提高,為防範對手就會有更多間接及預備手段,加上處理戰鬥的過程所用既時間基本上已無縮減空間,所以即使好熟悉遊戲,但最終遊戲時間應難降至4小時以下。

幸而,始終規則算係簡潔,過程流暢,玩家唔會太覺得"麻煩",好似符文戰爭小弟雖然非常喜愛,但英雄階段及每個回合結束既季節效果,過程都會覺得窒住窒住,Star Wars Rebellion對我黎講無呢個感覺。

星球大戰喎?你玩兩三個鐘會唔會覺得唔夠Epic先?所以4個幾鐘差唔多啦,Setup時間大約15分鐘,唔算太多七零八落既Token,咭要去預備,開局都唔會太辛苦,整體上你付出既幾粒鐘都真係玩遊戲而唔係俾規則玩。如果你係期望反抗軍係可以同帝國不斷正面衝突就想太多,我估你成局Game最多只能作1或2次稍為大規模既進攻,其餘大部份時間反抗軍都係用小部隊去做戰略性攻擊,例如截斷帝國既補給,擊毀對方既運輸機以防止其登陸其他行星,又或為左自已既目標咭等等。

而帝國方就不斷搜尋反抗軍,四週布兵,雖然兵威強大,但反抗軍會不斷搞搞震令到你未能順利作出部署,而且兵力雖多,但銀河廣闊,不見得你可以所有區域都有重兵,而反抗軍可以不斷轉基地以避其鋒芒,運用好任務咭(行動咭)可以讓你盡快迫使反抗軍現身轉基地,次數愈多,最終被你擊潰既機會愈大。

最後,我都幾滿意呢隻Game,如果鐘意呢個背景都值得入手,如果鐘意你追我避既玩法亦都OK,但想"星球大戰",或者當係起城起兵Game黎玩就唔適合。耐玩度我相信都唔低,玩過一局之後已經想再開,加上兩邊唔的陣營完全唔同既指揮官,行動咭及勝利條件,新鮮既遊戲模式,每局隨機既起始位置等,唔會快玩得厭。

第一次玩遊戲有們First Game Setup指示,可以用呢個指示黎熟悉遊戲,而我亦建建唔用Leader Action咭,甚至長遠都唔用以減少Downtime,我暫時會俾4.2-4.5分(5最高)

25-July-2016
第二次玩後感,今次既遊戲時間大大下跌,可能都係同對手有關,遊戲玩到第9回合左右完成,反抗軍勝利,時間連教學大約3個半小時,不過遊戲無用上Leader Card,以一個3個多小時可完的2人遊戲就真係可以為呢隻Game加返唔少分,今次我玩帝國希望盡快佔領更多的地去令反抗軍無處可逃,卻又忽略左反抗軍寧願堅守一地,帝國軍要從四處調兵更加困難,雖然已經確定反抗軍的基地,但反抗軍有策略地引誘我軍推進,拉長戰線令帝國難以集中火力擊敗反抗軍,令反抗軍成功從中取得唔小VP而勝出遊戲。遊戲兩個陣營似乎亦有不同的路線,期待下次用反抗軍!

以上的介紹只為略述,主要想介紹遊戲的核心玩法。
最後送上強大的反抗軍寫真:
▲那卜星,反抗軍基地…


▲一炮KO!

沒有留言:

發佈留言