2016年1月1日星期五

Zombicide: Black Plague 無盡殺戮 黑死病


千呼萬喚,終於到臨,KS集資額超過3100萬港元的大作,Zombicide 中古版,Zombicide Black Plague 終於面世!

以下我簡短介紹下隻Game,基本上隻Game既核心規則與第一代Zombicide無咩分別,但背景就設定係中古世紀,再加上一D奇幻既原素,就係兩隻既最大分別。

原定12月中左右出貨,但最終未能完成,公司決定先出Base Game去安撫一班鼓噪既backers(包括小弟),原定就聖誕前全部backer收到,但部份都係呢幾日先收到。


▲透過EMS送貨上門,住宅區要補返$30運費。


▲一張類似感謝信既紙,但係重點係最底粗體果行,叫你地收到呢隻Game之後唔洗問唔洗追唔洗喊,KS既所有Goal及Add-on會係稍後時間先會再送到,所有backer暫只會收到Base Game。


▲好多買家都鐘意既Pizza盒設計,入面當然裝有好多「兄弟」啦!


▲說明書好落本,足足有55頁,厚過第一代唔少,說明都好詳細,但仍有部份細位未有說明,不過唔大影響。


▲打開Pizza盒內面既間隔,6個英雄,6個Dashboard,一疊咭,其他配件,另有一大堆「兄弟」係下一層,個盒側有標明模型既放置位置,唔洗玩家盲摸摸咁放。

喪屍方面,Base Game同之前第一代無咩分別,都係分有Walker,Runner,Fatties同大佬,不過就增加左Necromancer 死靈法師,當佢進場後會係同一位置新增一個Spawn Zone,而死靈法師唔會特別去追蹤玩家,只會不斷向住最近的另一個Spawn Zone逃去,如果你成功將之擊殺,你可以取消一個Spawn Zone,但成功走甩的話,之後就會Keep住多一個Spawn Zone,對玩家將構成重大壓力,我覺得係一個唔錯既突破,遊戲會變得更有挑戰性!


▲另外不能不提既就係呢個Dashboard喇,我會back既好大原因都係因為佢,放上去之後非常整潔,成個Feel出晒黎,玩家可以更專注遊戲,而且質量都幾好,Exp Track原先以為係貼紙,點知原來係絲印,真係喜出望外,Base Game入面有6個Dashboard,如果加埋其他未到既野,我應該會有12個Dashboard!

另外,我唔知Zombicide 第二第三季有無防具,係中古版有機會抽到甲,每次被屍攻擊都可以Roll去擋傷,即係話俾屍圍唔一定係絕望了,而且每個角色的承受傷害去到3點,難死左咁喎?


▲體驗任務,唔難,但一定難過Zombicide Season1既教學好多,而且,依家喪屍牌會有唔少機會抽到Double Spawn咭,會係下一個Spawn Zone抽2張喪屍牌,如果再抽到咁點?就再係下一個都再抽2張,一直出屍出到唔再抽到為止!

中古背景,加上奇幻魔法,你話有無得諗?所以遊戲中加入左一D有用魔法,例如幫助角色加速,隱形,甚至治療傷害!故此,玩家可能可以更好去分工,我負責著防裝上去近戰開路,另一D負責遠程殿後,中間係輔助,幫人補血,轉裝,放遠程麼法補刀等等,大大提升合作感。


▲重有,角色模型全部統一做同一種顏色,唔再好似現代版咁幾十隻色,佢自已都諗爆頭,依家一次過同一隻色,外加一個底座,顏色配合返Dashboard既色就可以輕易辨認到自已既角色,可以睇到中古版係將以往既經驗改良,推出一個更為精致既版本,所以亦係我會back既另一個因素。



總體來說,合符預期,期望快D收到擴展,大佬擴,弓箭手喪屍等等,唔知洗唔洗等到4月。


總結:
6月時份終於收齊所有貨,到目前為止同朋友玩過2次,自已SOLO左4個mission ,即將進入第6關,遊戲係加上Dashboard之後大大加分,好的桌遊配件實在重要。至於其他方面,遊戲已經剝離左現代Zombicide既背景,加上Walking Dead熱潮已經減弱,所以呢隻Game係無玩現代版既感覺,取以代之係地城冒險,盜墓迷城既感覺。

由於包括左唔少擴展,狼擴,弓手,大佬擴,加上原版已有既新原素死靈法師,玩家面對既威脅更多,而同時,玩家的生命有所提升(2>3) ,有防裝,有補血,隱身,加速等法術,再加上遠程攻擊傷及隊友既規則有所修改(改為MISS時才會擊中隊友),令到玩家的生存能力大大提高,感覺上無左玩現代版果陣咁大壓力,但樂趣仍然保存。

狼擴展中有唔少強力武器,但並非一搵到就可以裝備,持有人要有特定的等級才能穿戴,小副增加有關的層次。

任務目前黎講似乎設計得比第一代Zombicide 時好(至於現代版的Season 2,3就無玩過無法比較),整體來說,如果鐘意呢個遊戲而又未買,當然建議買ZBP,但如果已有現代版,ZBP對比上亦沒有改頭換面既改變,入唔入手就睇你有幾鐘意呢隻Game,如果諗住入,當然無KS版有咁多野咁過癮,ZBP + 弓手擴 + Boss擴係唔錯既選擇,或者ZBP+弓手+狼擴,埋單約$1000-$1200,感受同KS唔差太遠。 

以KS版而言:
評分:4/5
策略度:3/5
簡易度:4/5
耐玩度:4/5
氣氛:4.5/5

沒有留言:

發佈留言