WARHAMMER DISKWARS 戰鎚：圓盤戰爭 人類帝國篇

WARHAMMER DISKWARS 戰鎚：圓盤戰爭 人類帝國篇

以下既介紹只會以每一個軍團只能派出多一隊精銳部隊為限去評論，而限制圓盤大小數量的規則等將會無視。(則每團不限於最多1個大型圓盤，2個中型，3個小型，而小型數量亦不需等於或多於中及大型圓盤數量的規則)

首先介紹既當然係所有奇幻世界都必定會有既種族：人類！

而大致上人類既能力一般都係不過不失，平衡但不突出，用科技去補足戰力不足的問題等等既特質，在DISKWARS中亦不例外。

▲Marienburg Swordsmen 馬林劍士，Cost 5，5移速，4攻擊，3反擊，4生命。

Reikland Crossbowmen 瑞克蘭弩手，Cost 7，4移速，2攻擊，2反擊，3生命，中距離射擊，3粒骰，3點物理傷害。

劍士就係最基本既兵種，單兵能力沒什麼，用黎攝下位，填滿個統率力，補刀，或者用黎阻礙對手的推進路線保護後方要角，但另一方面，平平既實力與價錢一樣，只係5Cost，一個軍團都可以召到6個劍士，人多就係力量！

弩兵感覺價錢較貴，但一分錢一分貨，雖然只有中距離射程，但可以擲3粒骰，而且每個命中可以造成3傷害，潛在輸出達到9點，亦有較大爆擊機會，制止目標行動。

▲Huntsmen 獵手，Cost 8，5移速，3攻擊，3反擊，5血，遠距離射擊，2粒骰，2點物理傷害，Flank側擊，Scout偵察，Strider行者異能。

獵手8Cost但擁有眾多的實用技能，布兵時，如果沒有派出獵手，獵手可以係稍後增援時放到除了對手外的3條戰場邊緣，再加上Scout，在正式行動前，獵手可免費先進行一次移動，但不能壓制或攻擊其他Disk，而Strider更令佢無視所有地型限制，要佢滲透敵方易如反掌。必要時亦可迅速靠近目標對其射擊。

▲Talabheim Greatswords 塔拉貝克因巨劍士，Cost 8，5移速，5攻擊，4反擊，5生命，當其壓制敵方單位時，獲得反擊先手能力。

Bright Wizard 烈焰巫師，Cost 7，4移速，3攻擊，3反擊，3生命，法師，秘法傷害3，當其進行秘法攻擊，會對自已造成1點秘法傷害。

巨劍士雖然要8 Cost，但係攻擊力及生命力都唔錯，而且其特殊的壓制後反擊先手技能，令其更加放心上前殺敵，一旦有敵方的單位反壓其上，反擊先手可以先結算對壓制的目標進行反擊，所以較弱小的單位未必可以有效擊殺巨劍士，令對方造成不少壓力，8Cost算係唔錯。

法師我就覺得一般，魔法傷害只有3點，而且攻擊後會對自身損1血，Cost亦唔係特別平，除了用黎克制部份對物理有抗性或免疫的敵人外，唔太吸引。

▲Knights Panther 裝甲騎士，Cost 10，5移速，5攻擊，5反擊，4生命，Impact 踐踏(3)，物理抗性。

Hochland Pistoliers 荷克蘭槍騎兵，Cost 9，7移速，3攻擊，4反擊，3生命，Mobile機動，Scout偵察，近距離射擊，2粒骰，3點物理傷害。

裝甲騎士Cost 10簡直係平，雖然只有4血，而且攻擊力及反擊力好似一般，但其Impact效果，一壓制落其他單位立即造成3點傷害，可以好好補刀，如果你有2隊裝甲騎兵，1隊衝上去Impact完另一隊再上去Impact，大部份部隊唔洗去到戰鬥階段都可以就咁被踏死。而且物理抗性亦大大保護佢地，任何物理傷害對其只有一半效果。咁強既部隊Core Set只有1隊，要出更多隊就要再買多set喇。

荷克蘭槍騎兵，亦係唔錯，移動速度高，加上有Mobile能力，可以打完一槍再走或者行埋去再打一槍，殺唔到都有機會博爆擊癱瘓對手，缺點就係攻擊力生命太弱，要好好控制同敵方既距離先可以發揮到佢既實力。

▲Helblaster Volley Gun 地獄火連珠炮，精英部隊，10 Cost，0移速，0攻擊，2反擊，3生命，1耐力，無限距離射擊，3粒骰，D6點物理傷害。如攻擊時擲出多於1個X時，損失1點耐力。

Steam Tank 蒸氣坦克，精英部隊，13 Cost，1移速，0攻擊，4反擊，4生命，1耐力，Mobile機動，Impact 踐踏(3)，物理抗性，3段距離射擊，分別擲3至1粒骰，3點物理傷害，如攻擊時擲出多於1個X時，損失1點耐力。

地獄火連珠炮係人類最遠距離的打擊兵器，唔好以為好易中，如果要攻擊超過遠距離的目標，只有擲出爆擊才算命中，只有1/6，同樣擲出X都是1/6，而成功命中後的攻擊力就再擲1粒6面骰去決定，非常運氣，用黎嚇下人都OK！

蒸氣坦克係我最鐘意既部隊，人類除左裝甲騎士較有能力突破外，就要用到人類係戰場上最偉大的發明 - 坦克，13 Cost有好多既能力，除左好實用既Mobile，嚇人既Impact (3)，物理抗性及耐力1，要擊毀佢唔容易，加上有4反擊力，普通部隊唔夠力殺，用強力部隊去打又可能會死，比較麻煩，雖然它只有移速1，但配合適當的指揮咭加速，有坦克開路掩護，人類在戰術上會有更多空間發揮。

▲帝國三英，Karl Franz帝國皇帝卡爾法蘭茲，2指揮，4移速，5攻擊，5反擊，5生命，1耐力，33統率，Flying 飛行，Impact (2) 踐踏，特殊能力：可將最多2個在遠距範圍內友方身上的行動標記轉到另外2個友方未被壓制及未行動的友方部隊上。

Volkmar the Grim 冷峻的弗克瑪，2指揮，4移速，4攻擊，3反擊，4生命，1耐力，36統率，Mobile 機動，特殊能力，Empower 增強一個短距離內的目標部隊。

Luthor Huss 盧瑟·胡斯，2揮揮，5移速，4反擊，5生命，1耐力，34統率，被動能力：若他被 Empower 增強，他會獲得Frenzy 狂暴及 Resistant 物理與秘法抗性。

3個英雄既個人能力都唔算出眾，但都可以睇到要玩到人類既特質「互相補助」既重要性，要發揮到佢地既能力，後排部隊步伐要跟到先有用。Karl Franz係人類帝國唯一的飛行單位，擴展亦沒有飛行單位提供。而有36統率力的Volkmar the Grim 係Core Set入面所有Leader 統率力最高的一位，應該係平衡返佢個人能力較弱的問題。

人類帝國俾我既感覺就係一個穩打穩紮，慢慢達到目標的軍團，唔會有太過驚人既部隊，平平均均，佢地要團體合作達到目標，不能有太多個人主義。