開局的難度

今日天氣關系燈光不足，原定會寫一篇遊戲介紹但影唔到相，改寫一篇雜談。

玩Boardgame 有好多令人卻步既原因，規則繁雜(我玩開既遊戲，即使簡單講解一般都要至少15分鐘，半小時是常識吧 ; )，部份講解一小時也不是誇張)，需時長(大部份常開既遊戲都有約3小時，長GAME6小時以上的，而且通常不會一鋪起兩鋪止的)，遊玩的空間不少(相信在香港的家庭要聚首一起開局，特別帶版圖既桌遊，都難以在一般的餐桌上進行的，放在地上玩又太辛苦了點，而且人多在家玩未必人人適合)，唔夠腳(有別於電子遊戲，一開即可，連線上網幾百個玩家恭候，除了需要教棋，布置版圖，分置配件外，還需要有人同你玩，唔夠腳玩無論你既遊戲多好玩都是浪費了，但在香港能找到可以常常開局的戰友不容易)，儲存空間多(一般玩桌遊的朋友至少都有幾盒吧，需要用於儲存的地方不少，有些老行專整個房間又或要開個倉去存棋的也不少見)。

當中我認為最困難既地方係人既因素，朋友同你開局，佢到底有多認真，有多專注，有多受得起挫敗，有多樂趣可在遊戲中找得到，每人是不同的。

作為主持人，當你約局，有些人或會很容易答應，他們有些真的是桌遊的喜愛者，但有些卻只喜歡當中熱鬧的氣氛，人玩我玩。有些人在過程中發覺呢款遊戲唔好玩，唔適合自已，就會HEA玩，求求其其打算盡快完GAME偶有發生。唔專注聽規則，東張西望自顧自的做自已野，到正式開始時這樣忘記了，那樣說沒聽過。又或者雲遊太虛，完全沒有投入遊戲中，在遊戲中找不到樂趣，甚至不顧勝負四處亂打的人。還有太過認真，步步算盡，主持人稍有解釋有誤即怪罪於你，又或是輸唔起，承受不了壓力，被針對，被圍攻時超認真，唔開心唔高興，板起塊面準備殺人全家既樣，更甚的輸了朋友都無得做，贏的時候卻不可一世的人，係未嘗試過同佢地玩過桌遊時你係難以估計的。

有時，自以為的好遊戲，朋友都說不好玩，不願意再開，即時開了也不會有預期的樂趣的，這樣也無法挽強。

如果你找到一位好好的戰友棋友，遊玩時適度認真，在每場遊戲成為一個潛在的對手，亦能夠承受挫敗，得勢時又不會有風駛盡，忘形得出口傷人，又能在桌遊中找到樂趣，兼且與你喜歡差不多範籌的主題與模式，這真是要好好珍惜。

志趣相投在桌遊是不夠的，還有就是看待的態度，你搵到你理想既棋友未呢？