我與桌遊的認識過程

小時候一向唔太喜歡玩電子遊戲 GameBoy ， PS 等等當年大熱既電子野一樣都無 ， 有時考試成積好，母親獎勵會到玩具反斗城買玩具，一般都係買Lego ，一係就果D一包幾十個兵仔既cheap cheap 士兵包，恐龍包(恐龍係我另一個興趣)，直至有一日，大約3-5年級之間，無意中買左戰國風雲，都係因為佢盒面圈住內含360隻兵，買左之後係咁意睇下說明書就開始玩，結果有D規則當然玩錯，例如一副地只能最多放12個兵，我同另一個朋友第一次玩既時候，雙方係冰島同格陵蘭不斷徵兵互相對恃，將D炮兵排到出Board既情況至今仍然記得。而呢隻就係我第一隻BoardGame了。

戰國風雲之後，亦有買酒店大亨，重有台灣出品既一些小型棋如侏羅紀爭霸戰，武將風雲錄等等，逐漸鐘愛呢種不插電遊戲，到好似大約小六左右，係商務無意中見到一盒包裝精美，主題吸引既咭牌遊戲 - 「三國」，還記得盒背有兩位設計者既樣貌小圖，當年唔理解兩位有幾巴閉要Show個樣，但呢隻Game當時實在好玩，$75超值！

升中後就無再玩版圖遊戲，但就無意間係一間店買左一盒賣剩既 Magic the Gathering 古典第7版，初接觸後驚為天人，佢完善既教學模式，基本上無需閱讀說明書，跟佢既教學一步一步玩就已經熟悉玩法，如是者對MTG著迷左大約一年左右，有感擴展既推出愈黎愈密，最終離開這個深坑。

之後一路無再接觸BoardGame，舊日既遊戲都已經不見蹤影，但唯獨「三國」我仍然保存住至今。

畢業後有日放工到黃埔閒逛，在一間精品玩具店見到一盒外觀精美既東西，就係 Axis & Allies Revised Edition ，果種觸電既感覺令我好似重遇我既老朋友一般，立即就買下來了。同MTG一樣，非常著迷，星期六還會通頂開A&A，但日子耐左，一盒A&A係唔夠的，我既桌遊世界從此再啟動，我開始四週搜尋桌遊既售賣點，慢慢認識更多BoradGame既發行公司，留意他們的產品，逐漸了解整個BoardGame世界有多博大精深。我常常悔恨自已與BoardGame重遇太遲！

現在開局既時間少左，但棋癮不減，亦不斷買進更多桌遊，即使無局開，每次打開一盒新棋，果種愉悅既感覺我認為值得並需要搵個地方寫下，為此，決定開設本Blog，一來可以向不同既玩家介紹一些他們可能正在留意既桌遊，分享感受，多給一個參考意見，二來亦可一舒棋癮，整理一下自已可能忽略既桌遊設計或有趣的地方，故「桌遊說」就係咁開立了。


後記：文中提及的「三國」遊戲，在之後推出既擴展小盒我都有購買作收藏(不是指中華天下)，雖然我並未儲齊整套「三國」遊戲，但我已將所有咭牌全部過膠保存，不知兩位設計者得知當日有位少年人會如此喜愛他們的遊戲感受如何，呢隻我認為係經典既本土遊戲，稍後會另寫文介紹。