簡短記錄 05/25 5人局7小時

 今日玩左幾隻Game 主要係睇下新加入既成員既耐受性

先玩Zombicide  Invader , 4個人落場，我做GM，加入左差唔多全部Zombicide Invader既王同除左Dark Side之外既小怪，執過Spwan deck，改過王既難度，新加入左急救行動之類，可能大家都係第一次接觸，見到咁多咁快生成既怪物有D不知所措，最終滅團。

然後開左Ethnos 第二版，第一次玩，感覺比第一版有好玩到少少，唔錯。

然後再開逃出絕命島，大家新手好似有D禮讓，淨係主力針死一個玩家全部成員死光，玩錯左少少，不過感覺無想像咁好玩，再試試。

最後玩左Tornado Splash ，形式幾有趣幾特別，不過同HEAT比完全唔同層次，感覺係一般Filler Game

Argatoria 10mm 戰棋

 最近又挖抗，25年大致  完成左Legions Imperialis戰棋改規則既玩法之後，今年又俾我搵返呢隻戰棋Argatoria ，呢隻我記得之前有見過，不過當時覺得都幾貴同埋D族唔多吸引，但最近一睇發現出左獸人，造形不錯，而且今年年尾會有矮人，由於我好想整奇幻戰棋，之前雖然用1/72整左個桌上戰棋規則，但我更想整板圖版，而1/72 太大唔適合，Argatoria個比例唔錯，研究左2日就一次過入左4個Core set，連運費盛惠$1,820 。

訂左之後一星期就已經係大英聯合王國寄到黎。

上面係獸人明顯比較早前出既人類精細，動作更加靈活自然。

即時開工油棋，連續幾年油棋眼力差左唔少，所以無諗住好精細咁油，亦無能力心力同工具去油，我只係想玩多D。

先油獸人，都油得幾快，starter set可以做到4種兵種。

跟住搵返之前買左但最終無繼續既 Wargames  Atlantic Fantasy 10mm 既狼騎兵，加入成為獸人第5個兵種-哥布林狼騎兵，可以慳返之後應該唔洗幫獸人買騎兵。效果都幾夾。

3日油晒成個獸人族，我無用佢本身提供既25mm方底座，因為無諗過用佢既Rules，買左D 1.5cm透明圓形亞加力做底，本身以為1cm夠，點知1.5cm先最適合for基礎兵，第一次用透明底，效果滿意。

雖然我未諗實個rules，最初諗住用battles of westeros既版圖設計，諗住4個模型一組，但因為佢個格細D，成個版圖會較為多格，實際上可能每個兵種需要更多先足夠，我又唔太想奇幻太嚴肅，格細唔太適合之後我再整立體地形，而且亦有D同battles of westeros感覺重複，既然我BOW已經全部買左2set，夠我玩大規模戰鬥，奇幻個規模可以細D，諗諗下就改用Battlelore 2nd edition既版圖，改為5個模型一組(特種兵就2-4個模型一組)。暫時感覺都OK，應該會用呢個做底去設計。

整體都幾滿意，基礎部隊油好晒之後我可能會補小量兵種，然後就買其他模型加入，比如D&D既28mm模型做D巨人，巨魔之類既特殊部隊加入，咁樣整體個Cost唔會太高。

Argatoria 應該可以幫我補完我心目中奇幻既缺塊，目前遊戲基本上無出遠程部隊，所以我要再搵搵其他代棋或其他比例既棋作為特殊部隊提供遠程攻擊例如投石車，火炮之類。矮人都有興趣入，不過會等到我搞掂呢4個族，目前4個族就係人類，獸人，魔族及蜥蜴人，但我更希望會有類似精靈既部隊。

Heroscape 英雄戰場

好耐之前已經聽過呢隻Game，但果陣已經無再出，事隔多年，一隻傳奇又再重新推出，以Age of Annihilation 為背景重新面世。

遊戲目標：雙方玩家各自在有限的點數組成自已的部隊，按劇本的戰場設定或自由設計戰場及目標以戰勝你的對手。

遊戲規則簡單，基本上個打法同一般戰棋既基礎規則差唔多，在視野規則上，去除繁複的判定機制，直接由攻擊或施放能力的模型視角去睇目標，而距離或移動步數就去除使用間尺量度，直接使用六角格地型，玩起上黎好簡易。

戰鬥方式亦簡單，只需按攻擊力擲同等數量的骰(3面命中，2面防禦，1面空白)，目標方則擲等量其防禦值的骰子以嘗試抵消傷害。

朋友最初入左Master Set，而我一來嫌Master Set太大，二來嫌Master 有D角色唔太鐘意，所以買左set細D平D既擴展，同朋友係無咩點睇規則，隨便組隊試玩左一次之後就未有機會再開，而我就慢慢油晒set細擴，然後又入左盒Revna's Rebuke: Kyrie Warriors  擴(覺得呢盒好型仔)，但因為當時試完覺得一般般，未敢確定是否好玩，同埋有少少覺得佢既規則好似過份簡化，連唔同色既地型，都無實際既規則，只係顏色既不同，唔確定到呢隻Game既價值。

直至尋日終有機會再開，係更了解同接受左佢好似好簡易既規則基礎下，再執下自已隊部隊，我地用500分對戰，遊戲持續左大約6-7round，本身以佔領高地為目標，玩左2round覺得有feel，改以完全消滅對手為目標，雖然最終我輸左，但今次既感覺出乎意料地好玩，一掃之前試玩果種不確定感，亦令我有衝動寫編文去介紹下隻Game。

遊戲吸引之處首先係立體地型，每次都可以自訂自已既戰場同目標，立體地型配合六角格既玩法大大簡化左例如Warhammer呢種度尺桌面戰棋有時覺得好麻煩唔夠直觀既感覺，對我呢種非桌面戰棋玩家，更傾向版圖遊戲既人黎講，Heroscape正正柔合到桌面戰棋同版圖遊戲既中庸，好好上手。

對戰方式簡易到有D兒戲，簡單既擲骰判定，角色資訊無更多護甲減免，閃避值之類左計右計既處理，最多只有因為地型高低而獲得護甲或攻擊力提升，一個角色可以好易一回合就被殺，但只要你以大局角度睇，配合各個角色的能力，整個策略層次有不少提升。

而且遊戲既行動方式亦簡單，雖然你既部隊不少，但無論如何你一回合只會行動3次，每次秘密地選擇你的行動部隊同順序。你可以對3個不同既部隊施放命令，又或allin全部命令落單一部隊。

本身覺得可以Allin同一部隊既方式好奇怪會覺得失衡，但實際上，如果對方Allin，你只要集中火力打死該目標，對手就會損失因為Allin而損失的行動。所以即時某D角色好似好強，但雙拳難適4手，被集火消滅唔係難事，玩家要諗清楚即將接戰時的部署，呢個係Heroscape既一大特色。

而重點，對非Hardcore戰棋玩家黎講，呢個份量既戰棋，既滿足到自組部隊，部隊能力，戰鬥，擲骰，地型應變，模型等因素，同時玩既時間唔長，無咩token或condition要放係戰場上面，整到複複雜雜咁，以1局唔計set場的500p為例只玩大約1個小時既輕戰棋黎講，實在唔錯。唔好既地方係遊戲或需要買唔少擴展以豐富你組隊變化同戰略，而且擴展價錢對一般桌遊玩家黎講唔平。

經過左尋日既戰局,Master set既部隊都重新愛上，特別係有多個模型既部隊單位，不過因為後來我已經入左set地型擴，除非Core平到傻，否則唔會再入返Core，而日後如果有類似獸人或者精靈大軍之類就更有feel，期待有更多新兵種加入。

我係好鐘意模型戰棋，但Warhammer 果類，太多規則，Under World 、Kill team、Warcry都玩過，最近似係Warcry但Heroscape既砌兵有趣得多，重有Godtear、Skytear、Wildlands、Ascension Tactics、Heroclix、Imperial Assault、Aristeia!   等等(唔計大會戰規模既Game)、重有D名都唔記得既Game，佢地都有吸引既地方，但就我而言，係趣味，簡易同策略既平衡，臨場感受及模型方向，以致準備遊戲及總時長等等，都達到一定要求，可能部份人會鐘意更有深度更多卡或數值的戰棋，但經過左咁多年既探索，對我黎講，完美難求，Heroscape都已經係我各個需求中做到滿足到我。

可能以前玩開Magic the Gathering，個趣味唔單只係同人對戰，砌deck砌兵既過程係未有機會開果陣都係一個樂趣，剛剛亦宣布會出角色—聖女貞德，真係唔買唔得！

主觀評分：4.5/5
客觀推薦: 4/5
策略度：3.5/5
簡易度：3/5
耐玩度：4.5/5
氣氛：4.5/5

蒼天燃燒

 今日第一次玩一隻叫蒼天燃燒既Game

三國背景,最多支援4個玩家 (感覺5個都得但要自備配件)

3人玩，第一次跟佢玩法，玩左大半覺得都OK但有唔少位可以改，
於是即時修改即時重新再黎一局，感覺唔錯，覺得可以分享下：

主要覺得原玩法每人每回合只能攻擊一次既話，節奏太慢，而且強果方無法太彰顯實力。另外主要修改既核心圍繞住如何顯示國力，唔可以俾弱果方太拖，武將戰力太高影響國力展現以及武將上限太少影響節奏。
故修改為：

1.起始位置，每人輪流任選非特殊及與其他玩家首都達3格距離的空白地區為首都，然後即時佔領額外2個接鄰首都並且不接鄰其他玩家地區的任意地區。首都自動升級為城池，並視為3VP。

2.每季起始 ，徵稅後 ，bid次序，勝者選擇順序(例如勝者可選第三順序)。

3.Bid次序後每人同時免費獲得1張謀略卡。
4.每位玩家兵力上限無限或高上限(如25/30)。（若覺得會出現太大問題,在每回合收稅後，每5兵支付$1維持，頭14兵免費）

5.出戰時，出戰兵力無需跟據武將統率力，兵力上限10個。

6.對戰時，謀略卡無需預先打出，除非與戰鬥非相關或出現嚴重不公，否則可由玩家在覺得適當的時候直接在對戰中打出。(例如我出單騎，你出看破，看破我的單騎，然後我出火燒連營(我唔太記得有咩牌，隨便作)，燒你3隻兵，然後你死3隻兵，我再出妖術，你出看破，想看破我的妖術，我再出看破看破你的看破，只要牌的效果雙方已接受其結果就會結算，結算就不能再出招/牌影響該等已結算的牌。

7.非對戰中的玩家亦可打出與對戰相關的卡牌影響對戰

8.對戰勝敗雙方懲罰不變

9.玩家武將（連主公）上限10名

10.防守方無論贏輸，其出戰的武將皆無需因為出戰而放置到委任區(仍可被其他效果放置到委任區)。

11.同一回合攻方可作多次攻擊，唯同一回合同一玩家不能再次進攻同一目標

12. 對戰前，立即提供雙方可選武將的種類情報(即弓、步、騎)，簡單地提高雙方選擇出戰武將時的策略。(雖然雙方的武將情報理應為公開，但實際上除左繁複的武將技能外，重點係武將的種類(弓步騎)，而每次逐個睇會好浪費時間，所以無論對方是否需要在戰前檢閱你有什麼可選的武將外，簡單地講俾對手知道雙方的待命武將類型分布及數量已經可以有不錯的提升而又不會造成過多downtime。

13. 如攻方勝利永久獲得1VP。(防守方勝利則沒有)

14. 若在指定回合遊戲結束前，任一玩家的首都被攻陷，該被攻陷首都的玩家無論總VP多少皆不會勝出遊戲，然後立即結算所有玩家的VP總數，包括各自的戰略卡，最多VP勝出。

此等修改已經過1次完整的3人遊戲測試過，沒有遇上什麼問題，反而大幅增加遊戲爽快度，流暢度，3人遊戲1個多小時完結，無論BID次序，兵力，攻打其他玩家，都建基於金錢的支持，而金錢代表國家稅收，代表國力，國力愈強，理應在各方面比弱小的國家更能彰顯，比起原版在兵力上限，武將數上限有太大限制，變相國與國的對戰變得你一拳我一腳，形勢上難有突破。

在每回合免費的一張策略卡加上非對戰中的玩家都可出牌影響戰局，可以一定平衡一方獨大的問題，亦進一步增加開戰方對勝負的掌握力要求；而無需在出戰時就準備好要出的策略卡，亦可加強策略卡的重要性，增加在戰鬥時的更多變數，並增加謀臣的影響力。

由於只經過1次的測試，不確定是否有一些牌或能力變得嚴重不平衡，但在是次過程中，並沒有遇上，雖然可能會有一些能力睇落會變弱/變強，但都在可接受的範圍，而以上修改亦無需對遊戲本體配件作出什麼配合，最多只需要玩家提供/記錄每次攻擊戰勝的永久VP，首都及順序號碼。

整體而言，用原版規則玩，個人覺得略為太慢，除非本身無咩玩開Game既人，純粹三國背景迷，可能覺得都幾好，但對一般桌遊玩家黎講太慢太綁手綁腳，點知用左以上規則修改之後，對我黎講好玩左唔少，絕對係會想再玩既Game，而且想佢出擴出更多武裝同策略卡，不過唔知到時同修改玩法會唔會太唔兼容。

單純呢隻Game本身，有唔少武將同策略卡，設計都幾平衡有用心，唔太覺得係皮毛草草了事既設計，遊戲規則簡單，武將能力多變，騎步弓相剋有一定三國(N年前的三國卡牌遊戲)影子，遊戲內政亦有PC遊戲三國志系列既感覺，說明書編寫有心，用色豐富吸引，武將插圖亦唔錯，整個遊戲配件都幾高質素，以一隻係版圖區控的策略遊戲黎講，雖然唔係咩精密的設計，亦非有高度策略性，但三國情懷滿滿，各項設計有心亦有一定策略成份，個人覺得$200都唔洗，絕對值得入手。

以原規則3人遊戲：

主觀評分：3/5
客觀推薦: 2.5/5
策略度：2.3/5
簡易度：3/5
耐玩度：2.8/5
氣氛：3.2/5

以修改規則3人遊戲：

主觀評分：3.5/5
客觀推薦: 3/5
策略度：2.8/5
簡易度：3/5
耐玩度：3.2/5
氣氛：3.5/5