Warhammer DISKWARS 戰鎚：圓盤戰爭

平生第一隻賣左又買返既Game ：Warhammer DISKWARS 戰鎚：圓盤戰爭

係大約一年前入左全套DISKWARS (1Core +2Expanison ) ，玩過2次之後覺得無咩機會開，加上隻Game既前景不明，就賣出左，但其實賣左個下都有D後悔，未試過賣過一隻Game有呢個感覺。

思前想後，覺得DISKWARS其實都真係幾岩我，係我心目中幾年內都未必會再有類似既Game，為免日後後悔，加上與Battlelore 2E既糾結告一段落，決定要再買返，原本諗住一次過入2個Core+4盒擴(每個擴2盒)，但又好似重皮左D，加上矮人擴充我上次開過感覺一般，自已唔係太Buy矮人，反而幾鐘意不死族(吸血鬼)，但無理由入1隻唔入1隻架，咁算啦，入住2個Core先啦。

事隔一年，香港好似難搵到邊到有Core賣，大陸亦都七七八八，好在世上還有Amazon，即入2盒Core先，2盒連運費都係$600港紙，6號買，14號送到，都幾快。

廢話完畢，即刻開箱，到底一盒$300銀既Game有咩內容呢？

▲開盒後，見到指令咭一疊，尺一把，骰4粒，尺同疊咭既放置方法唔係咁經得起運送既考驗，我見部份外國玩家既尺被咭牌壓到完全折曲，我既2盒一盒無事另一盒有些小折曲，尺既作用係判斷距離，行軍唔需要用尺度。

拎走本說明書後，DISKWARS既DISK出現了！一共有7份Cardboard。

7份Cardboard包括左4個基礎種族，高等精靈，人類帝國，獸人及混沌。

▲秩序陣營，人類帝國，最前方既3個英雄，以及其他兵種，部份兵種有3個，部份只有1個，共有9個兵種，合共16個DISK，當中蒸氣坦克及裝甲騎士抵抗物理傷害，幾有Feel，步兵，弓手亦與一般人類軍角色有類似既感覺。

▲秩序陣營，高等精靈，一樣都係3個英雄，9個兵種，合共15個DISK，無任1個戰鬥單位多於2個，似乎比較要玩靈活一D。

▲毀滅陣營，獸人，同樣都係3個英雄另有9個兵種合計16個DISK，我比較鐘意既種族，樣樣都有D，狼騎兵好靚，巨魔同犀牛騎兵都幾正，再加上戰鎚獸人既Boyz傳統，幾有獸人Feel。

▲毀滅陣營，混沌，除左最基本既步兵同遠程射擊單位有3個之外，其餘的單位都只有一個，但每個都好似有唔錯既能力，特別係最大既精英單位噬血狂魔，具有狂暴既能力，可以大大輸出傷害，非常大威脅。

每個族都有3個英雄，一般來說，玩家選擇一個族之後就選擇其中2個英雄，英雄有一個點數去領兵，所有單位都有徵募佢地既Cost，一般來說，1個英雄會大約帶領4-5個單位。

▲再黎就係地型，而且係雙面印製。

▲地型既出現大大豐富戰場感，但又無大加重成個遊戲，而且每場戰鬥地型及放置既位置都係玩家可以決定，所以每場戰鬥的戰場都會唔同，當然不同的地型都有不同既效果。

▲咭牌，從上至下，地型咭，指令咭，目標咭，布兵咭，內容簡單但精美。

▲內容物大合照，無論Disk定係Token既質量感覺都好好，雖然都係一般既Cardboard，但表面處理同一般FFG既Cardboard有D唔同，無壓紋效果，平滑手感更佳。

▲Disk既質量比我最開頭既想像中好，我一開始比較擔心呢D Disk要不斷Flip會唔會容易爛，但我經驗係好穩，唔會好易就起邊，至少我之前果盒都無出現過任何起邊既徵兆，加上由於本身遊戲無戰場提供，玩家一般會另行搵張墊去玩，只要選擇適合都可以大大減低呢個問題。 除此之外，我見外國有D玩家會油黑個邊，所以我都有咁做，感覺好似「高級」D咁。

▲Core Set入面既所有單位，一共62隻。

▲1年前既戰鬥情況。張墊我已經唔見左，買左2張新既唔同顏色唔同質料，下次會再Post。

我等新既墊到左就會影遊戲既示範同解說，有興趣就繼續留意我既新Post啦，但如果係想話Shut up and take my money既話，就請快快行動喇，因為感覺上開始難買，加上依家經過「桌遊說」推一推既話...

咁當然啦，其實我係有私心既，遊戲係2014初出，2014年中期出埋2個擴之後，就無再有新擴，而係2015年1月FFG已經宣布唔會再搞比賽，明顯唔會再力推呢隻遊戲，在FFG既立場已經由競賽遊戲降為一隻casual game，但我正正都係鐘意佢既causal ，價錢吸引，又可以自已砌兵，加上係奇幻背景，美功一流，實在難得。遊戲推出至今好似唔算多人接觸，希望更多既人有興趣去推返起隻Game，令FFG會繼續為呢隻Game出擴。留意就係FFG未曾講過呢隻Game唔再出擴，只不過一班Fans就覺得已經事隔2年未有消息就有D心淡。

但就算唔出新擴，當你Core+2個擴都係入1盒，已經有6個齊既種族，另有4個新既種族(只有小部份單位)，其實都好夠玩，唔需要糾結要入幾多盒先夠，如果唔係有咩特別追求，入1set夠晒，就算係1盒Core都已經可以4個人玩家，實在係好吸引。

如果入2set Core有咩好處呢？第一就係兵種選擇同配搭更多更自由啦，然後就係遊戲中有一個特別劇本，好似叫Stronghold，兩邊玩家要鬥快佔領對方的Stronghold，但Core入面只有一個Stronghold地型，所有多一盒先可以玩到呢個戰役。多1套骰仔同尺會方便遊戲，多1套咭牌亦都會更方便，而多一套目標咭就可以有更多可能性。

而浪費左既就係每個族既3個重複英雄，部份咭牌，多餘既Token(作後備)。

下次會再深入小小介紹(放毒)！

2017年4月15日:
補充: FFG較早前已經失去WH既lincese ,Warhammer Diskwars 再出擴既機會可以話係無可能了, 失望.