WARHAMMER DISKWARS 戰鎚：圓盤戰爭 續篇
繼續為DISKWARS放毒，小弟賣左又入返，重一次過入返2個Core Set，先再深入介紹下呢隻Game 俾各位(*鄉村的野孩子)見識見識！*請用普通話發音
▲首先介紹下D主角DISK先啦，每隻disk都有幾個數值，從上面左至右講起，移動速度(即係呢個disk可以Flip幾多下去移動)，攻擊，反擊，生命。下面左起，部隊所需統率力，中間的圖示係種族，最右就係版本圖示。
▲DISKWARS入面，每一場戰役，玩家都要自組部隊，而部隊需要由Leader「率領」，Leader既名字左邊有旗標記，而統率值就係種族圖示左邊既數字「33」，Leader另有一個係左手邊既皇冠標記，代表呢個Leader會提供幾多張指令咭俾玩家選擇。至於右邊的盾代表佢要死幾多次先會正式死亡。
▲33統率力的Leader ，配2隊獸人步兵(12點)+1隊弓手(6點)+1隊狼騎(8點)+1隊犀牛騎兵(11點)+1組投石機(9點)=46點，抱歉，超過了，所以你必需對呢個組合有所取捨。
玩家各自組成自已的軍隊，遊戲建議每個玩家各自2個軍團對戰，所以每個玩家先自由選擇2個同一軍團既Leader，然後自由按Leader既統率力去徵募部隊，徵募部隊除了統率力外亦有其他限制，例如一個軍團只能有一個精英部隊，只能不多於1個大圓盤，不多於2個中圓盤及不多於3個小圓盤，而小圓盤既總數亦必需等於或大於中及大圓盤既數量。
不過既然我當佢係Causal Game，我梗係唔理啦，我只會限制一個軍團只能有一個精英部隊，其他我唔理喇，好玩就好。
正式開戰前，首先要定左個戰場Size先，由於遊戲無提供戰場墊，所以玩家要用佢既尺去度個去勾劃出戰場面積，遊戲會有Token去標示4個角位，總大小係3尺*3尺。
不過基本上所有玩diskwars既玩家都要用墊，墊有幾個好處，美觀好多，移動時唔會咁易走位，保護棋子既壽命，清晰顯示戰場。至於用咩物料，我自已之前用過3mm厚既不織絨布，感覺唔錯，依家買左隻PU彷皮做墊，但感覺唔夠厚，而且PU比較密，Flip Disk既時候空氣無處可走重易走位，用不織絨布感覺好好多，我會買返。
▲準備開戰。
Set好左個戰場之後，就要睇下邊個先手，後手果個從場景/任務咭中抽2張，選1張成為今次戰場的場景，場景係一D持續效果，例如今場戰役，所有英雄既盾會少1點。
然後各自秘密地抽1張場景/任務咭，呢張咭只會睇下半部的任務要求，遊戲會進行5個回合，第5個回合完結就會結算計分，而獲得分既方法就要睇返你既任務咭，任務咭目標會有擊殺對方1個單位有1分，擊殺對方Leader有5分或衝到對方的布兵區有5分等等，對方係唔會知道你的目標。
▲地型咭，每張有2種地型。
之後抽4張地型咭，後手先選其中1張的，並從中選擇1種地型，基本上可任意放置，唯不同地型及與戰場邊緣都要至於格一個短距離。
▲布兵區，圖中的布兵咭數字為5，即此區只能最多放5個部隊。布兵區由咭的兩邊拉一條直線，用尺度到中距離的範圍就係呢張咭的布兵區。
放好晒之後就後手先行布兵，部隊可以自由落係布兵區的位置，而布兵區會有不同既部隊數量限制，多出而未進入戰場的部隊會成為預備隊，稍後時間再進場。
布好晒兵就可以正式開戰，玩家各自從手中打出一張指令咭，而手中的指令咭數量就係Leader皇冠數的總和，玩家係未開戰前會選擇好想要既指令咭，選擇好之後整場戰役只會用到該幾張咭，所以玩家係戰前都要諗好成個作戰計劃，咩兵種配咩咭最好。
▲指令咭。
玩家各自從手中打出一張指令咭後，先比較咭的先後順序，指令咭有分4個時機，Devious 快過 Bold 快過 Steady 快過 Devious，就好似包剪鎚咁，而重有一個Slow就永遠慢過以上3個時機。打和的話就會係先手者行先。
▲雙方打出既指令咭，左邊係Deviuos，快過右邊的Slow，所有出Devious既玩家會先行動。
行動有4個選擇，而一張指令咭要為幾多個部隊下令就視乎該咭右上角的數量，如上圖的Devious就係要對4個部隊下令。
4個行動選擇有：
1)移動 2)特殊行動 3)遠程攻擊 4)PASS
1)移動非常簡單，1個DISK所顯示的移動數值就係代表你可以將該DISK向任意方向翻轉前進的次數，所以大既DISK行3步可能已經多過細既DISK行4步。而如果在移動時踏進對方的DISK就要停止，此時你已經壓制一個或多個敵方部隊，在稍後的時候會進行戰鬥！
▲黑獸人部隊移動並壓制了精靈步兵，黑獸人行動完畢，除非黑獸人在稍後時間被擊殺，否則被壓制的精靈步兵即使未行動也不能行動，因為他們正在被黑獸人攻擊中。
2)特殊行動，例如一些增益法術，或者一些魔法攻擊，會有圖示或文字提示，非常簡單。
3)遠程攻擊，攻擊時首先要確定目標是否在射程範圍。
▲精靈箭手，三角型標記代表可以遠程攻擊，最大射距係Long，骰3粒骰，每命中一粒有2點物理傷害。
▲骰子效果，上排左起：命中，爆擊(命中並且令到目標不能行動)，射偏(對短距離內的另一目標重擲此骰，可能會造成傷害)，下排左起，混亂(未擊中但或有特殊效果)，未擊中。
▲精靈箭手擲3粒骰，擲出1個擊中(2傷害)，1個爆擊(2傷害+不能行動)及1個未擊中。所有目標被造成4點傷害，由於目標只4血，所以在攻擊後該目標死亡，立即移出戰場。
行動後，如仍有部隊未行動及未被壓制，就再打出一張新的指令咭，行動過後的部隊會放置一個行動標記。直至所有部隊都行動/被壓制後，就會進入戰鬥階段。
▲戰鬥，2個人類步兵隊正壓制1個獸人Leader，主動壓制的2個人類步兵會以黑色的攻擊力(4)去造成傷害(4+4=8傷害)，一起砍向獸人，而被壓制的獸人只能以白色的反擊力(4)去反擊，對其中一個步兵造成4點傷害。
▲承上圖，其中一個承受了獸人4點反擊的步兵因為只有4生命，所以死亡移出戰場，而他們對獸人造成的8點傷害正常可成功將之擊殺，但因為獸人盾(耐力)的數值為2，代表可以死2次先真係死，所以會放置1個耐力損失標記代表。咁樣可以方便一D遊戲的繼續進行，唔會一大堆傷害Token係部隊身上。而大部份既部隊都是沒有耐力值的，換言之只有一條命。
當所有近戰完成後，除了耐力損失標記外，清除行動標記，傷害標記，增益標記等，收回所有打出的咭牌，新的回合開始，5個回合後結算分數定勝負。
▲第一回合完結，雙方準備埋位在下一回合埋牙戰鬥。
▲中央區域爭奪戰。
▲獸人弓手被樹林阻礙視線，所以無法攻擊精靈部隊。
▲但只要任一方踏入樹林，雙方就會有無阻的視線。而只要部隊壓在地型上，地型既效果就會在該部隊上產生，例如在森林的部隊被遠程攻擊時會擲少1粒骰。部隊無需完全壓在該地型先有效果，只要任何一部份壓上效果都會產生。
大致上個玩法就係咁，但當然詳細既地方要睇說明書啦，亦有更多有趣的原素難以盡錄，純粹希望進一步深入少少帶俾各位認識一下隻Game，不同的部隊有好多有趣的能力，如何組合成為最大放益，對戰時如何行動去避其鋒芒，猜測對手的行動及目標，不能控制的射擊效果，都係呢隻Game有趣的地方，下一篇將會介紹下Core Set入面既兵種能力！
