講返正題， 買左返黎已經Solo過2次，無令我失望，不過軸心國難度較A&A Revised Edition易好多， 兩次都係軸心國贏，但當然，我自已係比較傾向俾心機落軸心國，而玩同盟國一向都需要多D花招，所以未必反映實況，2次Solo我都加入左以前Revised Edition , Pacific 既一D特別規則落去用 , 會寫實D 。
首先係蘇日互不侵犯條約，如日本先攻擊蘇軍地區，則該地區蘇軍可額外有多4個步兵增援，此效果整局遊戲只發動一次，如蘇軍先攻日本，則條約失效。
然後係租借協議，同盟國的軍隊在原蘇軍控制的地區停留，在蘇軍開始時，該些部隊自動以蘇軍部隊的模型替代。
其次係中國地區，在美國開始時，原中國地區每有一個區域仍未有失守，則可獲一個步兵，自由分配到中國地區。
呢3個規則我覺得幾必要，因為如果無既話，會無咁有史實感，而且蘇軍將會面臨非常嚴重的威脅，故我認為需要加上。
另外亦有一個我參考A&A Revised Edition 既 Nation Advantages 改既規則，可以考慮加入，就係蘇聯嚴冬，原本係每局遊戲只限一次，蘇聯玩家開始時可以宣布本回合為嚴冬，所有在蘇聯土地上的步兵防禦力為3。
我則打算改為，由於遊戲一開始係1942年春，代表第一個回合，每次遊戲到達第4，第8，第12等回合時，該回合就係冬季，係「原」蘇聯土地上的步兵防禦力就會變為3，不論德軍或蘇軍。
咁樣可以令遊戲更有實感，亦令紅軍如史實般可在冬季有更強防守力，提供一定既休整的時間，德軍則要留意時間，把握戰機。
2次Solo中，蘇軍都係主力防守，除左一開始先消滅係莫斯科前方的德軍外，其餘大部份時間皆為防禦。德軍方面除左先攻打北非埃及外，亦會先集中優勢兵力消滅列寧格勒，此地區非常重要，因為盟軍的海空援兵都可以從北海進入此地援助紅軍。由於紅軍防禦策略上都傾向盡買步兵，故重武器如坦克飛機等需要盟軍直接船運空運，失去列寧格勒地區將失去盟軍支援，紅軍要反擊將變得困難。
英軍方面，由於日軍非常強大，如果單靠美軍對抗日本，除難以快速壓制日本係東亞既擴張，在日本成功擴張後將會嚴重威脅遊戲的致勝關鍵，蘇聯的命運，與德左右夾擊，蘇聯必亡，故此大英帝國的亞洲之本印度亦係遊戲一個重心，印度除左擁有勝利城市加爾各答外，東牽制日軍，西阻止德軍係北非的推進，上則可以支援紅軍。
故此守穩印度並擇機反攻將令日本無法全力應對美軍的強大生產力量，日軍陸軍亦需要船運補充才能有足夠力量係大陸推進，如成功係印度擊敗日軍初期的機械化優勢，對日軍將是重大致命傷。
北非方面，依靠英美聯軍的海上方量，要勝出北非戰線唔難，但如德軍有心爭奪，英美要完全壓制亦不是易事。關鍵在於德軍對蘇的歐陸戰場形勢如何，有否足夠資源顧及北非，英軍係印度洋的戰艦群應該速速離開日海軍，通過蘇伊士運河進入地中海將德軍海上力量全殲。
至於英國本土，暫時認為要登陸英國風險唔細，雖然如果成功，軸心國基本上贏定，但一旦投資失敗，浪費大量資源係運兵船，戰機及制海權的爭奪等，紅軍的守備力量就會愈黎愈強，所以一般來說對英國本土的威脅唔大。係奪得制海權後，英軍應投放資源準備反攻歐陸，不過Solo中我發現英軍既要提供軍備予紅軍(主要係戰機)，亦要防禦印度，係反攻歐陸的準備上只會係最後考慮之列。
係A&A入面，英軍算係需要面對最多原化的戰鬥，亦要充份善用佢有限的資源。
大日本帝國，日軍一開始已擁有強大的艦隊，亦係東亞有優勢兵力，海上初期基本上可以無視美軍，大力掃蕩東亞地區，將薄弱的敵軍消滅，務求令自身經濟快速成長至貼近美軍，到時，美軍係沒有地利優勢之下，要勞師遠征攻打日本絕非易事。日軍同時亦係備受壓力的德軍救星，只要日軍成功擴展，盟軍必需要抽調資源對抗日軍，減輕德軍壓力。弱點係陸軍組建慢，如前期受挫，日軍要重組陸上戰力不易。如何係對抗美軍逐步強大的艦隊，同時平衡對陸上擴張的速度，將是日軍的重點。
美利堅合眾國，美軍開始時整體實力唔大，大西洋上接近無力，太平洋上的戰艦群亦不足以消滅日軍。美軍的優勢係佢無立即的威脅，係策略上只有佢打人，無人打佢，另外就係經濟實力較強，不過，隨住日軍係中國的擴張，併入美國經濟計算的中國的地區將會拉低美國經濟，美國到底應該先全力建軍打跨日軍，還是要顧及盟友係歐洲的安危分配資源去歐洲呢？呢個需要到時觀察形勢再可以決定，但美軍係盟軍勝利的關鍵，歐陸上即使英蘇無被打敗亦難以將德軍擊敗，日本係東亞擴張壓力細，美軍係唯一可以將形勢扭轉的一方！
2次的Solo，我都不自覺將重心傾向軸心國，兩次都唔難將盟軍打敗，特別係德軍有強大的機隊，係航空火力及高機動性之下，蘇軍的反擊非常困難，蘇軍不斷堆步兵，但最終不敵德軍的生產力，而德軍亦基本上放棄其他方向，只集中所有力量資源對蘇進攻，係第二次Solo中，英軍不斷輸送戰機予蘇軍助戰，有一定幫助，而係第二次Solo完結時，德軍係集中東線所有兵力下仍未能攻下莫斯科，不過，紅軍的經濟已經大跌至16，德軍則有46，日軍亦係東邊的海上決戰大勝美軍，故此蘇聯戰敗，軸心國獲勝只係時間問題。
另一方面的日軍，美軍雖然有大力建設艦隊，但位處邊緣，面對係太平洋嚴陣以待，佔有地利的日軍來說，美軍需要有足夠的時間準備才能有把握地打敗日本。或者我自已無太用心係美軍的部署，感覺美國面對住歐亞戰場充面無力感，同我之前玩A&A Revised Edition有唔同的感覺。
我會再嘗試Solo ，特別係我基本上無利用到戰略轟炸呢個玩法，係Revised Edition入面，如果你用轟炸機轟炸廠房區，可以直接炸掉敵方的金錢，但1942 中，轟炸廠房區會於傷害標示在廠房，該廠房的生產力會減去傷害標記的數量，除非你用金錢維修，否則生兵速度會下跌，唔知咁樣可否扭轉德軍對紅軍的優勢。
沒有留言:
發佈留言