台灣桌遊店之旅

最近到臺中旅行7日，原本無特定想去桌遊店，但其中一日在大魯閣新時代購物中心，
去左個類似冒險樂園既野，75蚊有成70個代幣，咁平真係玩到人都癲，最終贏左1600張飛，換左隻Game：

▲左下的誰是臥底就係贏得既獎品！

之後發現到有間桌遊店，行行下街有得睇Game，重要唔少選擇，真係令人感覺奇妙，係香港真係好難有既感覺。

既然天意俾我睇到有Game賣，梗係睇下搵唔搵到咩心水啦，不過大盒Game就唔會考慮喇，
因為去旅行只帶一個孭袋裝2個人既野，無位裝，就睇下D細Game啦，太座睇到咁多Game都突然興趣大增，
重提意我玩埋試Game，於是就坐低玩過1粒鐘，1粒鐘都真係玩唔到D 咩，試左花見小路，
但感覺一般，玩左隻動手不動口，幾搞笑，睇左幾隻Game都未能出手就收工走人去食飯了，
2個人連飲野160元台幣，即40蚊港紙，唔錯！

順帶一提，臺中既旅館真係幾正，入住左其中一間一連3晚，7百蚊晚成千尺，
服務員又有禮貌又漂漂，真係唔想返香港了。


到臨走果日，搭夜機，搵左間順路既桌遊店攝時間，就黎左呢間瘋桌遊逢甲店，價錢都係一樣，
不過就無勃根地咁多Game玩/買，一樣試左幾隻Game，唔錯！

隔離臺貌似一班大學生玩緊Ugly Doll玩到好興奮，遲D睇下岩唔岩玩先。最終都無買Game就回港了。

呢幾日既臺灣之旅，俾我既感覺係臺灣人真係好純樸，純樸到我有點擔心，在立足於世界，
面對強大既對岸政權，應當如何自處，只說桌遊而言，臺灣出品的桌遊俾我既感覺都係小品遊戲，
製作質素及消費群體已經存在，應該更加大膽及野心，進取些去出品一些「大Game」，
在各方面繼續精益求精，不要滿足於小小的成果，才能逐步增加自身的軟實力與地位，
小小愚見，萬勿見怪。