最近又想買下Game仔，其實本身無目標，不過搵下搵下見到唔少新Game幾得意，研究左2日，講下心路歷程。
一開頭係見到呢隻 Ascension Tactics 先，$400，本身好想入，deck build雖然本身麻麻，但加上版圖既戰棋模式，興趣大增，雖然英雄既棋零售版只係Token，不過雙面版圖加上大量地型可以砌到好多戰場，超過300張卡，有超過30個英用，又支援2-4人，好想有一隻可以多個2個人混戰既Game，而且KS出緊2，到時可以混埋一齊玩，好似幾正，可惜我好糾結英雄係無HP同埋攻防只係好簡單咁對比攻防的攻擊力及防禦力，無骰擲，基本上攻擊得防守方就會即死，設計師宣稱呢個設計係唔想係玩家部署一大輪之後又要係判定時再搞一輪無法確定個輸出，而英死亡係好容易再叫返出黎，變左個英既感覺唔大，好似工具人咁，感覺上好似少左份熱血，而且遊戲過程好似好短，deck build果part未玩得夠入，而戰場上又快速結算戰果，好似兩邊都唔夠咁，最終放棄，但如果再平D都會想買黎試試。
跟住又見到呢隻 Deranged ，玩法幾吸人，而且支援最多6人，有少少似 Betrayal at House on the Hill 山中小屋，玩家被詛咒困係小鎮，每回合分早晚，早上行動唔消耗神志，晚上就會，玩家要盡快去清除自身的Curse，同時係夜晚就會有怪出，視乎劇本有不同變化及規則，而且當中會有玩家會中左Deranged的Curse，要解就只能在晚上殺其他玩家，其他玩家被殺後會再復生(因為你係被詛咒係呢個小鎮)，同時原deranged的玩家就會將果張卡交俾你，遊戲在最後睇下邊個玩家清晒詛咒為之成功，反之就失敗。遊戲既要合作對抗怪物，否則會好快失敗，同時又會有玩家中deranged追殺其他玩家，感覺好有趣，又有唔少物品卡俾玩家係小鎮週圍搵，美工特別，不過遊戲只有3個劇本，而且本身有山屋諗諗下都係放棄，價錢好吸引只係$280。跟住呢隻想買好耐，不過佢個盒好長，收納好似好煩，遊戲都幾兒童向，玩家扮演天神，派出你的人去四出搶佔VP，基本上係純技術向的遊戲，可能同以前我有既Mirco Mutants 有D似既關系，我又覺得幾吸引，中文版連全擴都係$300，連全擴似乎可上6人，不過無咩人有興趣咁，最終無入。Deep Madness，模型好吸引，玩法都正，而且劇本既怪物隨機生成，本身模型種類都幾多，能力各異，不過遊戲每次應該都需要用晒6個角色，就算Solo都要控6個太累，而且遊戲難度似乎唔低，容錯率低，好似好易會有Alpha Player既情況，因為容易輸你睇到佢既失誤唔提又說不過，所以就算佢上到6人，我都應該唔想6人一齊玩，可能2-3人最好，價錢都唔貴，中文版$500，思前想後仍無入手。
除左以上，重有好多game都有諗過，例如INIS ，Titans ，A&A 1940 Pacific ，The Hunger 等等，最終都無入，原因各異(當然最主要係錢同地方啦，唔啱要放售好鬼麻煩)。
BTW A&A 1940 Pacific 賣緊$240真係平到傻。
最終入左一直想入無入既 Northgard 同埋 Arena of Gods，Northgard 節奏好似幾明快，畫風吸引，上到5人，等唔到佢特價了，略貴接近 $600 外都無咩缺點咁，應該就快收到開完再寫感受。
Arena of Gods呢類可以6人混戰既類party game以前都買過唔少，不過都係一般，呢隻唔洗$240入埋佢，用生命bid裝呢個設計幾好，每次對戰都有唔同combo，裝備選擇都算豐富，畫風吸引就入手了。
就係買左呢2隻Game之後，走去睇返一隻以前買過同系列但失敗透既Game Starcradia Quest星卡迪亞戰記，中文版就算特價到 $300本身都吸引唔到我，但竟然發現有得賣一個叫做 Showdown既擴展，將隻Game由劇本任務向變成純PVP向，咁樣實在好吸引，重支援2-4人，重支援埋以前系列既基礎同部份擴展(即Arcadia Quest / Inferno / Pets / Raiders )。
搞到我心好想試，但同時之前失望透既陰影仍然籠罩，心情矛盾，經過2日沉澱稍為平靜返。
CMON近日又宣布左新game，特別係ASOIAF既小規模版戰棋，以前我都買過SET CORE返黎想改但失敗，唔記得左點解，依家佢出就睇睇整成點，但我最關注佢10月果陣宣傳11月曼谷展覽果個post，其中出現左魔獸既部落獸人，但展覽結束目前為止見唔到任何有關消息，唔知係咩產品。如果佢出類似符文戰爭之類咁既戰爭game我可能會發癲，如果佢出類係Battles of westeros 或者 battlelore 咁既Game都正。
