有無諗過萬惡既米奇老藐會被白化小魚仙秒殺？ 將迪士尼入面既角色自行配搭組隊，擊敗對手成為競技場之王？呢隻Disney Sorcerer's Arena: Epic Alliances 可以幫你實現願望。
盒面睇到註明係Core set，即係會有擴出啦，目前已經有4個細擴推出。
Core set入面有8個角色，不過我都唔係識晒全部。
唔知一開頭出賣幾錢，我入手價唔洗$240，咁強大既IP賣咁平，角色就無模型提供改為用亞加力立牌，底座亦都係各個角色不同，可以隨意裝上御除。
角色立牌印有角色的前後，紅藍膠圈用於標記角色生命，似似地Heroclix但不能旋轉，每次要拆一拆起再標示到新的生命位置裝上，肯定唔係話好好用，但好麻煩又唔會，唔用既話就無咁好分別到敵我雙方。
遊戲中有唔少狀態標記。
遊戲中每個角色都有對應的角色卡，資訊好詳細，除左基本的生命，移動力，攻擊力外，亦有該角色所有技能卡的屬性分布數字，VP數值，專屬技能，升級需求等等，無錯，角色可以升級，升級後使用角色牌的背面，會有額外的能力。
好似白化小魚仙為例，10張技能牌共有8款，每張技能牌既右下角有個標記，使用完的牌會放到棄牌堆，而當在棄牌堆時，該標記就可用於升級，如果棄牌堆有與角色升級需求足夠數量的標記時，亦可選擇移除該等卡牌，升級角色。
每個角色似乎都有幾明顯的特色，每次對戰，玩家需要組成一個3個角色的戰隊，每個角色有10張技能牌，將30張技能牌混洗就成為你的抽牌庫。
上圖的Gaston，10張技能牌則只有6款。變化較小魚仙少，但同時更可預測同掌控。
黑魔后角色牌未升級時，左下角需要2種升級標記各2張。
當黑魔后升級後左下角解鎖一個新的能力，(每當其使用或棄置一張指明屬性的卡牌後，對任意一名敵人造成一點傷害)。
遊戲開始時，將各自的角色放到自家起始位置，每個角色有行動值，首先各自決定其戰隊成員的行動先後，一旦確定將不能在之後的回合再改變，然後雙方同時揭示各自的行動順序，而首先行動的角色會與對方首先行動的角色對比行動值(數字在角色標記的底部)，數值愈少的角色將會可以先行行動，並同時幫隊友取得第三及第五行動順序，而數值較大的則第二行動，並同時令隊友取得第四及第六順序。(1,3,5 / 2,4,6)
上圖藍隊第一係Demona，行動值40，對方紅隊第一係82，所以藍隊會取得1,3,5的位置，紅隊就取得2,4,6的順位。
將角色標記按序排好即可開始遊戲。
遊戲中只要任何玩家無牌可抽或獲得20VP時，該輪遊戲為最後一輪，完成此輪最後一個角色後對比雙方VP，較多的則獲得勝利。
除左擊敗對方的角色外，亦可佔領地圖中間的皇冠格子，當再次輪到佔領該格子的角色時，則可獲得1VP。
遊戲流程-> 輪到每個角色時，先檢查狀態及VP，如角色被擊敗則滿血返回遊戲，抽一張牌 -> 移動 / 行動 / 技能， 3項都可以做，順序任意，但每項只能做一次 ->棄牌至手牌上限 -> 回合結束到下一位角色。
角色最主要就係做 移動 / 行動 / 技能呢個階段，移動時，除了標準用移動值移動外，亦可用移動系列既牌取代標準移動，同樣，行動時，除了標準行動對接鄰的目標造成2點傷害外，亦可用行動系列既牌取代標準行動。
角色使用牌一般需要用返同佢本身角色對應的牌，則米奇不能使用小魚仙的牌。
玩家亦可在執行標淮移動及行動時棄掉一張只需對應移動/行動的牌去增加1點移動或1點攻擊力。
故此你無對應自身角色的牌都好，你仍可透過其他角色的牌去增強一下你的標準行動成果。
遊戲中亦有唔少狀態，狀態的結算方式清晰簡單，不過由於狀態標記放在場外角色順序的位置上，所以可能有時會令玩家忘記其他角色有什麼狀態，需要在結算有關效果時，再次查看被影響的角色是否有什麼狀態。
但同樣咁做都有好處，好多時呢類戰棋，狀態都係1個回合，而且愈多狀態標記放係戰場上可能會對遊戲過程造成阻礙，呢隻Game將狀態放係場外標示，清晰簡明，而且，每個狀態唔一定只持續1個回合，持續幾多個回合視乎該狀態上的token，每次輪到該角色就會移除該指示物。橙同藍的狀態結算有分別，在此不詳述。
總結：
以$240黎講，我幾滿意呢隻遊戲，目前我自已solo試過幾個回合，亦都同人玩過一次10分無玩角色升級的模式，滿意歸滿意，但亦有不足的地方。
先講遊戲的質量問題，我收到既質量唔錯，見到有人投訴既問題我都沒有出現，卡牌質量正常，立牌印刷清晰(在背光情況下會睇到角色另一面的印刷令到睇起黎唔清晰,但實際上無咩影響)，角色除左米奇全部都可以穩妥固定係底座，但米奇就好鬆，一拎起就會同底座脫落，但你仍可以移動整個底座的移動方式去移動而不會令立牌脫落，叫做有D影響，但都尚算可接受。
你可以選擇將角色黐實係底座以一勞永逸，係Core set入面你重可以咁做，但加埋Expansion時可能未必，因為你有機會需要換置血量膠圈，部份角色較大如毛毛，如果黐實就拎唔到膠圈出黎。
始終用亞加力立牌做成桌遊配件重要去到咁主角既位置都算少有，相關工藝尚需加強進化。
遊戲心思方面，佢同佢同名既手遊玩法上應該無咩關系，係全新的設計，規則非常簡單，我睇BGG另一個整合規則去學20分鐘左右就睇晒，規則清晰肯定，如果你睇原版rules唔知會唔會覺得辛苦因為佢分左4個章節去教同試玩，等你容易消化，但對桌遊或戰棋有一定認識的玩家就覺得有D晒時間。
遊戲中的8個角色都俾到我各有特色，玩法都似乎各有不同，例如米奇可以加快佢抽到適合牌既機會，增強自已狀態可以爆發更強的攻擊力，Demona就要留牌，每當佢可以一回合出兩張牌就可以增加攻擊，而佢既升級就可以獲得2VP，並且可以持續升級。小魚仙感覺似LOL的nami輔助，有補血亦有濾牌，爆發攻擊等。
此外，角色技能牌的屬性分布會影響全隊角色的升級快慢，而單一角色要升級單靠自已的技能牌不容易，比如小魚仙即使所有技能牌都不能滿足其升級需要，以邊個角色盡快升級解鎖額外能力作為軸線亦係一個重要考慮。
如何組建一個強大既戰隊係遊戲既重心，由於角色的10張牌係固定，所以玩家只需將軸心放係角色配搭上。玩快攻爆分，定係血肉長城硬碰對手等等不同既流派打法，在擴展既加持下，似乎都可以俾到玩家一定有趣而簡單的組建空間。
遊戲中的小原素唔少(但不是指規則)令到遊戲在簡單的規則下，可以有更廣闊的設計空間，在簡單中帶來一定深度。
缺點，我自已Solo幾個回合果陣，由於角色牌係fix，而且同隊友的牌混洗，感覺上我同對手(都係我)都係你一拳我一腳，純粹睇抽牌，皇冠位得1分，似乎唔值得去搶，留牌擊敗對方角色好似更有價值，加上遊戲的地圖無地形可言，復生時甚至可以在對方的復生區復生，亦沒有視線規則，只有對方的角色會阻擋移動，感覺單調。
不過係之後我再同人試玩10分(原規則為20分)果陣，我就有其他的領會，雖然遊戲沒有地形，視線規則，但簡單的地圖設計，反而令玩家更集中所有在場角色的企位變化，如果你只抽當中一段短時間去睇，可能會覺得大家打黎打去好似差唔多咁，而且被攻擊的隊手必定無法反應(因為無所謂反應牌)，但霸佔每格皇冠位置每回合可取得的1VP，以及對手會走去邊個位置去趕走你係皇冠的角色呢D部署位上，或者佢浪費時間去追擊你某個角色，從大局睇就會睇到個高下，而勝負的天平亦會因此有所擺動，最終的勝利者必定是靠向有一連串慎密部署同知悉整個團隊長短的玩家。
所以我覺得佢唔係一隻好既Solo遊戲，因為如果你隨機砌一隊人對打，可能配合唔到，做既行動半桶水無有效發揮，就會好重複咁你打我一下，我打你一下，雖然遊戲流暢但又無咩樂趣，相反如果同人對戰，而大家對其戰隊組成的優劣長短有認知，明白到中間皇冠分數所拉動造成的勝負分野，咁打起上黎可能係過程就算有重複感，但你既部署係知道咁做會成就緊更大既勝利時，成個樂趣就提升不少了。
另外隻Game唔用骰，好多野變得太確定，我個人鐘意roll骰，諗緊普攻可否用骰，防守方擲D6，1-3係正常傷害，4-5傷害減1，6就係miss，好似會增加用牌攻擊既重要性，減低雙方可能互相普攻既重複感同某情況下必死既預判。
我會再正式玩玩再俾分，如果鐘意呢類比如召喚師戰爭，超級夢幻大亂鬥等，呢隻應該都唔會令你覺得浪費錢，係有唔錯既遊戲深度上，2百幾蚊既性價比唔錯。
唯一我唔太鐘意係迪士尼背景，太兒童向，擴展比如at the ready擴，想要花木蘭呢個角色，但竟然有茶煲夫人呢個角色，用茶煲夫人出招打對手實在太難投入，太唔男子漢！
