12月3日 5人局

是日5人局 13:00 開始 , 先玩Last Night on Earth , 玩Core 既 Defend the Manor House 劇本,英雄需守住中間的Manor House 17個回合, 如有4名英雄死亡或有9隻喪屍進入這屋就會失敗。

加入少少擴展原素 , Grave Weapon 強化Zombie , 各具特色 , 亦加入左加固行動去阻擋Zomibe , 但英雄見Zombie來勢凶凶, 好快決定棄守屋內 , 主動出擊牽制 , 故此未能感受到加固行動的實力。

重有6-7個回合天光的時候，Zombie成功擊殺第4名英雄，Zombie贏得勝利。

玩左2個幾鐘，感覺遠好過Introduction 既劇本，有趣，緊張。
接著玩國王堡傳奇(Kingsburg) 中文版，比想象中有難度，玩左2個幾鐘，比想象中長，以最低分輸掉遊戲。

由頭到尾都拎住國王的幫助同國王特使呢2樣弱者保護工具，依然無力回天。

最後玩終極戰士，用牛頭人，首先被擊殺係武士，然後到磨菇，最後我一連擊殺獅子同龍成為終極戰士勝出。超簡單遊戲，適合非Gamer玩，Gamer可能會覺得light得過份，我預左用黎攝下時間所以反而比想像中好少少。

原本諗住玩埋Ethnos但無時間，收工完場。

前進！戰車道 少女與戰車 Panzer Vor！ ガールズ&パンツァー

前進！戰車道 少女與戰車 Panzer Vor！
ガールズ&パンツァー

岩岩開左箱，質量唔錯，Counter改為圖角設計，
質量亦較原日版有所提升，地圖既紙質就有D喜出望外，原先都擔心會太流，但實際雖然係紙質但感覺上有膠面/臘面感，都算厚實，咭牌同Counter印製精美，中文化都算譯得正常，配上動畫既截圖，每張咭都唔同﹔

規則好簡單，基本上係BB班級。說明書重有幾頁介紹下隻Game入面出場既坦克，對二戰坦克沒有認識的玩家都可以對你操控既機體歷史得知一二。但骰仔只配1粒，基本上你檢定命中同擊破都係需要Roll兩粒骰，不過自已有就無咩問題。

我最Concern自組部隊，遊戲中有Point Cost 可以俾你自組，但坦克種類同數量雖多(超過110架坦克)但仍覺不足，未算隨心所慾。

是旦快速地玩左2下，都係符合自已預期，鬥快擊毀對方旗車呢個玩法我覺得幾有趣，又有抽牌又有Roll骰(簡化版TOI?)，頭先試玩諗住偷雞打對家架旗車，諗住下一會合就出會心一擊消滅佢，但佢抽到"名手"搶先將我擊敗。

遊戲係一隻輕策略戰棋。有分自由模式，任意組建部隊對戰(奪旗戰/全滅戰)，亦有劇本模式，講述大洗女子學園爭奪錦標賽避過殺校的故事，還有多人作賽的錦標賽模式，當中既規則都幾自由，基本上你保留佢最核心既玩法之後，其他規則都可以自已House Rule。

12/11 

正式Solo,玩200分(預設為100分), 蘇軍對德軍, 玩演習模式, 最終德軍獲勝, 德軍戰車火力強大, 蘇軍多次失去擊毀德軍主戰坦克的機會,被擊毀旗車落敗.

今次叫正式玩過, 感覺一般般, 可能係Solo關係, 最surprise既出牌資訊你都知道, 一D有關聯性既部署, 左手打右手少左D感覺, 特別係反應牌, 例如被人攻擊時打出, 可以令對手命中判定機會降低等效果 , 你格硬推架車上前俾人打, 對手可能要諗你係咪有牌預防, 走人好定攻擊好 , Solo就少左樂趣.

另外遊戲時間短, 應該20-30分鐘內可完, 玩既心態唔係要部署咩大戰略,而係務求快速利落地直接擊毀對方旗車, 係一種要即時決勝既感覺. 有樣野鍾意係坦克有分前側後甲, 弱既戰車可能無法打穿正面裝甲, 要諗諗點樣可以攻擊較弱既位置, 而如果你衝弱既車上前, 對方攻擊你, 就會浪費一次行動,但唔攻擊, 有可能俾你架弱車有機可乘. 還有, 戰車有射程, 好多Game既設計, 只要射程就可以打中, 再擲骰睇下有幾多傷, 呢隻Game就改為,就算係射程內, 你都要先擲骰睇下打唔打中, 命中與否取決於雙方距離, 愈近愈易命中, 命中之後先再Roll是否擊破到對方, 我覺得有效增加擬真度.

Game入面雖然有過百架坦克, 但因為遊戲似乎比較傾向比你玩劇本模式(或者係比鍾意呢套動晝既Fans去經歷返劇情),所以坦克數量同種類都係按返動晝既分配, 例如德軍的學校, 大都係德軍後期坦克, 前期如3號突擊炮, 4號坦克, 美軍的M10同潘興都未有進場, 反而德軍一D重形戰車如象式,鼠式坦克就有, 覆蓋未夠全面, 有D可惜.

另外,地形方面, 遊戲地圖主要係for劇本 , 如果想自由模式, 地圖似乎有D單調, 不過我諗可以用其他Game既地圖黎玩, 但未試過 , 佢勝在所有戰車已經有個cost 方便轉移.

如果鍾意少戰, 咁我覺得都可以入手, 收藏上都可以, 佢有哂出場既角色用, 可以配落坦克, 能力係一次性, 用過之後要用牌回復, 所以就算屈機角色都唔會太失衡. 咭牌都係動晝既圖片, 亦有劇本專用既咭 .

至於一般BG玩家, 呢隻係超輕策戰棋, 未玩過戰棋, 或者嫌戰棋太複雜, 可以諗下, 時間短,setup易 , 美工唔錯, 規則簡單. 

對於有經驗既戰棋玩家, 呢隻Game相信俾唔到你咩戰術感, 除非你重口野食厭想轉下口味或者同新手玩之類.

呢隻Game日本版已有擴展, 內容係圍繞少女與戰車劇場版的故事,有機會會中文化。

另外隨著動畫少女與戰車最終章的堆出，有機會會為遊戲帶黎新既擴展/原素呢！

https://www.youtube.com/watch?v=rOcucGoXpX4

『ガールズ＆パンツァー 最終章 第１話』予告編

Runebound : Unbreakable Bonds 符文秘境: 不滅的約誓

都推出左一段時間,但週圍都賣得唔平, 最後係外國訂返黎, 連埋另一個細擴 Fall of the Dark Star一齊買, 連運費 $510 .

Runebound Base Game介紹: 
http://talkboardgame.blogspot.hk/2015/12/runebound-3rd-edition.html

新鮮熱辣到手,  膜都未脫 : 

盒背, 隻Game既尺寸係 IA Twin Shadows / Diskwars :

呢個擴主打Solo 及合作模式,  一板Token , 2張全新劇本, 3張舊劇本更新：

2個新模型 , Assets咭 , 技能咭 , 2疊新故事相關的咭, 當然重有呢次擴展中, 為Solo而設的怪物AI對戰Board , 而且分為4大類別 , 強化你面對不同怪物的感覺 .

Token, 更多裝備選擇了@@ , 另外右下角的箭咀Token 係用於保留一個未用既Action , 可以係之後需要時用, 最多只能保留一個, 我覺得呢個改動非常好, 但我未實際試, 我最盡快Solo一次, 不過呢個Token 但款一般, 我可能會用其他Token代.

劇本咭 , 舊劇本加入左少少新花臣 , 新劇本就係講無見好耐既惡魔蠻族尤薩回歸 , 你要阻止佢地成功, 而另一個就係講世界出現不明病毒 , 大量人民感染, 亦令到其他生物異變, 你要搵出真相 , 解救世人。 重有獨立擴Caught in a Web既更新劇本咭, 至於另一個Fall of the Dark Star因為係PVP劇本, 所以無納入合作/Solo模式。

劇本咭背面, Boss生命會因應遊戲人數而調整。

新的怪物，配合返劇本，符文戰爭的尤薩部隊黎到Runebound了, 不過D圖又係熟口熟面, 用返Battlelore既圖：

被怪病感染的怪物：

新既Assets咭, 右上角既木頭車? 可以一次過Carry住2個Trade Goods,  WTF 好端端一個英雄為左錢. 依家要拉貨了。又多左D裝備選擇, 想快D試~
除左以下既裝備, Assets 加多左十幾既Event咭 , 當英雄進行Shop果陣就會激活, 好多都係好野, 黎如全場裝備平$1 , 交換賣場裝備 , 在商店打工賺錢等等。

怪物AI Board , 分為4大類, Base Game入面既怪物Token 將歸入Warrior , 所以呢個擴只會俾另外3套Token你 , Solo果陣, 你幫怪物Cast完之後, 按Board既指示分配位置, 然後到怪物時由上至下執行動作即可。

所有本擴展的內容物,重有小部份無特別講：

其實除左Unbreakable Bonds之外, 較早前出的4個細擴亦分別全部入手, 目前已將Runebound所有擴收齊了。

▲Runebound英雄齊集！

等我玩完再深入少少講值唔值得入手。

Warhammer Underworlds: Shadespire

剛剛訂左呢隻Game , Warhammer Underworlds: Shadespire

不過未收到貨, 過幾日會收到, 依家先講下少少相關,
呢隻Game年中左右見過, 不過果陣以為不同種族之間係無分顏色,
For你自行上色, 所以無特別期待, 但再睇返發現係預設不同顏色, 即使唔上色都無問題.

而且,其實最近我好想搵類似呢D有Board既模型戰棋, Mythic Battles Pantheon 曾經考慮過, 但覺得隻Game太多野, 要拎出黎玩set好晒可能好費時, 特別係Solo的話都搞一大餐就真係可能無咩機會開, 最終無back到(雖然性價比唔錯).

而較早前入手既Magic the Gathering Arena of the Planeswalkers  , 感覺係失敗作, 我連寫都無再寫, 明明係一隻好有發揮空間既Game , 有D似一隻好舊既PC遊戲『魔喚精靈』, 但規則怪, 部份咭既啟動方式怪 , 好似倒退返去30年前咁既規則, 非常失望.

類似既Game我手上有Imperial Assault 星球大戰帝國突擊, 目前都重有儲, 不過每次都要set地圖, 要幾有mood先想玩,  figure pack都幾貴, 唯有慢慢入, 而且我始終都係鐘意奇幻風, IA不能將呢個空洞填滿.

見到Warhammer Underworlds: Shadespire , 先係大喜, 之後就伴隨憂慮 , 隻Game定位似乎就係我想要既野 , setup唔煩, 模型精美, GW出品唔怕無故收檔, 價錢都尚算吸引, 一次過買左Core+2盒擴連運費都係$700頭.
咁好, 有咩憂慮呢? 首先佢係preset 戰隊既打法, 每次選擇一隊戰隊, 成員已經fix左, 意味不能自組部隊 , 亦無所謂Point system , 自已去設計戰鬥就多一重難度, 第二係隻Game只玩3個回合, 每回合可以做4個動作, 即共12個, 感覺太快太少 , 因為佢既另一重點係咭牌構築戰隊技能,透過好既走位, 支援, 關鍵既一擊 , 濃縮到3個回合內, 當然係緊湊D同富有策略性, 但我更鐘意Deathmatch果類玩法 , 所以令我猶豫左一輪.

最終, 我覺得可能可以House Rule到佢玩長少少, Common Objective等等, 而且Diskwars都係玩5個回合, 當初都覺得5個回合可能唔夠, 但實際係剛好的, 絕對唔會覺得少. 而當戰隊愈出愈多,玩家們一定會要求可以同時派出2隊或3隊戰隊出戰既呼聲, 日後可能會有相應既規則配合 , 故即使戰隊成員不能改變, 至少或可以配合不同戰隊出戰.

本身都考慮緊入簡中定英文, 英文版睇落咭牌字體靚D, 但大多都係賣簡中, 而且我擔心簡中出出下唔出, 但入英文又可能難買, 下下要係外國訂, 睇過有人話翻譯無錯, 就入左簡中 , 但後來被網友提點建議入英文版, 最終入返英文版, 由於中文版資料唔多, 只有睇過幾張, 果然怪怪地, 可能成套Game咁睇係無問題既, 但既然係咁就算, 有時想查返張咭中文化左好難搵, 大家留意下.

PANZER VOR! 少女與戰車 戦車道ボードゲーム 前進！戰車道 中文版推出

PANZER VOR! 少女與戰車 動晝改編的戰棋遊戲, 即將推出中文版, 而且由日版既簡約(陋)包裝, 改為天地蓋盒裝, Token 亦改為圓角 , 好彩之前無入到日文版.

遊戲包括 144 Token ,近百張咭, 3張地圖 (底面印刷) , 結合抽牌, 兵棋, 部隊自訂Point system ,  擲骰 , 少女 同 戰車, 一款輕策戰棋, 實在難以抗拒.

更新: 預計11月10日左右發售, 預計約 $270 (順豐出貨,運費到付) , 有興趣的朋友可直接係『桌遊說 TBG』 Facebook或係到留email聯絡我查詢購買(只限香港地區).

Runewars 符文戰爭 2/10 戰報

10月2日趁假期臨時約下局 竟然難得夠腳開 原本夠4人但最終得3人出現

把握機會玩下我最鐘意既Runewars , 遲下TI4推出Runewars應該更少機會開到.

今次我玩精靈Latari Elves，大家都已經玩過Runewars 唔洗教棋 , 今次加入左探索標記，在英雄移動結束後，翻開探索標記，可能係令到果個地區資源增加，遇上強盜，或者係龍王座-- 等同一個龍符文等等。

起手大家都差唔多，不過尤薩Uthuk Y'llan太耐無玩，忽略左冬季黎得好急，糧食不足造成軍隊顯著傷亡，白費左開頭既徵兵時間，亦令起手形勢落後。

而不死族Waiqar the Undying 開手無耐就獲得巫師議會頭銜，每個季節咭印有巫師議會，擁有該頭銜既玩家就可獲得1個影響力。令到過程中不死族在往後既競標都處於優勢。

而我就大力建設要塞，加上我好快完成手上既秘密目標(控制2個中立城市)，不多久已經有3個龍符文。

▲中段時間，尤薩夾係不死族同精靈之間，加上重要既鐵礦被唔少既中文部隊佔據，基本上要同時應付3個勢力，精靈乘虛而入攻占尤薩用戰術咭建立既要塞(最左方)，而且精靈亦在戰術咭中抽到不少支援部隊，根據地暫時安全。

至於不死族，勢力已推展至地圖中間，憑借頭銜咭影響力優勢，多次勝出關鍵既競標，我希望尤薩在平定其區內中立勢力後可以聯合對抗不死族。

就在此時，不死族憑借攻入尤薩及由英雄任務贏得既龍符碎片，宣告擁有足夠龍符，只要守多一年就可勝出，時為第5個回合的秋季。

當時我手握4個龍符，曾幻想尤薩如果趕及堀起，大家聯合進攻不死族的話，或許我可以在終局時以較多龍符取勝，可惜，不死族老手果然係老手，話咁快夠數，我決定用左翼大軍進攻不死族，但中間又有一層中立部隊阻檔，雖然輕易消滅該中立部隊，但不死大軍完美布防，如果輕率進攻好易被圍，加上時間無多，唯有搏抽戰術咭，但無大作用，加上尤薩實力實在太低，無法在不死族右翼造成威脅。

不死族既真龍符皆在其腹地，就算可以突破防線，亦無時間深入奪取，結果精靈亦放棄無謂既死傷收兵回國，希望可以同不死族在戰後談判。

最終不死族贏得勝利。是次戰局一般，第一次玩3人符戰，感覺無4人咁平衡，期待既3方混戰無出現，尤薩基本上處於挨打，當然，地圖係尤薩作最終部處，可能同set場唔夠仔細有關，導致尤薩較弱勢，尤薩自已都有責任。

但縱使係咁，不死族玩家係Runewars既常勝將軍，雖然係一隻美式桌遊，但有遠見既策略的確對贏得遊戲有重大作用。最終遊戲由1點正式開始，5點左右完局，係最快既一次。今次戰局既得著：不死族既飛龍好強，精靈既樹人好弱！

Last Night on Earth: The Zombie Game

一個已經不停翻炒濫用既題材 , Last Night On Earth : The Zombie Game (LNOE)  , 關於一眾幸存者與喪屍之間搏鬥既故事,  在一個小鎮上 , 扮演幸存者搜尋物資, 四處躲藏 , 連結隊友, 一起逃出生天 , 亦可成為喪屍, 追獵人類, 張牙舞爪 , 團結流散四周, 脆弱的行屍走肉去完成大業 ,  今晚 , 會係你的最後一夜嗎?

遊戲支援 2-6人, 不論人數, 每次遊戲必會有4個幸存者及至少1位操控喪屍, 可能會一人分析兩角 , 而6人遊戲時, 會有兩位操控喪屍.

個人覺得5人最好, 6人都唔差.

遊戲已經面世十年, 故此玩法規則相對當下類同遊戲感覺簡單得多.
遊戲有6塊L形版圖, 每局只用其中塊, 可惜只係單面印刷, 如果底面不同變化更大, 而中間的方形版圖則為雙面, 其中一面只用於其中一個劇本.

遊戲有5個劇本, 包括最簡單既攻防戰, 搵到燃料開車走, 搵返D同鄉等等. 每次set 場地圖都係隨機, 所以就算同一故事再玩, 地圖都可能有所不同, 不過個人覺得地圖設計唔算有深度, 所以有否變化實際唔大,但點都好過不變.

有8個角色選擇, 圓形位置用於表示該角色目前的生命, 每個角色都有不同能力, 重有真人配圖, low budget喪屍電影feel即時出晒黎.

8個英雄模型, 雖然係10年前既Game, 質素都算係咁 , 唔失禮.

喪屍有14隻, 2個色, 當有2個玩家操控喪屍就可以區分 , 我覺得2個玩家一齊控屍, 係戰術統一性會有小小影響, 但就打破類似Game要1人vs多人既情況, 無論人類定喪屍都會有同伴一齊計劃下, 增加樂趣.

玩法非常簡單, 講少少重點 , 一開始喪屍先手, 喪屍擲骰決定本回合是否可以將新喪屍進場 , 骰數大於場上屍數, 就可以補充新的喪屍 .

喪屍每回合會補回手牌上限, 然後就可以移動場上的喪屍 , 每次只可行一格, 不論喪屍或人類,都可以打斜行 , 而且喪屍可以穿牆移動 (透過木地版爬入 , 牆隙 , 窗户穿過) . 如果移動時接鄰有人類, 必須向該格移動. 當所有喪屍移動後 , 如同格上有人類則需要戰鬥.

戰鬥, 喪屍擲1粒擲, 人類擲2粒, 如果如上圖, 屍的骰數少於人類最大的骰數代表被推開,  喪屍傷不了人類, 企在原地 , 而人類亦沒有成功擊殺喪屍.

如果人類擲出的擲數大於喪屍,並且2粒骰數都是相同, 喪屍才會被擊殺.
否則如打和或高於英雄秉擲,英雄就會承受1點傷害, 放置1個wound token到英雄咭上, 每隻喪屍即使面對同一英雄都需要遂一戰鬥.

最後將回合開始時擲出補充的喪屍平均分配到場上的屍洞位置上.

喪屍玩家完結後就輪到英雄 , 英雄可以擲骰決定移動步數, 如在建築物中可以放棄移動以抽牌, 看能否找到什麼好物, 或任務目標牌.同樣如果移到喪屍位置則要戰鬥.

遊戲不斷重複以上流程直至任務達成或時間已到, 一般而言如時間已到人類沒有達成目標則人類失敗.

就咁睇遊戲性好似一般, 因為遊戲另一重點係咭牌.

上圖為喪屍咭, 可以突然加速 , 加攻擊力等, 都有幾精美的配圖, 一般戰鬥要打到對方唔易, 而已英雄行得好快, 喪屍要好好運用手牌出其不異突擊人類. 共有60張喪屍咭, 大部份會有2-3copy , 例如停電熄燈, 豪雨 , 及一些有趣事件咭, 可提升喪屍的力量,  當抽光後, 喪屍咭重洗.

喪屍有咭, 英雄當然都有, 不過就要主動去建築物搵, 如果無咭 ,面對不斷可抽牌既喪屍會好劣勢. 英雄咭比較多係物品類型 , 但亦有事件牌. 而當英雄需抽牌但無牌可抽, 視為物資用光了 , 人類失敗.

版圖上有不同建築, 部份可直接拿取某些牌.

Last Night on Earth 亦有另一賣點, Game Soundtrack:

有埋Playlist同歌名, 可惜, 非常差, 正常你唔可能頂得順聽住玩, 雖則係10年前既Game, 但編曲同音效好似90年代日系RPG midi feel , 不過我唔介意, 有無CD都會買.

說明書亦有介紹人類角色:

部份遊戲配件, 所有Token , 咭 , figure 質量都唔錯, 咭好厚身, 紙質不同於平常既遊戲,  恕無法專業地講出係咩紙, 光身, 有D啜手 , 不過應該會襟D. 

總結:

隻Game暫玩過1次, 有少少喜出望外, 可能本身唔大期望, 始終都成10年, 同埋呢隻Game 好耐以前有留意過, 當時唔大動機入手.

遊戲節奏快, 規則簡單, 咭牌文字稍多, 多玩一陣就唔洗再點消化, 成隻Game好集中係人類要完成目標,逃避喪屍 , 雖然唔容易死, 但失敗條件其實都唔難, 所以人類唔會太搏 , 至於喪屍 , 如果諗住直衝就可以殺到人就諗得太簡單, 必需有一定部署, 雙方玩既感覺會有D唔同,  人類方可能比較係RPG feel ,因為太多隨機性, 你會時刻擔心喪屍玩家有無咩勁牌過黎殺你, 體驗故事, 歷險既感覺比較高.

而喪屍目標比較單一, 就係殺人, 但喪屍單一隻難以做出大威脅, 在喪屍重生進場, 咩時機出牌buff , 點樣集結四散的喪屍去作出有效威脅, 通通需要部署, 玩起黎反而有D策略性. 不過遊戲涉及大量的擲骰抽牌, 可能會比較OP既能力,  策略性始終有限, 將Last Night on Earth 視為一隻輕鬆既喪屍遊戲會好D.

目前玩左第一關, 過程都幾峰迴路轉, 亦有緊張時刻, 比起一D題材相近但較複雜既遊戲 , 起碼節省setting 時間, 規則無咩支節零碎 , 大家集中係遊戲本身 , 玩過Mansion of Madness , Descent 呢D Game之後 , 可能更反撲歸真.

我需要多玩幾次再評呢隻Game, 佢唔係一隻精妙既遊戲, 亦沒有太奇情與技巧, 只係一隻系統好舊, 擲下骰仔, 抽下出下咭, 輕鬆玩1-2小時既平實遊戲 , 但我有少少厭太多旁支鎖碎既規則及佔用大量面積既Game , 雖然未完全肯定隻Game , 但都已經入左佢一個細擴 , 日後會再更新我既睇法.

主觀評分：3.5/5
客觀推薦: 2.5/5
策略度：2/5
簡易度：3.5/5
耐玩度：3.5/5
氣氛：3.5/5