12月1日 3人局

呢排好耐無開局 12月1日開左場3人局

玩左Clank! , A Game of Thrones Catan: Brotherhood of the Watch , 同埋Troyes

呢副係朋友買既Clank! 係D版， 我當然唔建議大家入D版啦 ，除左質量問題外 ， 用料安全亦都係大考慮 ， 有興趣的朋友都係買正版啦，雖然基礎要4百幾 ， 但擴只係百幾蚊, 岩玩買埋擴其實都唔貴。

講返隻Game, 我之前見過好多次隻Game但都無特別去睇, 因為盒面寫住deck building ， 我自已就好唔鐘意deck building ，但呢隻Game雖然有呢個原素, 但同好似暗殺神果種唔同, 在遊戲中 ， 你唔需要注重要洗走deck 入面無咩用既牌 ,  你只需要focus每輪你買入咩牌就ok。

隻Game講你要入地城入面, 拎到至少一個寶物就可以離開, 但過程中你會發出聲音, 亦即係Clank! ， 遊戲中發出聲音愈多, 愈多機會被守護地城的龍攻擊，一旦死亡就會out game， 甚至連分都無得計。

每次你從你的deck 抽5張牌，每張牌有不同的能力，大都以符號表示，例如移動，攻擊，技能等，呢3大能力都係隻Game既3條路線，由於遊戲不在於洗走自已無用既牌(很少洗牌的牌)，所以買邊類型能力的牌玩家需要因時制宜。感覺簡單得黎不失策略，玩家之間無直接互動，但都有一定空間做一些間接的阻礙。

遊戲時間短，3人大約小於1小時，過程有趣，而且都幾緊張，打破我對deck build的負面感覺，玩完一局之後臨走我地再開一局，係小有呢類中型game會一日連開2次的。

之後就玩最近入手既 A Game of Thrones Catan: Brotherhood of the Watch , 我自已都估唔到我會入呢隻Game，可能俾野人的模型吸引，加上可以守絕境長城，好似幾有趣，但依家諗成5舊水買Catan又有D傻咁， 講返可能因為得3個人玩啦，加上其實都玩過好多次Catan ，唔算有咩衝擊，但野人攻入牆呢個位幾有feel，玩家門又要衝分又要派人守城，但如果計算得宜，可以放棄守城，轉為以守城士兵多小結算，多一層計算，小一層Catan味。但整體黎講除非你好鐘意Catan同AGOT，否則可以略過。

最後都係朋友帶黎既Troyes ，係一款骰Game，我覺得好似比國王堡好玩，策略性深一D，但國王堡我都唔係玩左好多次，未能講實，但Troyes我自已都係一般。

Warhammer Underworlds: Shadespire 戰錘 冥土世界: 影塔

呢隻Game一出果陣有留意，曾經落左單但供應商有D問題最終Cut左單無買到，最近又睇到佢出左個擴Magore's friends ， 正到甩碌 ，加上新Season Warhammer Underworlds: Nightvault 即將推出，係時候要入手！

我買佢有好大顧慮，因為已經難搵人對戰(又要買，又要砌Deck)，我必需要可以Solo到，但模型實在係好吸引，而且就黎吸引到從未上過色既我去上色(GW , you win)，而呢隻Game都算係正式加入戰錘呢個大家庭，之前除左Forbidden Stars，Warhammer Quest Card Game，Relic，Disk Wars，Choas in the Old World之外，亦有玩過PC Game既Warhammer Total War同Warhammer Vermintide 2，對佢既世界觀都有少少明白，呢隻Game唔洗你投資太多都好似有差唔多既感覺，實在吸引，於是隔左1年，見Season 2要出，決定入手。

隻Game有砌模型，砌Deck，對戰，睇說明書同可以幫模型上色的5大樂趣集於一身，模型易砌唔需要膠水，不過部份位置我都有落AA膠以免有誤，拆件時因為無模型鉗，過程中一個模型的手指同一個頭斷左，手指斷左反而更有霸氣，加上搵唔到斷指就由佢，至於個頭用返AA膠貼返乜問題都無。相對於我之前砌既Samurai Battles 全套加擴，果set野真係砌到我嘔電。

模型都尚算硬淨，我係臺跌落地都無斷，好彩。

砌Deck；Game入面預組左兩個陣營的牌，另有一套牌等你玩過後再加，可以進行一定程度的砌Deck體驗，但以Core黎講，我感覺唔算有太多選擇，不過咁多擴等你買問題不大。

我自已Solo左6次，頭2次邊玩邊睇Rules，感覺一般，但往後適應左，都算有趣，但因為Solo，始終唔會玩到同人對戰既趣味，有點可惜，但如果你會搵到人對戰，呢隻Game都算唔錯，佢節奏快，遊戲策略更多在於咭牌的組合，能力牌同目標牌，再加上戰隊的配合已經有好多變化，我覺得遊戲最大的趣味部份係砌既過程，對戰只係你砌出黎既能力展現，從不斷的戰鬥中找出你選擇的戰隊的優缺及策略。

如果你係想佢有打雷台果種拳來腳往感就唔係呢隻Game可以帶出的效果。

BTW，基於我係自已買黎舞下，會慢慢收集我鐘意既戰隊，新Season 入面，邪月果隊同唔知係咪木精都幾吸引，加上Season 2既Core都係必入。 上季的就已經買左骷髏戰隊同Magore's friends ，另外對矮人同魔鼠都有興趣，慢慢收集。

講返Solo可行性：如果你有時間了解夠D牌，有時間幫每個戰隊砌，咁其實都唔係話完全唔可以，但趣味同對戰就一定減一截，但模型咭牌都精美可以救返Solo的乏味感，加上係擲骰打鬥，而且一局其實唔長，唔係太難Handle，我自已就克服左個瓶頸位，領略到個樂趣。

Battlelore 2E 再續前緣

唔好誤會， 唔係講緊Battlelore 2E會有新擴出，只係我買返全套Battlelore 2E之後其實都未玩過，今日有時間就開黎Solo下。

我改左一改個規則，最主要目標係希望可以方便Solo，同時亦減少不必要的準備時間。

首先兩軍對陣每邊可以用60P (原本是50P，但擴展有好多特色部隊，限額太低會壓縮佢地出場的機會)，而我玩完一局覺得60P已足夠 , 或者可以再上到70P , 但再上太大規模就同佢呢隻Game唔太夾。地圖亦唔夠縱深去展開部隊。

其次，唔用佢既Command Card ，改用Tide of Iron 既方法，每邊每次可以對2個部隊落命令，行動完就放個Token去標示(Token自備，2隊合計預備25-30個已足夠)，標記左既部隊不能再行動，輪流直至全場所有部隊行完為1個回合。回合結束就清走所有行動標記。

咁既話可以令成個Game既行軍策略變得更加嚴謹，唔再受牌運影響，亦方便Solo。

第三，地型布置，你唔想煩可以用返佢本身既規則玩，我自已就用返佢本身既地型咭，再按指示放VP Banner，其他效果可以不理，將地型咭拎走唔洗再睇。
如果想自設地圖，FFG官網重有得俾你設計，重可以Save或者print出黎，你可以自已設計一D通用戰場就唔洗次次再諗玩咩場。

第四，Lore Card，可用可唔用，建議頭一次就唔好用住，你可能覺得唔用都夠好玩，我自已無用，咁玩既時候會有Lore獲得，有何作用呢？作用有2，第一係部份部隊需要Lore去啟動能力，第二係在每回合結束時，你可以選擇將每5個Lore換成1VP 或者我之後已經改為，係攻擊時，每支付1個Lore可以多擲一粒骰，最多可一次過支付4點，同時，係決定下一回合先後手，持有較多Lore的可決定黎緊呢個回合的先後手。

第五，勝利條件，可以以X點VP為目標獲得勝利，剛才的一局同時有4個VP Banner側在一邊，不死族最終以12VP對4VP勝出，歷時大約4個回合。(不死族12VP中的10VP都係以佔領VP Banner獲得)。

最終是否以每5點換1個VP以及以幾多作為勝出條件呢D當然可以按自已喜好，不過由於每回合全場都可以行動，其實節奏好快，如果訂太高，可能對手已經明顯覆沒但VP都未達勝利要求，所以我覺得唔洗太高。

第六，小量部隊會同修改規則相撞，例如人類擴展中的衛兵，佢會話你用Command落Order的時候，你可以支付1 Lore以令佢無視左中右的限制都可以對其落命令，而如你如此做，呢個衛兵就可以多移動1步。  由於我地唔用Command Card落命令，我就簡單的將佢改為，指令佢行動時，你支付1Lore的話，可以多移動1步(最多只可支付1Lore)，咁改實際上唔會點影響平衡性。 我睇過其他部隊能力，應該都無咩太大的規則相撞，都係好直觀，唔會需要特別真係改咭內容去提示，你玩兩下就熟，而且，即使你覺得呢D改動對個兵種有少少弱化，你係部署時就因時制宜即可，唔會覺得唔可行的，唔會好似其他Game咁一改就基本上會牽扯到其他改動或問題。

基本上按以上改動，你已經可以好快開始輕鬆Solo，又唔需要處理咭內容，左手打右手係分唔同時間處理，可以好好感受各個兵種的能力，BL2E所有兵種能力都幾有趣，所以就算無咭的加入，都有足夠趣味。

係到俾各位已經入手但對戰機會少的朋友參考，Lore 咭如果想玩埋，我睇過D咭只有好少量對修改規則違反，你鐘意既可以係用之前先清走所有相撞的牌，大部份的咭都可以用係呢個修改玩法入面，基於用以上方法第一次Solo已經好順暢，下次應該會玩埋Lore咭，就算因為違反規則要cut走部份牌令到兩軍總牌數不同，其實都唔會有問題的。你不能希望兩軍係部署，能力，資訊，地型等都係對等的情況下開戰，咁並不乎現實。

我真心覺得BL2E係同類遊戲入面做得最好的一隻，兵種能力多變有趣，有Lore咭用，修改規則簡單，模型精美價錢相對現在來說對比IA 已經好親民，兵種選擇多，美工一流，重可以自組兵，我覺得真係一隻難得的好Game，可惜應該唔會再有擴，但最近FFG 創辦人離職，我感到有一絲絲的希望，可能唔係擴，但有無可能係幾年後會出類似既Game，然後再續BL2E未完的夢呢？機會大左。我真係好想佢出埋精靈同獸人族，特別係獸人的速龍騎兵，真係好吸引。

近況

一段時間無寫，打返幾粒字。

今年以黎Boardgame無咩真係好吸引我既作品，新入手既遊戲感覺都係一般，始終不能重拾以前既感覺，開局既機會唔多，更加專注係可以Solo的遊戲上，但出手既意願都唔高，硬係覺得其實都係差唔多。其中比較有期望既Aristeia玩過2次，有D落差，稍為失望。

除左之前一次過買2套Battlelore 2E外，Fortress America都算係今年入手而滿意既遊戲，近日趁Battles of Westeros 鹿擴大減價再入多套，即係全套BOW入面除左Brotherhood without banners只買1套外，其他都入左2套，但我想再入Clansman ，Tully 同 BWB各多1套，以滿足我想做到既大戰場面。其中BWB我將佢既騎兵同步兵併入Tully家族，而弓手就併入本身無弓兵既Clansman入面，令到呢2個小家族既總兵力都可以同另外3大家族一戰。

如果鹿擴到手，我就有4個版圖，可以併埋一齊做超大戰場，近日亦不斷替兵種修改能力，其實都幾有樂趣。

除左BOW外，亦想入手A&A D-Day ，但位置有限暫時觀望，最近GENCON開幕，FFG都無咩特別新作，係有隻Card Game Forge好似幾得意，但買左 Crystal Clans(亦都係稍為失望)，真係唔大信心。

我覺得係我自已心境既轉變，同隻Game本身好壞無關，可能係10年前以上既Game我都會覺得好玩到癲，但今日就較為專注係規模大，兵數模型夠多的輕戰棋上，至少唔玩都睇得。其他既吸引力真係愈黎愈低了。

Warhammer Quest: The Adventure Card Game 重生！？

2年幾前FFG推出左呢隻 Warhammer Quest: The Adventure Card Game ，但出左Core之後就同GW分手，擴展無期。呢隻Game我覺得有好大潛力，加上美工出色，玩落又好有地下城過關feel ，用咭都可以做到果種探索，共同合作戰鬥打Boss既感覺，當時同Frd連開2日去推爆隻Game，不過當時Core入面既關卡唔多，唔算耐玩。

原本以為GW日後有機會繼續開發呢隻Game，但係6月6日FFG公布1則消息，Heroes of Terrinoth 將係今年秋季推出，而玩法似乎同Warhammer Quest: The Adventure Card Game 非常相似(應該係一樣咁濟)，內容物所知唔多，睇圖應該有6個角色選擇，任務亦增加到8關，我估總體咭數會比Warhammer Quest: The Adventure Card Game 為多。

FFG 失去Warhammer 之後，不斷加強自已Terrinoth背景遊戲的發展，而Terrinoth背景我自已都接受，話晒係Runewars同Battlelore 2E的背景，加上係佢親生仔，少一些版權分成的成本，期望佢會將省落的成本加強遊戲內容本身。

用咭牌的方式可以塑造出玩緊一隻地下城feel的Game，收納方便，setting亦較快，我自已好期待，而且重可以Solo！

又一隻小型模型戰棋 Wildlands

最近已入手Aristeia 尚未正式開過 , 俾2個frd試玩左半場 , 可能未熟Rules , 感覺一般, 會再試清楚D , 但另一款模型戰棋Wildlands 又將會推出, 從BGG有限的消息中, 以奇幻為背景, 造形多變, 強調係快速簡單的規則與Setup, 但富有策略的戰鬥遊戲。

版圖應該係雙面印製, 係類似地下城中對戰 , 以最快獲得5分為勝, 擊殺敵人或獲取寶藏就可獲得1分 , 配合戰術咭, 同Aristeia都幾相似, 但Wildlands更合口味 , Core 有20個不同模型, 正常5個角色一隊 , 按目前睇到既相模型Size 較細, 我個人幾鐘意呢種Scale 。遊戲似乎唔會用骰, 戰鬥的傷害輸出似乎係固定, 期待日後釋出規則書以更詳細了解如何在固定傷害中帶黎多變的策略。

另外組隊戰鬥是否完全自由？定係好似Shadespire咁預設呢？遊戲的版圖都幾廣闊，睇落有趣過Aristeia 的競技場版圖，唔知自由對戰外會否有劇情戰鬥？

Core未正式出，Expansion就已有聲音, 應該係同不死族有關。如果規則合意按目前呢隻Game既配件好大機會入手，期待。

Fortress America 亞美利加要塞

係未來，美國發明出一個雷射衛星網絡，可以直接以此攻擊地球上任一目標，此發明嚴重破壞世界軍力平衡，威脅帶黎嚴重的不安，遊行示威以及各國的外交行動皆無法令美國就範解除有關系統，面臨威脅的各國決定要有所行動，但實際上，無任何單一實力可與美國相比。

在未來世界，政治環境已經大為轉變，為左要解除美國的威脅，看似無可能出現的軍事同盟成立，由亞太人民共和國組成的軍隊將會進攻美國的西岸，歐洲社會主義聯合體將進攻美國的東岸，中美洲聯邦將進攻美國南部。他們希望直接傾全國之力係美國的國土上開戰，期望美國對於係本土使用有關系統或大殺傷力武器時會有所顧忌從而有機會成功迫令美國就範。

到底三方聯手的攻勢有否可能將美帝打敗？美國又會如何面對即將到來的攻勢？

▲行動代號: Fortress America

遊戲目標:
隻Game支援2-4人，遊戲會有四方勢力，美國自已係一方，其餘三方都係同盟勢力，目標要攻佔遊戲地圖上30個城市中的18個就可勝出遊戲，而美國則要堅守10個回合，如果10回合內對手未能成功佔領18個城市令美國力歇求和，則令對手補給崩潰，無力進攻而勝利！

玩法：
起始時，美國會將所有軍隊(60個,分為5個種類)布置到每1個城市上，每個城市布防任意2個軍事單位。攻擊的三方勢力則按指示拿取相應的軍事單位，每個勢力部署20個，任意放置到進攻方向上，然後就由西岸開始攻擊，再到南部，東部，然後到美國。此為完整1個回合。

除第一回合外，進攻方都會從剩餘的軍隊中簡選8個單位再補充到攻擊方向上準備攻勢，隨著遊戲的推進，進攻方將會沒有剩餘的軍隊可用，因為一旦死亡，軍隊不會再放回備用而是永遠Out Game，但美國卻是無限。

而美國的補充方式則不同，每回合美國會先補充一座雷射炮，可以對任一目標進行攻擊，地圖上每有一座就可以進行1次雷射炮攻擊，擲10面骰，5或以上消滅一個單位。
其次，會抽2張援兵咭，你可以當作事件牌理解，會突然在地圖上出現一些新的軍隊，或者係直接消滅一些數量的敵人，不過生效的區域大多有一定限制，而不是完全自由的。如果在遊戲中你成功反攻被敵人佔領的城市，則可額外多抽一張援兵咭。

行動時，玩家決定進攻的區域，然後調動軍隊，再進行攻擊，攻擊後再進行一次移動，檢查補給鍊是否完整(即軍隊是否有一條由友方控制地區連接至進攻方向的路線，若無，所有非連接中的部隊都要立即死亡。但美國不會。

以上大致係遊戲的玩法，不同的兵種會有移動，攻擊力，先後手等的分別，過程中你需要思考如何部署不同的部隊移動的方向，進攻單位的配搭，有些地形會稍為有利防禦，美方不能以為自已的實力真的很強大，因為3方攻勢的衝力非同小可，美方如果大意好有可能好快就戰敗，而且美方必需要作好反攻的部署，因為支援咭極重要，愈多的支援咭美方先可以做到更多的可能性，否則將會是一場苦戰。

而攻方，雖然前期正常可長驅直進，但必需把握時間，亦要小心提防美方的反擊，反擊雖不能對你的攻勢重成大影響，但會減慢你的進攻速度，最大的問題是美方每回合都會新增一座激光炮，如果達到一定數量，隨時一個回合可以消滅你一個區域的軍力從而更容易反擊及令美軍有更多支援咭。

▲激光炮需部署在城市中，每個城市只能部署一座激光炮，激光炮射程無限。

總結：
呢隻係2013年果陣留意到，結果到今年大減價入手，可能因為性價比的關系，我覺得呢隻Game唔錯，雖然係一款舊遊戲重製，但都有佢既魔力，規則簡單，不過本Rules寫得好煩，克服佢正式玩其實好簡單。

今日Solo左一場，策略性唔敢講太多住，但算輕鬆，如果大家都識玩正常3小時已可完，配合美方的支援兵咭，有趣好特別的趣味，佢唔會好似A&A咁你好肯定對方的實力演變，呢到你唔會知美方會抽到咩支援部隊，有咩特殊效果等等，加上OP的激光炮愈黎愈多，個Feel都即刻出黎。
暫時我覺得攻方應該易玩過美方，但基於我只係Solo及第一次玩，明顯有改進的地方，期待下星期再試試新策略。BGG都有唔少人討論呢隻Game的Balance問題，既有人話明顯美方難，亦有人話只要有經驗，勝率會係50/50，但美方唔識玩或做錯決定等會易輸就肯定。

5/6 第二次Solo 更新: 
今日第二次Solo ，發現上次睇漏左1個重要規則，就係即使攻方攻陷勝利所需的18個城市後，依然要待美方完成埋該回合，意味美方可以有時間反擊嚐試收復失地，呢個改變完全將個感覺大大提升，今次戰況好激烈，由開始攻方佔優，到中段守方成功拖延，到後段東部地區成功突破進入美方中部佔領激光炮密集區同時總佔領城市上到23個，但在第7及第8回合中都被美方1回合內收復6個城市，攻方後勁不繼，南方軍就快被消滅，雙方咬得好緊，最終係第9回合攻佔24個城市，而美方回合只能收復其中5個，攻方成功以佔領19個城市勝利。

由於都係Solo關系，雙方部署及戰略難免缺失，但策略感大有提升。

遊戲配件精美，每個城市，軍隊，激光炮都有模型(超過300個)，玩家幫忙卡，攻方變體咭等等，係依家坑爹縮皮利潤最大化Disney化的FFG唔會再俾到既感覺。我自已幾滿意呢隻Game。

主觀評分：4.5/5
客觀推薦: 3.5/5
策略度：3.5/5
簡易度：3.5/5
耐玩度：3.8/5
氣氛：4.6/5

Aristeia! 競技場

無錯，幾日前入左全套BL2E之後進入左2日聖人模式話唔買Game住，但睇到呢隻Game之後又開始身痕了。

Aristeia! 好似幾岩我口味，Core有8個角色，自由組隊成為2 team ，按劇本進行對戰搶VP，每回合開始時，玩家秘密地排出你自已隊伍既行動順序，類似 Cmon果隻 The World of SMOG 既方式，輪流將所有角色行動後回合結束，遊戲進行5個回合就會完結，比Warhammer Shadespire 長少少。

另外，每個角色除左本身能力不同外，另有2張行動咭，加入本身既行動咭中，形成你本次遊戲的行動咭抽牌疊，無WH:S 咁多前設功夫，更適合Solo或同人Casual Play。角色死亡會重新加入戰場，所以唔會Out Game。

背景主題我就一般，WH:S當然吸引好多，不過呢隻都可以接受，當鬥陣特工/LOL ，一局應該1小時內，無咩野set，輕鬆一場，幾吸引。

而且，最重要既擴展亦已經推出，內含4個角色，增加耐玩度，相對WH:S ，整體投入既資金相對有限。

由於角色可自由組隊，所以全部角色都係灰色，如果唔自已上色既話，唔知用Cmon 果D膠圈岩唔岩size，咁就好簡單分隊了。

我應該會過一排就會入手，到時再介紹。

Battlelore Second Edition 重生

繼Diskwars 之後，賣左又買返既遊戲，Battlelore Second Edition，今日買返晒全套！

回想當日買左中文版Core，但等極都唔出擴，等到又唔出中文版，然後又唔出新族，最後就賣走左，但賣左之後，就出不死族，不死族D棋靚到呢，特別係飛龍同騎兵，但一路都唔入，好猶疑，因為FFG個款似乎唔會再開發落去，咁精靈？獸人呢？特別係我好想係RuneAge出現過既獸人速龍騎兵可以係Battlelore面世，但結果到目前為止，都係無影無蹤，亦因為隻Game基本上已經處於停止開發，清貨大減價既階段，令我難以想投資返落一隻沒有前景的遊戲上。

不過自Battlelore 2E推出到依家，合我口味，奇幻背景既Skirmish Game都真係遇唔到，加上FFG既變質，相對來說BL2E可能會係黎緊幾年內都唔可能有其他Game取代到佢係我心目中既地位，加上貨源開始減少，思前想後真係好想入返，幾經克服對佢無前景，無獸人精靈，食回頭草等心魔之後，入手就幾無懸念。

我既性格愈黎愈All or Nothing，之前玩果陣覺得人類得3隊騎兵唔夠用，步兵亦差D，尤薩既特種兵又唔夠多，組兵既時候硬係覺得差少少咁，咁岩又遇到有人放全套全新，於是乎就決定入手，2盒Core+4個軍隊擴+3個中立擴另加我再買多一盒不死族飛龍軍隊擴同1個巨人擴，total超過370隻棋， 連運費合計約$2400蚊，算唔錯吧？！

開箱拆件搞左2個幾鐘，不死族既模型真係做得幾好，值回票價，尤薩既新部隊都唔錯，特別係Blood sister幾靚，人類擴就一般，不過兩set Core2隻巨鵬係戰場上真係好有壓場感，期待收埋不死族果飛龍擴。中立生物上，巨龍同巨人亦比我想像中好。

 BGG有資源可以加埋Fan made哥布林族及精靈，有諗過整唔整，但收到隻Game之後覺得已經有好多野，收納會變得麻煩，依家剛好用晒2個Core盒裝晒，所以加新族落去既Plan暫時閣置。

一次過買$2400 Game相信對好多人黎講都係好濕碎，不過我買完呢次，應該今年會大大減少買Game既計劃，希望可以做到！
(唔通係類似聖人模式？買完Game果日就會話唔會再買！？)

後記：經過左2日沉澱，我覺得BL2E ，除非你鐘意到不得了，一般咁玩全部買1盒已經好足夠，1個族有9個兵種用，1個戰場打50分或者house rule到上80分都好啦，你只有少部份兵真係想出超過佢提供既軍隊數俾你，所以全1盒都好夠架喇~甚至中立擴都唔需要買。

Eldritch Horror 全球驚慄

由經典桌遊 Arkham Horror 魔鎮驚魂改版而黎既Eldritch Horror 終於入手了，非常滿意，雖然都出左一段日子，不過分數依然高企(BGG 7.9) ，擴展仍然繼續有開發，今日介紹下呢隻Game。

遊戲支援1-8個玩家，係一隻純合作遊戲，無隱藏資訊，我自已就唔鐘意Co-op game，特別係無隱藏資訊既情況下，1個人同幾多個人玩分別好似不大，大家都會理性去選擇，不過呢隻Game運氣好重，所以運氣蓋過左策略部署既成份，我自已就覺得如果多人玩，最多4個人玩就最好了，而我主要係Solo，我覺得呢隻Game非常適合Solo的。

遊戲會視乎使用既角色數目，難度會相應增加，可以參見下表：

▲背面係1,3,5,7的角色數。

如同大部份遊戲一樣，玩家先選擇角色，可以一控多個角色。

▲基礎版有12個角色，另我買左2個細擴，合計有16個角色可用。

選擇好角色後，角色牌背面有起始物品，起始地區，人物故事，而右邊一大堆既字係如果角色受到物理傷害需要離場或精神失常之後，玩家同佢互動時使用，每個角色都有唔同！

▲角色牌正面，每個角色都有2個能力，其中一個係主動能力，而下面就顯出出角色的5個特質，用於應對各項情況，左起智識；影響力；觀察力，力量，意志。

檢定時，如果需要檢定觀察力，就按觀察力的數字擲幾顆骰，正常情況下只要其中一顆擲出5/6就等於成功檢定。


當然重需要選擇今次遊戲想對付的邪神啦，基礎版有4個，細擴目前為止每個有一個新的邪神。遊戲目標係需要將其中3個邪神任務完成以阻止其覺醒，而每個邪神會有6個不同的任務，每次隨機抽出。(基礎版只有4個任務，在第一細擴Forsaken Lore中將基礎的邪神任務都加到6個，而隨後的新邪神都有6個任務。)

今次的邪神設計我覺得唔錯，就Arkham Horror而言，邪神只係一張卡，所以能力都係晒呢張卡上面，而遊戲本體就唔會有太大變化，今次每個邪神都有相對應的卡，玩家在收集線索時需要互動的卡每個邪神都不同，另外使徒呢種怪物能力亦會就住不同邪神有不同的能力。再加上每個邪神都有不同的任務，更易營造不同特色。

▲同一邪神的6個不同任務，開始時先翻一張，完成後再翻另一張，當完成3個任務代表成功贏得遊戲。

之後，根據邪神的指示，建立一套隨機的神話牌疊：

▲上圖的邪神卡顯示，Stage 1要有0張綠色，2張黃色及2張藍色，Stage 2要3張綠色，3張黃色，Stage 3要3張綠色及5張黃色，按以上指示從所屬顏色的神話牌中抽出並洗好形成本局的神話牌疊。

每張神話咭就類似事件咭咁，當所有角色完成行動及遭遇後抽取一張，隨左一些事件外，左上角會指示玩家轉動星盤，生成新的線索，新的時空閘門開啟，並可能導致新的怪物出現及令沒日指示物向前移動，如果沒日指示推動到0，邪神就會覺醒！

▲如上圖的神話咭，左上角指示需要移動星盤(Omen預兆)，在場上每有一個閘門而顏色與星盤一樣的話，每個該顏色的閘門就會令沒日指示向前一格，一到0就會輸掉遊戲。

▲角色Token。

Set好晒之後，玩家的角色就會係版圖上面行動，每個角色有2個行動可以做，但不能重複同一樣的行動。

▲不同的地區會註明較大機會會有什麼作用，如在Rome就會較易增加你的意志(教廷之力)，如在伊斯坦布爾就會較易增加人脈影響力(人流集散地)，而London就會生成新的線索 (蘇格蘭場之類)，但不一定會係，只係較大機會，所以玩家可以按自已所需在版圖上移動。

玩家輪流開始，完成2個行動後到下一位，可選的行動包括移動，買車票/船票(加速移動)，找幫忙(獲得物品)，休息(回復生命神志各1點)，集中(可重擲骰，此行動在加入Forsaken Lore才被引入，但玩家可以在Core遊戲中用任何指示物代替)，與其他角色交換物品，以及特殊行動(如角色能力，法術，物品能力等。

當所有玩家完成後，會按他們的所在地，抽相對應的遭遇牌：

主要係4大地區(美洲，歐洲，亞太，其他)以及探險區(如亞馬遜，金字塔，喜瑪拉雅山等，如果你身處羅馬，就抽歐洲的橙色牌，一張牌會分為3個地區，你只需睇羅馬的內容即可，你可能會被描述遇上一些人，一些怪事，需要你去做某項特質的檢定，然後根據結果，會有一些獎勵或懲罰，即使你覺得不能成功檢定，你仍然需要作出檢定，沒有選擇。


基本上所有角色都會在此階段輪流遭遇一次(抽牌)如果你身處的地方有怪物，則你需要將怪物逐一擊敗，再進行遭遇，如果你身處的地方有線索標記或閘門，你可以不進行地方的遭遇，而去進行線索(嘗試獲得該線索標記，線索用於完成任務)或閘門遭遇(嘗試封門，阻止日後可能的怪物生成及沒日標記向前推進。

▲線索標記。

▲閘門標記，每個都有所屬的顏色以對應星盤(預兆)。

▲一般怪物標記，數量都唔少(當中少部份為擴展的怪物)。底部有怪物的能力，右上色綠色標記代表出場時會有異能，而右下角就代表部份神話咭會觸發特殊能力。

▲線索遭遇牌，牌背係該邪神的圖樣。

▲閘門遭遇牌，一般比普通遭遇需要多檢定一項特質。

完成所有遭遇後，就會抽一張之前已set好的神話牌，按左上角的圖示調整，詳細如下表：

如果神話咭之後你都未輸，咁咪開始新一輪遊戲囉~~
就係咁喇，遊戲規則好簡單，一個角色可以好快就會行完到下一位，總體遊戲時間，如果玩4個角色，大約3小時左右可完。


總結：
好玩，有少少後悔咁遲先入手，當然一來係玩過Arkham Horror ，覺得呢隻都唔會有太大變化，二來當時比較貴，依家價錢合理返就入手喇，果然沒有失望，無錯你既策略有限，更多係運氣，但亦不是沒有策略/選擇空間，遊戲好有難度，唔係咁易贏。多變，無特定的Setting，從不同的邪神，不同的邪神任務，每個不同角色，不同的遭遇，不同的物品獲得的時間，不同的處境，不同的怪物，每局都可以好唔同，非常耐玩！我自已就玩左7局，當中有4局係Core，3局加左Forsaken Lore，我覺得Core 可能會有少少唔夠，如果鐘意至少都加埋Forsaken Lore 我覺得都幾夠了。

而當中我又好鐘意佢既Condition 設計，雖然開始時我覺得有D煩，但玩落對於Condition既未知又多左種樂趣。

 ▲兩個擴加埋有15種不同既Condition，Core有大約9種。在你遭遇不同的事物，怪物等可能就會獲得不同的Condition，更立體你在遊戲中的情況。

而我最鐘意既係就算係相同既Condition，當時間一到或者你去處理呢D狀態既時候，你需要反轉張咭，而每張狀態咭的背面都不一樣，即使係相同的狀態都會有不同的情況發生！可以今次你大步過關，但下次相同的情況你又敢唔敢搏唔去處理呢？

▲上圖係Debt 既Condition ，每張背面都不同，一日你未去處理或時機未到，你都不能反轉看牌背。

我自已都估唔到condition 會帶俾隻Game咁大樂趣。而除左Condition外，RPG遊戲點會無物品，法術，神器呢？

▲法術牌。

▲神器牌，能力較強，一般需要在探險遭遇才可獲得。

▲普通物品牌，與Arkham Horror不同，遊戲唔再有Cash，玩家可以選擇使用你的影響力，擲出多少個成功，你就可拿取在物品欄上多少點價值的物品，角色唔再需要花時間去賺錢了！

與Arkham Horror 2nd Ed.比較，玩完Eldritch Horror 後，我唔會再想玩Arkham 2nd Ed.(，EH 整體都優勝過AH 2nd Ed.，除左難度外，呢隻Game既玩法去到呢個程度接近完美。而難度如果覺得太難或太易，官方已有規則可供玩家自行調整，非常簡單。

唔好的地方，部份神話任務可能過難，有些事件可能令你的大量前置工作一招打亂，而且不能避免，遭遇大多不能選擇，例如描述你見到有個黑影，你嘗試用意志克服你的恐懼，但你意志可能好低，但你不能不選擇去克服，比較受限。如果接受到運氣成份重，故事描述較多，樂意感受由遊戲設計被動帶黎既樂趣而非你自已個人可主動操縱的話，呢隻係一隻好Game。如果你主要係Solo就更加適合。

我係好想再買晒全部細擴，但唔能夠全部放條同一個大盒入面，收納比較麻煩，所以暫只買以下2個細擴 Forsaken Lore 及 Strange Remnants 先。當中建議先加Forsaken Lore，會擴充Core 遊戲原本原素既新鮮感，而 Strange Remnants 亦唔太多新原素，內容好似會friendly 少少，如果覺得Core 過難可以加呢個平衡下，加左呢個唔會令遊戲過易，只係稍稍對英雄們友善一點。

13/5/2022：

係之後我都補埋另外兩個細擴(4個細擴收齊)，可以全部放晒入Core盒入面，目前都間中都有Solo，趣味依舊。

主觀評分：4.7/5
客觀推薦: 4/5
策略度：2/5
簡易度：2.5/5
耐玩度：4/5 (with forsaken lore)
氣氛：4/5