自製戰棋

較早前不經意睇到D 2戰1/72既兵人，覺得幾有趣，但我自已無玩開模型，亦無油顏色既興趣與天份，純粹覺得1個咁細既兵都做到咁精細，例如動態，裝備等，而且價錢唔貴，1盒先大約$50，對於我玩BOARDGAME其中一個原因就係可以控版圖上既minis，呢D細小既兵人同樣滿足我呢方面既喜好，但買返黎無咩用我又唔想，於是，不如用呢D兵人製作戰棋，不是可以一箭雙雕嗎？

其實自製GAME，相信唔少玩BOARDGAME既人都可能試過，市場上既GAME可能永遠無一隻係最合你心意的，有追求既玩家就想自已設計一隻佢最鐘意既GAME，我之前都嘗試過，不過種種原因最終功敗垂成，今次又會點呢？

我一次過買左3盒兵人，想做一隻奇幻背景的戰棋，原先係比較對二戰兵人有興趣，但對冷兵器我亦有興趣，加上1盒兵人中，二戰背景與奇幻背景，奇幻的更易從中分出及設計兵種。

3盒兵人，DARK ALLIANCE ORCS(SET1)，DARK ALLIANCE HEAVY WARRIORS OF THE DEAD 及 DWARVES (SET1)。第一次整模型，有點小緊張。

開盒後，所有兵人都連著支架，需要自行用剪刀或CUTTER切割，第一隻兵人整左5分鐘先叫滿意，而1盒有40-50隻，幸好，技巧好快就掌握，加上兵人質量幾好，其實唔係好需要太花功夫，一個晚上所有兵人已經完成與支架分離。

我原本以為，兵人的底座有足夠的穩定性，但實際上如果你當佢一般BoardGame既minis咁玩，佢好容易會失平衡掉下，大大影響遊戲過程與感覺。

初步遊戲既構想係類似MEMOIR'44 既系統，版圖，地貌等可原用，但命令咭，兵種等級及特殊能力，支援部隊，攻防能力，勝利條件，指揮咭(如BL2E 既LORE咭)，種族特長等，就從新設計過。

為左解決底座既問題，我睇下手邊既物料，心急底下立即將矮人所有既部隊都加上底座，而貼合既方法就用雙面膠紙。

完成，感覺OK，不過貼合力低，實際玩既時候可能容易出現分離掉落既情況，為左解決呢個問題，係吉之島買左D SUPER POWER既雙面膠，貼合力唔錯，除非你特登分開，否則放係盒中亂拋也不會分離。唔用膠水既原因一來未用過唔知效果，二來如有修改可能會比用膠貼更難，三來如日後有分離問題，修復感覺上會較用膠水為快。

回歸基本，遊戲的設計，經過多日既調整，最終決定放棄用太陽花牌做底座，因為較重，收納可能會加大撞擊掉落既可能，而且尺寸對部份MINIS未必適合，以及需額外購買太陽花牌，加重成本，所有改為用透明膠片，兵種既等級亦由4個級別改為3個級別。

製作中

顏色代表該兵種既攻勢力與防禦力，玩家回合時打出一張命令咭，以命令本回合可以行動的部隊，就如MEMOIR'44，約會做30-40張咭，不過我就將一半既命令咭，由原先分左中右行動既命令咭，改為部隊顏色，例如打出一張綠色4，就代表本回合可移動4個綠色等級既部隊。

地圖方面，由於我覺得MEMOIR'44既版圖太細，大戰根本上做唔到，竟然發現，原來MEMOIR'44出左個大地圖版，戰場比原先既大一倍，不過淨係呢個圖版都要$2XX，唯有搵印刷廠做一張膠既地圖墊，大地圖問題解決。

既然決定使用MEMOIR'44地圖，為左方便設計戰場，去左買官方既地圖設計程式$50hkd 。

之後，由於現在各族既兵種其實唔太多，有必要再買新既兵人加入，但呢D兵人因為預你會油，所然佢地本身既色唔會因為同族而統一用色，咁樣可能會在加入新兵人之後在戰場上難以分辨敵我，於是又買左4個顏色各20個既籌碼，將兵人放置其上，以辨別所屬陣營，買4個色係因為我希望在大地圖上支援4個玩家。

到目前，遊戲仍未完成，進度大約為35%，基本問題已經解決，目前要設計命令咭，貼好所有兵人，設計兵人能力，指揮咭等，咭牌的設計，就用上MAGIC the Gathering既設計程式，尚算合用。

為左盡快進入測試，已購入多3盒新既兵人，分別為獸人騎兵，不死族騎兵及蘇格蘭兵團，用以作為其中一個人類種族。

目前為止，為左呢個GAME已支出約$600，比我預期多，不過黎緊應該唔會有太多額外支出了，期望用多約2星期可基本完成。

Runewars + Expansion 種族分析(人類達凱領主Daqan Lords)

終於輪到最後一個種族 人類 Daqan Lords既兵種介紹，人類係Base Game入面比我既感覺係比較悶，無咩突出，攻城車既力量似有還無，騎兵難招務，弓兵力量一般，步兵唔夠敏捷(順序3)，除左D minis做型唔錯之外(其實4個族都唔錯)，對我而言實在唔大有吸引力，係BOW既加入後，人類又會有咩改變呢？

新加盟既兩個兵種：一直欠缺法系部隊既人類，為左應付長年既符文戰爭，緊急開辨魔法學院，最新一期畢業既學徒成為了加入戰線既新力量 — 初級法師Novice Wizard！以及人類另一欠缺的飛行部隊，在BOW中，ROC勇士巨鵬正式加入人類一方。

初級法師，血量1，順序2，圓形部隊，能力：你的對手需隨機棄去一張策略咭，如對中立部隊則無效果。
ROC 勇士巨鵬，飛行，血量4，順序4，六角形部隊，能力：如你的策略咭較對手多，則造成4點傷害，如對中立部隊則直接造成4點傷害。

法師既能力第一招竟然唔係識殺敵既招數而係去除策略咭既"沉默"技，能力算是不錯，而且順位2，而ROC既血量4，順序4以及飛行能力實在令人驚艷，而且如果出到能力既話殺傷力更強大，大大增加人類既力量，由於ROC與攻城車的建造是重疊的，故相對上，攻城車或在建造時排在更後位置。

技能方面，人民的擁護，你會獲得3個農民標記，當你的所有單位從1個地區移出時，你可以放一個標記落去，會將之視為仍然由你控制。如該地區被放置任何激活標記，則將該農民標記收回。呢個能力亦算實用，研究時機則需實戰驗證。

步兵，在春季季節咭結算次要效果時，你可在每個你的要塞地區招募一個步兵。用2點肉去研究，但只有一個步兵，加上初期要塞數量唔多，效果到底化唔化算呢？

弓兵，在結算戰力時，你每個被擊潰的弓兵都可提供1點戰力，用2點木，由於弓手的主動性為1，則如遇上被擊潰時，弓兵已經攻擊過，配合這個效果，再用步兵食傷，則弓兵既力量可獲得不少提升，實用性OK！

騎兵，1食物1鐵，可將騎兵的能力強化到抽2張策略咭，造成2個擊潰，騎兵團玩家必需研究。

攻城車，1木1鐵，可在戰鬥開始前，先花費2點影響力，損壞敵方未損壞的要塞。引用國內的說話，感覺 "有點小貴" ，但在大戰時或可發揮奇積般的效果。

新手法師，將法師的技能強化至可獲得對手棄掉的策略咭，感覺很實用。
ROC，1點食物，將ROC順序改為3，便宜而且強大的增益效果。

從兵種上，人類玩策略咭既路線變得更重要，ROC既能力，如配合騎兵，法師的能力，更顯威力，即使無ROC，滿手策略咭既人類在1V1既情況下應該可如入無人之境，人類在單兵戰力較為薄弱的情況，由海量的策略咭塔夠，滿手策略咭的情況下，有邊個夠膽同人類對打呢？(雖然唔一定需要透過戰爭獲得勝利，但RUNEWARS唔透過WARS去贏不如唔好玩，係咪？)

總體上，升級咭既效果緊貼兵種，效果直覺，不失人類風格，但我個人唔鐘意ROC呢個部隊出現在人類中，破壞人類平實既感覺，但要為人類創作一個更合乎當時環境既飛行部隊亦確有難度，不過幸好ROC既造型與質量都很好，可以話係BOW新兵中最好既一個，算在我心中加返唔少分。

2014 新年展望

無寫Blog 1個月，發現最多人睇既仍然係Zombicide呢隻Game，話說新的Expansion已經推出了，不過目前未有入手的打算住，可能呢2個Expansion都唔係太適合我口味，如果有單獨的Toxic Zombie 可能都會入D，另外亦很有興趣買Dog Zombie，有機會會入，睇下佢黎緊既Season 3會出D咩內容啦。

至於新Game，10月果陣諗過入既4隻Game，Cyclades；Dominant Species；太空堡壘飛馬號；Cosmic Encounter ，目前已經入左Cyclades 及其擴展 Hades，以及入左Dominant Species 中文版，遲D會寫呢2隻Game。另外果2隻Game暫時會剔出名單。

曾經講過，Runewars可能係所有戰爭遊戲中的遊戲，我的最後一隻同類型遊戲，所以今年應該會減少買入呢類型既遊戲了，除非主題及玩法很吸引吧，當然期待Runewars會出新的Expansion，特別係獸人，如果棋會會出Runewars BOW既中文版我都應該會再入以統一整個版本。

目前排第一入手名單既係 Battlelore 2nd edition，中文版似乎快要出了，如果推出會第一時間入手，Memoir'44 我有2個Expansion，但玩既機會唔多，主要係同一個戰場好少想再玩，而BL2E 就似乎可以改善呢個問題，而且每個種族有佢本身既能力咭，而唔同於M'44所有玩家都只有同一疊既命令咭用，加上可以自行組兵....地圖多變.....Runewars背景...模型..

所以希望BL2E會出好D，有興趣收集整個系列。

其次係Talisman既死亡擴展，在買Talsiman Base Game之前已決定買得Base Game就一定要買呢個Expansion否則唔買，主要用黎自已玩。

至於其他Game，上年尾對唔少台灣出既Game都有興趣，如恐怖旅館，所以有機會既或會入一些。不過總體上，我希望減少買Game既金額及數量，始終都玩左一段時間，對簡Game已經有一定既標準，唔會太衝動。

舊Game如 Conquest of the Empire，Manifico，IKUSA都會搵機會開。而Game of Thrones，Mall of Horror等就應該會擇機放棄給同好以釋出收納空間。

今年期望Runewars可以搵到4人鐵膽團，玩到佢爛為止！

Runewars + Expansion 種族分析(尤薩伊利安Uthuk Y'llan)

繼續符文戰爭既種族介紹，今次到我一開始唔大興趣，但接觸過後比較鐘意用既種族，尤薩伊利安，呢個惡魔與蠻族既混合體，故然係屬於邪惡的一方，多次遊戲都係選用尤薩，感覺殺敵能力高，特別係基本版既法師，威力驚人，步兵亦有一定既實力，亦有敏捷的開膛手(Flesh Ripper)可以進行突襲，起手的策略咭為4亦有助壓制對手，最重要係模型係4大種族中我最滿意的，新加上Expansion BOW對尤薩是否有助益呢？

新加左2個新兵種：Blood Sister(血腥妖女) 及 Obscene (猥虐巨漢)。

Blood Sister 順位2，血量1，圓形部隊，能力：消滅一個站立中的Blood Sisiter以選擇消滅一個對手的三角，圓形或長方型部隊。

Obscene 順位4，血量3，六角型部隊，能力：在計算戰力時，對手每有一個被擊潰的部隊獲得戰力-1，此能力在一場戰鬥中只會發動一次。

感覺上，新增既兩個單位都很實用，Blood Sister既能力可視為暗殺，一些敵軍對陣時的重點英雄如精靈法師，不死族的吸血鬼，人類的騎兵等，被身為圓形部隊既Blood Sister擊殺應該可手到拿來，對尤薩更加膽跳心驚。

至於Obscene，可能係用於修補尤薩軍的狂戰士及妖女捨身發動能力，導致結算戰力時可能較低既缺點，他可令對手每個被擊潰的部隊進而對對手的戰力作出扣減，就咁睇好似幾好用，不過佢係一個六角型部隊，發動能力既機會可能唔高，有著3血量，順位4而且有令人不安的能力，也應該滿意吧。

尤薩的新技能咭，對中魔鬼的沙漠，共有6個荒涼Token，一開始將一個Token放置到接鄰你的一個王國領土上，以後每次在季節咭出現"旱災"或"飢荒"的字眼時，可以放置一個荒涼Token至任一個已放置了荒涼Token的接鄰地區上。

此標記放置時，放置者可立即獲得該土地的資源點加進資源轉盤中，之後，只要這個標記存在，該地區將視為無資源提供，如有城市，亦無法在打出Rally Support的命令咭獲得該城市所提供的好處，如該城市可提供Dargon Rune亦無視，但不會對單獨的龍符造成影響。

狂暴戰士，增加狂戰士的攻擊力，在結算命運咭時，每1點傷害視為2點。
法術師，改為由你決定被消滅的2個三角形或1個長方形部隊。

血肉開膛手，在戰鬥開始前，你可擊潰任意數量的血肉開膛手以對對手造成1點傷害。
混沌領主，在結算戰力前，你可以摧毀任意"一個"混沌領主(被擊潰或站立)以對對手造成4點傷害。

猥虐巨漢，當他被擊潰時，可將他擊潰在你的一個王國領土內。
血腥女妖，招募她時數量為正常的雙倍。

縱觀而言，尤薩的能力整合不少，之前已經有既能力被進一步發展及優化，而且感覺實用，狂戰士，法術師及女妖的能力咭費用唔高，但能力不錯，缺陷係無力量較高而可以量產既部隊成為尤薩的中堅，尤薩仍然以接近自殺式的攻擊方法以擊倒敵人，務求在我方死1對方死2的情況下殺敗對手，如果有機會加上沙漠的能力，將沙漠迫進到對手的重點資源區，在不費兵力的情況下就可壓下對手。尤薩依舊仍為我最愛的種族，模型方面，新的2個兵種，比例及造型都不錯，期待用佢地在戰場上大顯神威。